الولد ما يعيبو شي ( كان زمان )

بسم الله الرحمن الرحيم


دايمن نسمع عن مشاكل فلانة اتفضحت وسمعتها اتشوهت

فلانة اتعرفت على فلان وطلع حيوان ما خلا ولا بقا شوه سمعتها

يوم واحد بيتكلم عن وحدة وعلى طول انتشر الخبر والبنت زعلت ومدري ايش وانتا شوهت سمعتي

بس البنت الولد سابها ضحك عليها عمل اللي يعملو

على طول وتعرفو البنات عاد في نقل الكلام بالزات السيء ولا احلا مع كتير بهارات كمان

فلان دودودودودودودودودودودودودو

والولد سمعتو اتشوهت

طب انتي مو تخافي على سمعتك وبتعتبري الولد مو متربي لما يتكلم عليكي وياريت يراعي انو عندو اخوات والخ الخ الخ

طب انتي ليش ما تراعي النقطة دي؟

شوفو ناخد الموضوع من اولو


زماان ويمكن الين دحين

الشباب والاهالي كان عندهم قناعة

انو الولد مهما سوا فهوا رجال ما يعيبو شي

في حين البنت سمعتها لو بس انخدشت مستحيل تتصلح الا بالزواج ولا قبر

يعني كان الولد يروح ويجي ويعربد على كيف كيفو ولا احد يقدر يقولو تلت التلاتة كم

ليش؟؟

لانو ولد

يعني يتعرف على دي ويتعرف على دي ويخرج ويروح ويسوي اللي يبغاه ويقولك من حقي انا رجال ما يعيبني شي

يكون متزوج ويعرف بنات غير زوجتو ويقولك عادي انا رجال ما يعيبني شي

الناس تقول فلان يعرف ويعرف وخرج ورقم يجي سائل يسأل دا ايش نقول عليه؟؟

الرد المعتاد

الولد ما يعيبو شي

نيجي عالبنت

خرجت اتاخرت شوية ترجع الدنيا مقلوبة حريقة

البنت حبت واحد او كلمتو او احد مزح معاها في مكان ضحكتلو يارب هيا بشر وتحس برضو مو بهيمة

على طول الفكرة البنت دي مررة لو البنت دي صايعة البنت دي حقت اولاد

هيا خير

طب الولد بيسوي نفس الشي

لا ما يعيبو شي

دا ولد

هممم

اش في كمان

للاسف بعض من شبابنا الله يهديهم ويهدي الجميع

حب وحدة سابها وسارت مشكلة بينهم على طول كلمت غيرو ولا سار شي راح فضحها وشوه سمعتها طب يا ابن الناس انتا بتكلم غيرها ليش تزعل لما تكلم غيرك

يقولك انا ولد ما يعيبني شي

الزوج يخون من يوم ما الزوجة تخون على طول الطلاق والفضيحة طب ياخي انتا بتسوي يقولك لا انا رجال


مو حرام الكلام دا؟؟

يسير؟؟

ما اظون

واهو انقلب السحر على الساحر

دحين تعال يا عمي اتقدم لوحدة ما تعرفها

البنت سالت عنك او بتحكي صحباتها في الجامعة

طخ من جد فلان يالله يا بنت انتبهي دا مررة صايع ومدري ايش ويفضح ويسوي

وكرااااش اهل البنت رفضو

ليش؟

سمعتك سيئة

بما معناه

زمان البنت بس اللي تخاف على سمعتها

دحين؟؟

الاتنين لازم يخافو عليه


وارجع لبداية موضوعي والمقدمة اللي كتبتها

واكمل من هنا

البلد سارت صغيرة سواء تاثير الانترنت مسنجر منتديات شاتات والي يكون

او كتر الاختلاط بالعوايل يو نو كيف جدة بلزات والمدينة ومكة عوايلها داخلة في بعض

يعني خبر لو طلع حيوصل في ال3 مدن دي كلها

وكمجتمع احنا دحين في زمان سار لازم المرأة تشاركنا في كل شي

عملنا

دراستنا

حياتنا

كل شي بلا استثناء

احيانن لافضليتهم في بعض الاعمال

واحيان تانية لانو في بعض الاعمال نضوجهم بيكون احسن مننا كرجال

في نفس الوقت احنا احسن منهم في اعمال تحتاج الهدوء او اعمال تحتاج التفكير وما يبغالها عاطفة زي اتخاذ القرارات

بالعربي

مافي احد احسن من احد

الاتنين مكملين بعض

حلو الكلام؟

اللي ابغا اوصلو من دا كلو

دحين انتا يا ولد الناس اتعرفت على وحدة وسار بينكم تتش عرفت عنها شي مو طيب اللي يكون

مافي داعي تنشر سمعتها برة

اول شي

يمكن تضيعلها نصيبها

حتسببلها مشاكل مع اهلها

حتخرب حياتها كلها

وتسير ترجع زي اي بنت من اللي اهاليهم معقدين من بيتك لبيت زوجك لقبرك

مو حرام الشي دا؟

منطق؟

طبعن لا

بس نيجي للمشكلة اللي محد كان منتبهلها

انتي يا بنت الناس اوكي اهو احنا بنراعي انو عندنا اخوات نخاف عليهم بالتالي ما نازيكي ولا يسير مننا اي شي

اولا لا ديننا يسمح ولا تربيتنا ولا اخلاقنا باننا نسيء معاملتك بعد ما ائتمنتيني عليكي

تانيا احنا ناس عندنا اخوات ونؤمن بانو ربنا حيردها في اخواتنا واهالينا ( الله يبعد عنهم كل شر )

تالتا احتراما لكي وللعيش والملح اللي كان موجود واحتراما وخوفا على مستقبلك

طيب ليش ما تكوني انتي برضو زي كدا

ليش البنت تتوقع انو مو من حق الولد يتكلم عليها ويجيب سيرتها في شي بحجة تشويه السمعة رغم انو هيا بتسوي دا الشي وبتشوه في سمعة الولد سواء بطريقة مباشرة او غير مباشرة

انتي اتدمرت حياتك وسرتي مجبورة تتزوجي

اهو ربنا ستر عليكي وعالاقل اتلميتي في مكان مع انو ذنبك ما يستاهل دا العقاب

طب الولد؟

في وضعنا وعصرنا الحالي اللي المرأة سارت في كل مكان معانا

تتوقعي في شركة من الشركات بالزات اللي في مواجهة العامة والناس ترضى بموظف سمعو سيئة بالزات من الناحية الاخلاقية

مستحيل

ليش لانو دا الشخص بيشكل واجهة ولو الناس اخدة عنو فكرة سيئة حيتحاشوه بالتالي حيقلل مبيعات الشركة دي

لمجرد انك انتي اتكلمتي عليه وقولتي فلان الفلاني اللي يشتغل في كدا ضحك عليا وسوا وسوا وسوا

بكدا ضيعتي مسقبلو وخلقة وظايف مافي في البلد
ويدوب كان بياكل عيشو

تتوقعي اهلو حيشيلوه

ايوة بس لمتى؟

في اهل حيشيلو ولدهم الين يكون في نص العشرينات

ما اظون احد حيرضى يكون عالة على اهلو وهوا بالعمر دا صح ولا لا؟؟

وبكدا الولد حيبدأ يدخل في طريق غلط او يستنا عاد الين الناس تنسا وحليني كم سنة يبغالها

ما ضاع مستقبلو دا؟

بكرة النهار حيتزوج وبالسمعة اللي نشرتيها عنو تتوقعي الكلام ما حيوصل للعروسة ولا اهلها

وقتها حيرضو يزوجو بنتهم واحد زي دا مهما كان مستقبلو مهما كان وضعو الاجتماعي

طب يمكن ربنا تاب عليه واهتدا

الناس تفهم؟

طبعن لا محد يفهم

الشر بيعم

والخير بيخص

وبكرة النهار لو كان متزوج اولادو يسمعو عنو دي السمعة يرضيكم؟

لانو ما اظون يرضيكم الاولاد ياخدو فكرة وحشة عن امهم فما اظون برضو دا يرضيكم صح؟


يعني انتي ضيعتي عليه كدا كول شي

يمكن تقولو هوا اللي جابو لنفسو بحركاتو

طب يارب تنسو نفسكم؟؟

ياما بنات سوو وسوو وضحكو على اولاد ( طبعا مو الكل )

واتمسخرو وضاعو وصاعو

بس لو احد اتكلم عليهم وجاب في سيرتهم تقولو حرام سمعتها

طب يارب هيا اللي جابتو لنفسها

ولا الولد حلال نتكلم عليه لو جابو لنفسو والبنت لا

حنرجع نقول ما يعيبو شي

حاقولكم ههههههههههههههااي

كان زمان دحين سار الولد مستقبلو وحياتو وزواجو متعلق بسمعتو

فلازم تكون حياتنا مبنية على الاحترام بين الطرفين وعدم تشويه السمعة لانو الاتنين متضررين

سوري عالاطالة وياريت ما اسمع في النقاش كلمة

الولد ما يعيبو شي