بمناسبة بداية التعداد اليوم يوم الاربعاء في السعودية قصة طريفة
في احدى العصريات البرونزية وعبودي1 قاعد على درفة بابهم يستمتع
باجواء العصير الباردة عندما تهب شمالية من و ادي حنيفة خصوصاً انه ساكن
بالعريجاء القديمة (بالقرب من مسبح الوادي ) ويمتع ناظريه بشوفه الاشجار
الكثيفة حول جريان الماء (الله يكرمني) والامل كل الامل يحدوه ببلدية منطقة الرياض
لتحول وادي حنيفة الى منتجع سياحي وتلفريك يربط ( سلطانه بــــ منفوحة )
وحركات نص كم على جانب الوادي مثل اللي بالوادي وادي حقت دبي وبياعين بليلة
وذرة ,,,, فجأة واذا بسيارة غريبة تخرق احلامه وتدخل الحي والذي قلما يدخله سيارات
فارهة باستثناء سيارة السباك الباكستاني (رشيد) -- كرسيدا حمراء 81 -- ومركب دناديش
وحديقة زهور خلف السماعات وكاتب على الباب الخلفي ( جراندي) 2004
ومظلل القزاز الخلفي ببنفسجي وكاتب بالاخضر ( ياروحي يايمن الظواهري)
وماهي الا ثواني معدودة حتى وقفت السيارة الكابرس 96 بيضاء اللون بجوار بيت جارهم
ونزل منها رجل شكله يوحي بانه مدرس ابتدائية (علوم واناشيد) وعلى جيبه لوحة مكتوب
بها ((موظف التعداد)) ,, عندها لم يخب ظن عبودي1 وعرف ان هذا موظف التعداد وانه بيجيهم
بعد جارهم ولكن الذي دق ناقوس الخطر في قليب عبودي هو الاسئلة المحرجة مثل :
وش اسم اختك
كم سيارة عندكم
كم راتب ابوك
كم ثوب تفصله بالعيد
امك وش شهادتها
ولكن عبودي كان اكبر من هذى الحركات اللي ماتمر عليه بسهولة
فقد دخل البيت مسرعا واشاع خبر ((انه عازم خوييه)) حمودي1 علشان يذاكرون
وبيحطه بالحوش ولاحد يجيهم علشان الازعاج وامر الشغالة بتصليح شاهي وقهوة بالزنجبيل
وبسط الكنبل بالحوش وما ان انتهى حتى طرق العداد الباب وهرع مسرعاً وفتح الباب
وركبه تتصافق من شدة الخوف من الواقع الغير حالي ورحب بالموظف ايما ترحيب
وقلطه على الحوش وجاب القهوة والشاهي ولكن اكتشف فيما بعد ان القهوة بدون زنجبيل
ولكن مو مشكلة اهم شي الاجابات حقة الاسئلة ماتشمي علاهـــ هع هع هع هع
عرف بنفسة الموظف حق التعداد واستاذن بطرح الاسئلة
بسم الله /
اسمك/عبودي1
الوظيفة/متخرج من الثانوية وبكمل دراستي بلندن بس مالقيت حجز
عمرك/18 سنة (( بينما حواجب عينيه تدل على بلوغه السابعة والعشرين))
هل ابوك على قيد الحياة/ نعم
هل امك على قيد الحياة/ نعم
كم اخ عندك/ 4
ممكن تذكر اسمائهم / فريد - وحازم - وهشام -وريان((يحلفون
كم اخت عندك/ 2
ممكن تذكر اسمائهم/ سوسن - سوزان
لو سمحت الوالد وين يشتغل/ متقاعد من وزارة الخاجية على المرتبة السبعطعش
((وابوه عريف في قوات المجاهدين اللي يلبسون ثوبين))
لو سمحت عبودي الوالدة ووين تشتغل/ والله الوالدة كانت محاضرة في معهد الادارة بس تقاعدت وصارت مديرة جميعة حقوق النسوان بعتيقة
كم سيارة عندكم عبودي/ والله عندنا 3 سيارات يوكون حق العائلة 2003 وفياجرا حقت اخوي فريد وهمر حق تعبئة الغاز
اخ عبودي كم مصروفكم الشهري / والله يااخي مدري بالظبط لكن ابوي يعطيني انا شخصياً 4000 ريال بالشهر حقت البادر والتتن بس
طيب عبودي اخوانك موظفين ولا طلاب / اخواني الصراحة واحد موظف اللي هو فريد في قنصلية السعودية اللي جزر الواق واق ويجينا بالعيد بس وحازم مرشد سياحي في وادي حنيفة يويويو قصدي في حديقة الفوطة لاند وهشام وريان باقين يدرسون بمعهد العاصمة وشكلهم بيفصلون وبيروحون يم مدارس الوليد
مشكور عبودي على المعلومات والبيانات والحين اسمحلي استاذن لان باقي عندي مجموعة بيوت ماخلصت منها
وهو اللي يطمر ابو عابد من مكانه وهو يقول حشا لا زم تتعشى معنا والله يالخروف غير يموت الليلة
قال الموظف /* لا شكرا اخ عبودي ماقصرت وياليت كل المواطنين عندهم وعي مثلك وحسن استقبال
وفي هذة الاثناء يسمع ابو عبودي1 الصجة واللجة والعشاء ,, ويشك بالامر ان الضيف مهوب زميلة ورع مثله
وهو اللي يطب عليهم سلاااااااااااااااااااااااام عليكم
هلا والله هلا وغلا ماشالله انت خوي ولدي عبودي بالمدرسة
طبعاً وجه عبودي صار كذا >>>>>>>>
وهو يطمر عبودي بوجه ابوه ويقول لا الله يسلمك هذا مهوب زميلي هذا مدرس الحلقة عندنا بالمدرسة جاي عندنا لاني عزمته علشان ياخذني معهم عمرة برمضان .. تخبر يبه اني راعي توعية وحلقات بس لاتخاف ترى افكارنا ماهي متطرفة ولا شي
وهو اللي يطمر ابو عبودي ويحب راس الموظف ويقول الله يجزاكم خير ويبيض وجيهكم مشكورين على هاللي تسوونه بالبزارين والله يعينكم عليهم
وجه موظف التعداد صار كذا >>>>>>
وهو يقول يابو عبودي انا صحيح مدرس بس انا جاي علشان التعداد مو علشان رحلة وزيارة وش هالخرابيط بعدين ولدك اول مرة اشوفه انا ساكن بالروضة وادرس هناك انا هالحين جاي اخذ معلومات وعبودي ماقصر عطاني اياها
وعموماً الله يوفقكم ويستر عليكم ويرجع غايبكم
ابو عبودي / غايبكم منهو غايبنا
الموظف/ ولدكم فريد سفير السعودية بجزر الواق واق
الاب/ اي واق واق الله يوققك انت ووجهك واي فريد
انا ماعندي غير فهيد ((اللي هو فريد)) وحزام ((سربوت مقطع اربع بالشوارع)) اللي هو حازم وووووو
وفي هذة الاثناء عبودي يلقى نظرة ثاقبة على الدرج اللي يودي للسطح استعداداً للفركة
ويصفق الدلة والبريق على استمارة الموظف ويطلع ساقيه لعنان الريح باتجاه السطح
عرف بعدها الموظف ان الدعوى فيها ان وهو اللي يشق الاستمارة بعد ما تاكد من تلفيقة الفياجرا والهمر حق الغاز وفريد وهشام المرشد السياحي ومديرة جمعية حقوق النسوان بعتيقة ووووووو.........الخ
والشايب يتعذر منه ويتاسف له متوعدا عبودي بـــ
*************************
اتمنى من الجميع التعاون مع التعداد
جميع الأوقات بتوقيت شبكه افراح
بمناسبة بداية التعداد اليوم يوم الاربعاء في السعودية قصة طريفة
العرض العادي
