من أروع القصص ((لا تفوتكم )) قصة مشاعل وطلال

أم وليد · 15-Nov-2007, 07:28 PM

وصلت البيت وهي شبه منهاره تفكر ايش الي خلاها تكلم شباب وتتعرف على هذا وذاك
يمكن وضعها في البيت او يمكن تبي تحس انها مرغوبه ,, وفيه شباب يتمنوها ...طيب كانت
حياتها ماشيه حلو لحد ماطلع طلال ,, اشمعنا طلال ,, يمكن علشان هو غير الشباب,,, ماكانت
تهمه او تحرك فيه شي... يمكن... ليش ماتعتبره مثل اي واحد,,, لانه حسسها انها ولاشي وهذي
اول مره تحس بهالاحساس ,,, اكيد هذا السبب الي خلاها تتعلق فيه ,, بس مجرد ماتتعرف
عليه اكيد راح يكون مثله مثل غيره
-------------------------------------------------------------------------------
في سياره طلال
عبدالله: اقول شفت خوي مشاعل
طلال: ايه ايش فيه
عبدالله: ماعرفته
طلال: لا
عبدالله: هذا الي سالتك عنه بالمجلس
طلال باستغراب: كان عندي بالمجلس
عبدالله: ايه شلون مانتبهت له, قلت لك ان فيه ناس يجوك وانت ماتدري عنهم ,, شكله هو
الي عطاها معلومات عنك,, لما اقول لك لاتدخل مجلسك ناس ماتعرفهم تسمع كلامي
طلال: صادق والله ... بس غريبه شلون دخل مجلسي اكيد يعرف احد من العيال
عبدالله: ايه شكله يعرف ابو خليل لاني شفته يسولف معاه
طلال: ماعلينا خله يقول لها اي شي انا مو خايف من شي,,, بعدين خلاص انا حددت موقفي
معاها وماظنها بتضايقني او تفكر فيني حتى
عبدالله: اشك ,,, انت ماشفت لما رقمت البنات كيف كانت بتاكلك بعيونها,,, تدري لو انا
ماعرف شخصيتها كويس,,, كان قلت انها تحبك
طلال: هههههههههههههههه حب مره وحده والله كلمه الحب اشوفها سهله على لسانك
عبدالله: لو انت شفتها كان قلت اكبر من هالكلمه
طلال: يمكن تكون انقهرت لاني مارقمتها وهي متعوده انها تترقم دايما علشان كذا حست بالغيره
من البنات بس حب ماتوصل ابد
عبدالله: بصراحه البنت هذي احس حتى ابوها ماتحبه
طلال: بعكسي احس عندها مشاعر ماتملكها اي انثى ,, بس محتاجه من يفجرها
عبدالله يتكلم بخوف: ومن الي بيفجرها لايكون انت بس؟؟
طلال ضحك على خويه الي خاف: يمكن ليش لا ههههههههههه
عبدالله: اقول بس خلك بعيد عن الشر وغني له
طلال: تدري من كثر ماتهاجموها بديت ارحمها
عبدالله: اقول ترى طاريها يحسسني بالاشمئزاز غير السالفه تكفى
طلال: احلى يااشمئزاز , ليش حامل؟؟
عبدالله: هههههههههههههههههههه , ايش دخل الحمل يالدلخ
طلال: مدري عنك ,, تدري ابو عابد حسيت في عيونها كلام كان ودي اسمع ايش تبي تقول
عبدالله: طلال,, انت الي عندك كلام تبي تقوله ,,, قول وخلصني,, تبيها؟؟؟
طلال: مجنون انت ,, ولا افكر حتى ,, اول شي انا مشغول بالمؤسسه ,, وبعدين مع امي واخواتي
الي مو قادرين يتأقلمون هنا ,, تعرف احنا عايشين برا وتعودنا على بيتنا هناك والبيئه والناس
هناك غير هنا يمكن انا قدرت اتاقلم لاني اجي هنا كثير علشان المؤسسه بس هم لسى ,, وبعدين
لو فكرت احب مستحيل احب البنت هذي لسببين اول شي انا مااثق فيها ثانيا مستحيل اخون غسان
عبدالله: بس غسان انتهت العلاقه بينهم من زمان
طلال: ادري بس كانت خويته بيوم من الايام
عبدالله: افهم من كلامك انك كنت مفكر بالموضوع
طلال: اممممممممم يمكن لو كانت الظروف غير يمكن ,, بس في هالاوضاع مستحيل
عبدالله: الحمدلله انه مستحيل,, مدري ليش البنت هذي عندها سحر اي واحد يشوفها يحبها
طلال: المشكله ياعبودي المظاهر دايما خداعه
عبدالله: ماعلينا البنات الي شفناهم هاه رقمتهم
طلال: ههههههههههههه ايه ارسلت لهم الرقم ناقص
عبدالله: مجنون ليش؟
طلال: انت عارف اني ماحب ارقم بس كنت ابي اقهر مشاعل,,, بشوف ايش راح تسوي
عبدالله: وتقوم تنقص رقم كان عطيتهم رقمي انا ياشيخ
طلال: مره ثانيه ان شاء الله اذا شفت مشاعل اعطيهم رقمك
عبدالله: وليش انت ماترقم الا اذا شفتها
طلال: تدري عبودي احب نظرتها لما تشوفني ارقم غيرها
عبدالله: الله يستر شكلك بتقلب غسان الثاني
طلال: لاتقارني بغسان ,, يمكن غسان ماعرف شلون يوصل لقلبها
عبدالله: وانت ناوي توصل ان شاء الله
طلال: قلت لك البنت ماتصلح لي بس مومعنى كلامي اني ماقدر اوصل لقلبها
عبدالله: مصدقك انك تقدر بس الله يخليك فكنا من المشاكل اخاف بعدين هي الي توصل لقلبك
طلال: هههههههههههههههههههههههههههههه تبطي
ورفعوا على صوت الاغاني وكملوا مشوارهم

أم وليد · 15-Nov-2007, 07:30 PM

بانــتـــظــــــــــار ردودكــــــم

فتاة الظل · 16-Nov-2007, 10:09 AM

ام وليد ,,,,

وين التكمله خلصت الاجزاء اللينزلتيها وانتظر البقيه

هالاتنسي وعدتيني ماتلعبي بأعصابي ههههههههههههه

*ميار* · 16-Nov-2007, 07:12 PM

الله يخليك
ماتحرقي أعصابي
يلي كملي وفي النهايه حيكووون هناك ردود حلللللللووووووووووووووووووووه

أم وليد · 16-Nov-2007, 08:00 PM

اقتباس:

المشاركة الأصلية كتبت بواسطة فتاة الظل

ام وليد ,,,,

وين التكمله خلصت الاجزاء اللينزلتيها وانتظر البقيه

هالاتنسي وعدتيني ماتلعبي بأعصابي ههههههههههههه

والله آآآآآآآآسفة

بس كنت طالعة

جايك البارت الخامس ... أبشري

أم وليد · 16-Nov-2007, 08:02 PM

اقتباس:

المشاركة الأصلية كتبت بواسطة *ميار*

الله يخليك
ماتحرقي أعصابي
يلي كملي وفي النهايه حيكووون هناك ردود حلللللللووووووووووووووووووووه

أبشري

حــــــاااااااااااضررر يالغالية

أم وليد · 16-Nov-2007, 08:04 PM

البارت الخامس

مشاعل بدت تحس احاسيس غريبه اول مره تحس فيها تجاه اي شخص ,, تعرفت على شباب
كثير ارتاحت لبعضهم,, والبعض كرهتهم,,, يمكن بعضهم حبوها بصدق,, واكيد البعض كانوا
يكذبوا عليها ,,, من ناحيتها ما كانت تعتبر المكالمات غير تسليه وتضيع وقت ومايهمها اذا
فيه شخص يحبها وهي تخدعه ,, المهم انها تتسلى ,,, وماهمها ايش تترك من اثر في حياه الشاب
الي تكلمه ,,, بس بعد ماطلع طلال بحياتها ,,, حست باحاسيس مشوشه ماتعرف هي حقد والاتملك
يمكن علشان ماحسسها انه يبيها وهذي اول مره واحد يطنشها,, حست المفروض تتملكه,, بس
الكلام الي قالته لحسين مايدل الا على (حب)
مشاعل" انا لازم مااشغل نفسي به,,, اهم ماعندي الحين اني اركز على دراستي مابي احمل مواد
لان ورانا سفره ومابي ابوي يحرمني منها ,, اما موضوع طلال راح اخليه للايام ,, وهي كفيله
انها تنسيني واحد اسمه طلال "
اول ماقالت هالكلمه حست الم في قلبها ,, هنا طرا على بال مشاعل الف سؤال وسؤال ليش
لما افكر اني انساه احس اني مقدر ,,, نزلت دمعه من عينها ,,, كانت خايفه من الي يصير لها
خافت من تطور مشاعرها بهالسرعه
فتحت المسجل يمكن تقدر تنسى طلال ,,, اشتغلت اغنيه اليسا (حكايتي معاك ) طرى على بالها طلال
وبدت انغام الموسيقى تملى الغرفه وحست بالحنين والشوق لطلال مع انغام هالاغنيه الرومنسيه
وبدت اليسا تغني ,, بس مشاعل حست انها هي اللي تغني لطلال لانها حست الكلمات كانها
تطلع من قلبها
((في اول الحكايات حكايتي معاك ,,,بقى لي زمان واخدني هواك,, وجوى في قلبي ليك ايام مابتتنسيش))
تذكرت اول مره شافت طلال وش الاحاسيس الي حست فيها صح انها كانت مجرد اعجاب بس شلون الحين بدت تطور
وهم مابينهم شي شلون لو صار شي ايش راح يصير لها
((واخر الحكايات حكايتي معاك خلاص حبيت وانا اتحبيت وعايشه معاك كاني اول مره اعيش))
تخيلت نفسها في الزفه تنزف في يوم عرسها على طلال
يالله قديش هالاحساس حلو ان طلال يكون لها لوحدها وهي له وماتفكر ابد بغيره يكون فارسها وهي ان شاء الله تكون جاريته المهم تكون معاه
غمضت عيونها وهي تستمتع بنغمات الموسيقى وقطع عليها صوت الباب
مشاعل: مين
الخدامه: مدام يور موبايل
مشاعل: مشاعل تذكرت انها لما رجعت من برا تذكرت انها نست موبايلها تحت بالصاله
فتحت لها الباب واخذت الموبايل ,,, شافت الاتصالات ومن بينها رقم اخوها مشعل ,,
غريبه مشعل ايش يبي بهالوقت,, اتصل عليه
مشاعل : الو
مشعل : هلا ميشو
مشاعل: هلا والله ,,و اخيرا تذكرت ان عندك اخت
مشعل : لا انا كنت فاقد الذاكره ,, المهم تعالي الحين الحقيني
مشاعل وبان الخوف في صوتها: مشعل ليش ايش صار خالتي فيها شي؟؟
مشعل : خالتك ,, لاحبيبتي انا الي فيني ,, خالتك بتذبحني تعالي بسرعه
مشاعل: ههههههههه اوكي جايه ,, الله يعنين على مشاكلكم,, مدري بدوني شلون تمشون حياتكم
مشعل : عن الهذره تعالي بس
مشاعل: يله جايه باي
مشعل : باي
نزلت مشاعل من غرفتها لقت بالصاله ام سلطان جالسه لوحدها ,, غريبه مو طالعه اليوم
الاربعاء ومو من عادتها تجلس بالبيت لانها كل اربعاء تروح لاهلها
مشاعل: السلام عليكم
ام سلطان:.............
مشاعل: عليكم السلام
ام سلطان: ...............
مشاعل: ترى رد السلام واجب ,, بس علشان اعلمك,, بس براحتك اذا ماتبي تردي
ام سلطان: غريبه نزلتي من قوقعتك ,,, اكيد بتطلعي ,, لانك يابرا يابغرفتك
مشاعل: لا بروح للناس الي يحبوني وانا احبهم
ام سلطان تطالع مشاعل بحقد: كفوك
مشاعل: تصدقين اشتقت لخالتي ام مشعل ,,, اليوم الي مااشوفها فيه مااعده من عمري
ام سلطان: الله يقصر عمرك انتي وياها ان شاء الله
مشاعل: انتي قبلنا ان شاء الله, بعدين تعالي ليش مارحتي لاهلك ,,, ههههه ولامايبونك
ام سلطان: تخسين ,,, ومالك شغل اروح والا ماروح
مشاعل: لا قلت اذا تبين احد يونسك ,,, ممكن انادي الخدامات يسولفوا معك لاني مايشرفني اسولف معاك
ام سلطان: وانا بعد مايشرفني ,,, لاني ماحب اسولف مع بنات منحرفات
مشاعل عصبت منها ايش قصدها بمنحرفه بس سوت نفسها انها مو مهمته: طيب يامؤدبه ياام وجهين باي
ام سلطان: الله لايسلم منك مغز ابره
مشاعل: ايه ام سوسو نسيت اقول لك تبين اقول لخالتي حبيبتي ام مشعل شي ,,, يعني انك مثلا تكرهيها ,,, او تغاري منها ,,, لان الناس يحبوها اكثر منك
هههههههههه تصدقين اني ارحمك احيانا ,,, فيه ناس يعزموا ام مشعل وانتي لا تدري ليه,,,
لان محد يحبك هههههههههههه
ام سلطان: صدقيني مايهموني هالناس لانهم مو من مستواي
مشاعل: هههههههههه مو من مستواك حلوه هذي,,, ليش انتي نسيتي نفسك قبل تتزوجي ابوي ,, كنت حافيه منتفه ,,, وابوي الي رزك
ام سلطان: تخسين ,, انا من يومي وانا معززره مكرمه في بيت اهلي
مشاعل: هههههههههههههه ,, لاتكذبي علي انا عارفتك زين وفاهمتك اكثر من نفسك,, يالله بس خالتي ام مشعل بنت ناس ومو مشفوحه مثلك ,, ماشالله متعوده على العز قبل ما تتزوج ابوي
ام سلطان انقهرت وحقدت على مشاعل الي دايما تذكرها بعيشتها ببيت اهلها وتعايرها بفقرها: هذا انتي بنت العز وماتربيتي ,, ايش فادتك فلوسك
مشاعل: اذا تعتبريني ماتربيت فانتي ماتسبيني تسبي ابوي ,,, وماودك يدخل ويسمع كلامك
ام سلطان: تهدديني ,, تدري لو ابوك سمع كلامك لي صدقيني ماراح يصير لك خير
مشاعل: تدري يله بس انا بروح لحبيبتي ام مشعل ,, بصراحه مابي اضيع دقيقه من عمري معك
وطلعت ماخلت ام سلطان حتى ترد
كان بيت ام مشعل وبيت ام سلطان فلتين بجنب بعض مايفصل بينهم شي وكانت ميشو لما تبي تروح لبيت ام مشعل
مايحتاج تلبس عبايه لان مافيه احد برا الي السواقين وهي مو متعوده تتغطى عن السواقين
دخلت مشاعل بيت ام مشعل وسمعت صراخ مشعل
مشاعل: السلام عليكم
ام مشعل ومشعل: عليكم السلام
مشاعل: شفيكم اصواتكم واصله اخر الشارع
مشعل: الحقيني ميشو محد يقدر يساعدني الا انتي
مشاعل: ايش صاير
مشعل: امي تبي تزوجني
مشاعل: هههههههههههه بس والله قلت لايكون احد مات بس
مشعل: ايه امي تبي تموت العزوبيه ,,, وهذا مايكفيك
مشاعل: هههههههههههههه ,, مشعل لاتبالغ
ام مشعل: قولي له ذبحني ,, الي بعمره تزوجوا وجابوا عيال ,, مشعل ابي اشوف عيالك قبل اموت
مشاعل: الله يطول عمرك ان شاء الله وتشوفي عيال عياله

أم وليد · 16-Nov-2007, 08:05 PM

مشعل: يمه ايش عرفك يمكن اكون عقيم
ام مشعل: اعوذ بالله فال الله ولافالك
مشاعل: طيب مشعل انا عندي لك حل
مشعل : تكفين الحقيني به
مشاعل: تزوج زواج مسيار هههههههههههههه
ام مشعل: مشاعل انهبلتي,, لاتحطين الفكره براسه ,, وش مسياره ,, نبيه يعرس عرس المسلمين
مشاعل: هههههههههههه ,, هذا الحل الي يرضي كل الاطراف
مشعل: والله ماعندي مانع ,, بس انتي الي تخطبين لي
مشاعل: ههههههههههه ,, لا والله تفشلني بعد مابقى الا هذي اخوي يتزوج مسيار,, طيب مشعل خلني ادور لك بنت الحلال
واذا ماعجبتك خلاص لاتتزوج,, ايش قلت
مشعل: اوكي تخيلوا اني شفتها وماعجبتني ... خلاص انتهت المشكله
ام مشعل: مشيعل ,,, انت في بالك بنت قول لي وانا اخطبها لك ,,, ان كانت بنت ناس ومتربيه ماعندي مانع
مشعل: ايه يمه ودي اتزوج وحده رقاصه ,, واذا ماخطبتوها لي ماراح اتزوج
مشاعل: ههههههههههههههههه مين لاتكون فيفي عبده
ام مشعل: هو حرمه واسمها فيصل
مشاعل ومشعل استغربوا ايش جاب طاري فيصل
مشاعل: يمه ايش دخل فيصل في فيفي عبده
ام مشعل: مو فيفي دلع فيصل ,, انتي تنادين اخوك فيصل فيفي
مشاعل ومشعل: هههههههههههههههههههه
مشعل: لايمه هذي فيفي عبده وحده مزيونه يمه وترقص عند الرجاجيل الله لايخزينا ,, بس يمه تراها عجيز تصلح لك ,, يمكن تعلمك الرقص ,, تصيرين ترقصين عند ابوي ,, وتدلعينه
مشاعل: هههههههههههههههههههههههههههههه ,, لالا مقدر اتخيل خالتي ترقص
مشعل: ههههههههههههههههههههههههههه, لا وتخيلها تهز خصرها بالشيله الي لابستها
مشاعل: ههههههههههههههههههههههههههههههههه
ام مشعل: وجعن يوجعكم ,,, انهبلت ارقص انا عقب هالعمر
مشعل: اي عمر توك شباب ,,, انا لو القى وحده ربع جمالك لاتزوج على طول
مشاعل: ايه خالتي ماشلله عليك ,, بس ناقصه شويه ميك اب ,,, ايش رايك نروح للصالون اليوم ,, والله لاخلي ابوي يسعبل لما يشوفك
ام مشعل ابتسمت بخجل: انهبلتي انتي مير يامشاعل ,,, الحين احنا نتكلم عن مشعل ,,, وقلبتوا السالفه علي
مشاعل تبي تنقذ مشعل: هاه خالتي ترا بكره بحجز لك ,,, ونروح انا وياك ومنها ابوي عندك بكره ,,, خليه ينهبل
ام مشعل من الحيا ماقدرت قامت :الشرهه مو عليكم ,, على الي يجلس معكم
مشاعل ومشعل: ههههههههههههههه
مشاعل: مشعل ,,انا حبيت اصرف خالتي ابي اكلمك بجديه شوي
مشعل: احلى ياجديه
مشاعل: مشعل لاتاخذ الامور كلها مزح ,, مشعل انت كبرت ولازم تتزوج ,,, مشعل لازم تستقر
مشعل: يالله ميشو,, جتنا امي الثانيه
مشاعل:صدقني لو احنا مانحبك ماكان اهتمينا اذا تزوجت ولا لا
مشعل: مشكورين بس انا مرتاح كذا
مشاعل:طيب اسمع انا عارفه انك خايف من خالتي تخطب لك وحده شينه وتتوهق ,,, شرايك تخلي هالموضوع
علي,, انا ادور لك وحده فيها كل المواصفات الي تبيها,, ايش قلت
مشعل: لالا فكينا صاحباتك بزرات انا ابي وحده اصغر مني ب5 سنوات اقصى حد مابي
بزر اربيها من جديد
مشاعل: مشيعل ايش قصدك انا بزر
مشعل: يعني
مشاعل: طيب مشكور بس لاتخاف ماراح ازعل ,,, بخلي الزعل بعدين لما توافق
مشعل: طيب اسمعي انا موافق تخطبين لي بس بشرط
مشاعل:اشرط وتدلل
مشعل: يؤؤؤ لهدرجه متحمسه,, والله شكلك تبي تفتكين مني
مشاعل: اف اخيرا فهمت ههههههههه
مشعل: هههههه طيب شكرا
مشاعل:ماقلت ايش الشرط
مشعل: ماتخطبين لي لحد ماشوف صوره البنت ,, مابي اروح اخطبها بعدين اشوفها وماتعجبني ,, بعدين تتحطم البنت
مشاعل: والله الثقه ايش عرفك يمكن انت ماتعجبها
مشعل: لا حبيبتي واثق الخطوه يمشي ملكا
مشاعل: هههههههههه طيب ياملك ,,, خلاص الاسبوع هذا ان شاء الله تكون عندك الصور
مشعل: صور؟؟ انا قلت ابي وحده ماقلت ابي 4
مشاعل: يمكن لما تشوف البنات تغير رايك وتطق لك 4 مره وحده ههههههههه
مشعل: والله مو شينه
مشاعل: ههههههههههههههههه
مشعل: بس زي ماقل لك ابي وحده ما تقل عن 25
مشاعل:ان شاء الله اوامر ثانيه
مشعل: لا الشكل مايهم ,,, اهم شي تكون دينه ,,, وبنت ناس ومتربيه,, اممم بس مو تجبين لي وحده مقشع
مشاعل:يعني ماتثق في ذوقي؟؟؟
مشعل: بصراحه لا
مشاعل: مشعلوه ترى خذت وجه تلاحظ
مشعل: لاوالله هذا وجهي من زمان ,,, لاتتبلين
مشاعل:هههههههههههههههههههه
مشعل: ههههههههههههههههه
دخل سعود
سعود: ايش عندكم تضحكون
مشعل: ياخي سلم اول
سعود : السلام عليكم
مشاعل:عليكم السلام
مشعل: عليكم السلام
مشاعل:سعود بارك لمشعل بيتزوج
سعود والفرحه شقه وجهه: لووووووووووووووووووووووووووووليش ,,, الف الف مبروك بتطس من وجهي وتفتح لي المجال اخيرا
مشاعل:هههههههههههه لابس عنده شروط ,,, ادع ربك اننا نلقى له وحده تنفع لي والا قول ياسعود على الهنوف السلام هههههههه
سعود: فاله الله ولافالك ,,, ايش المواصفات الي تبيها طال عمرك علشان اقول الهنوف تدور لك
مشعل: لا شكرا انا عندي سكرتيرتي ميشو,,, بصراحه مااثق في خويتك
سعود: مالت عليك لك الشرف انها تدور لك ,, بس ماتستاهل
مشعل: عاد شوف انا قلت لميشو دورو على اقل من مهلكم ,,, ايش ورانا
سعود: لاااااااااااااا ميشو يرحم والديك ,, عجلي ,,, ترى الهنوف ذبحتني كل يوم واحد جاي يخطبها وتهددني اذا ماجيت
بتتزوج ,,, تكفين خلصينا من هالدب,, تراه واقف لي مثل العظم بالبلعوم
مشاعل:هههههههههههه وانا اقول ليش صوتك متغير هاليومين من هالعظم الي ناشب
سعود: هاهاها بايخه
مشاعل : ياعمري يامشعل ,, احسك شخص غير مرغوب فيه
مشعل: الشكوى لله تجي ان شاء الله ام سامي وتدلعني
مشاعل وسعود صرخوا صرخه وحده: سااااااااااااامي
مشعل: بسم الله ايش فيكم ايه سامي,,, ولدي ان شاء الله بسميه سامي ,,,اذا مو عاجبكم الاسم خلاص هونا من العرس
مشاعل: ايه هون احسن لك,,, اصلا استحي اقول ولد اختي اسمه سامي
سعود: لالا يرحم والديك خليه يسميه ياشيخه مو سامي ان شاء الله جربان بس يخلصنا يتزوج
مشعل: ايش قصدك تبي الناس ينادوني يابو جربان
مشاعل: ههههههههههههه , تصدق لايق عليك , خاصه هالحبوب الي طلعت بوجهك ,, شكلها حبوب شياب لان ماتوقع حبوب الشباب تطلع فيك شيبت عليها ههههههه
مشعل: ايه والله ميشو مدري شفيني طالع لي حبوب هالايام ,,, لازم اعالج اخاف ام سامي ترفضني اذا شافتها
سعود: هي بس على الحبوب ,,,, الله يستر ماتردك بس,, ميشو دوري له وحده عمياء يمكن ترضى فيه
مشعل: ماتدري ان العمياء احاسيسها تكون اقوى لانها تعوض عن حاسه البصر يعني مثلا حاسه الشم تكون اقوى
واخاف تشم ريحتي ترفضني
سعود: لاتخاف اذا رحت تشوفها انا الي بحممك
مشاعل ومشعل :هههههههههههههههههههههههه
---------------------------------------------------------------------------------

-----

أم وليد · 16-Nov-2007, 08:07 PM

يوم السبت كانت واعده اخوانها تمشيهم ,,,,وطلعت معاهم ,,, ومشتهم وودتهم للملاهي وعشتهم
ورجعتهم للبيت كانت الساعه وقتها 11
في الصاله كانت ام سلطان جالسه
ام سلطان: خير ان شاء الله مرجعه عيالي 11 ماتدرين انهم عندهم مدارس والى تحسبين عيالي
ماوراهم احد مثلك لاحسيب ولارقيب,,, ترى انا عايشه ما مت اذا مت سوي الي تبين,,, والا
خلاص امك ماتت تحسبين الناس مثلك ؟؟؟
مشاعل تذكرت امها وحست شلون هي وحيده بدونها ,,, صح ان علاقتها بام سلطان مو حلوه
بس جرحها ان ام سلطان تعايرها بموت امها
طلعت غرفتها وهي تبكي
توضت وصلت ودعت من قلبها على ام سلطان ودعت لامها ان الله يغفر لها ويسكنها الجنه
حست بوحده ماحست فيها قبل ,,, "ياليتك يمه معاي ,, يمه انا محتاجه لك,,, صح ان ام مشعل
ماتقصر معاي بس محد يقدر يعوضني عنك,, الله يغفر لك"
---------------------------------------------------------------------------
الاختبارات مابقى عليها الا 3 اسابيع وتنتهي سنه من الدراسه
مشاعل كانت في المستوى الرابع يعني كذا تكون قطعت نص المشوار مابقى الا اربع مستويات
وتفتك من هالجامعه ,, واكيد ماراح تشتغل ,, ابوها ماهو مقصر عليها,, بس هي هوايتها الرسم
كانت تفكر تدخل في معارض ,, وتعرض لوحاتها ,, نفسها تكون رسامه مشهوره ,, كانت الفن يجري
بدمها ,,, حتى ان ابوها مصمم لها غرفه بالبيت خاصه للرسم ,,, ووقت الفراغ تروح ترسم
كانت جالسه بغرفتها تتصفح مجله فواصل ,,, دق موبايلها
مشاعل: الو
ساره: اهلين
مشاعل: هلا حبيبتي سارونه كيفك؟
ساره: تمام انتي كيفك؟؟
مشاعل: تمام
ساره: وينك اليوم بالجامعه دورتك قالوا انك طلعتي وموبايلك كان مقفل اكيد متمشكله مع سلمان ع شان كذا مقفله موبايلك
مشاعل: ههههههههه , قديمه انتي اي سلمان
ساره: يالله والله انك نذله ,, تعرفتي على احد وماقلتي لي
مشاعل: لالا ماتعرفت لاتخافي,, اصلا الايام هذي مالي خلق اكلم احد لاسلمان ولاغيره
ساره: ليه مشاعل فيه شي ؟؟؟ صار لك شي بالبيت؟؟؟
مشاعل: لا والله ماصار شي .. بس بيني وبينك مليت من المكالمات .. وبعدين الاختبارت جايه
ساره: علينا الاختبارات ؟؟؟ قولي بس ايش فيك؟؟؟
مشاعل: والله ياسارونه مدري احس مانبسط لما اكلم ,, مو زي اول,,, احس اطفش بسرعه,, يمكن مليت من الي عندي
ساره: طيب ايش رايك نطلع اليوم نغير جو من زمان ماطلعنا ,,, مسويه انتي هالايام دافوره
مشاعل: هههههههههه ,, اي دافوره ,, انا خايفه احمل ماده ,, والله ان يذبحني ابوي
ساره: لا ان شاء الله ماينخاف عليك ماشالله
مشاعل: الله يسمع منك
ساره: قلبي اليوم بطلع انا وحنان,, شرايك تطلعي معانا؟؟
مشاعل: وين بتروحوا؟؟؟
ساره: والله مدري ,,, تعالي معانا غيري جو البيت ميشو بليز لاترديني
مشاعل: متى راح تطلعوا؟؟؟
ساره: تقريبا 7 ,, خلاص ميشو انتي موافقه,, بمرك 6ونص باي
مشاعل: اسمعي ط..
طوط طوط طوط
مشاعل"الوصخه قفلت بوجهي"
رجعت دقت عليها لقتها مقفله موبايلها
مشاعل" يله خليني اغير جو البيت شوي لي فتره ماطلعت"
نزلت مشاعل لغرفه الرسم تحاول تضيع وقت لما تمرها ساره
من طبعها مشاعل لما ترسم تحب تشغل موسيقى هاديه وتبدا ترسم احتارت ايش ترسم
شغلت الاغنيه الي تحبها والي تذكرها بطلال
فكرت ليش ماارسم طلال صحيح اني ماتذكر ملامحه بدقه بس بحاول وبدت ترسم وترسم
وهي حاسه بالحنين له صورته قدامها والاغنيه الي تحبها تجمعت الدموع بعينها وقفت رسم
وجلست على اقرب كرسي وغمضت عيونها تخيلت كيف بتكون حياتها مع طلال لو تزوجوا
تخيلت ان عندها 4 توائم من طلال تخيلت مشهد
مشاعل: يالله طلال اولادك ذبحوني ... يعني انا امهم وانت مو ابوهم.. شيل واحد معاي
طلال: لا حبيبتي انتي امهم,, انتي الي لازم تشيليهم,, انا مسؤول بس عن اكلهم,,, والا نسيتي
اني الرجال
مشاعل: انت اناني
طلال: وانتي طماعه ,, تبيني اخذ اكثر من دور بالحياه ,, دور الام والاب
مشاعل: اوووووووه طلال الحليب خلص روح جيب حليب
طلال: ارسلي السواق انا اطالع مباراه
مشاعل: يوووووه انت زوجي والا السواق
طلال: السواق زوجك هاه.. انا اوريك
ولحقها وهي تركض في البيت ... دخلت غرفتها وسكرت الباب وصار يضرب الباب
وفجاءه قامت من احلام اليقظه الي كانت عايشه فيها على صوت طق خيف ع الباب
مشاعل: مين
فيصل: انا ميشو افتحي شوفي سلطان ضربني
----------------------------------------------------------------------------------
مرتها ساره الساعه 7
نزلت مشاعل ولما طلعت تفاجاءت ان السياره مو سياره ساره كانوا طالعين بسياره حنان
مشاعل: السلام عليكم
حنان وساره: عليكم السلام
ساره: ميشو ايش هالورقه الي معاك
مشاعل: ماراح اخليك تشوفيها هنا بالسياره ,, خلونا ننزل اي كوفي نجلس فيه واخليك تشوفيها
حنان: لا بنات خلونا ندور
مشاعل: بنات والله مصدعه مالي خلق ادور ,, خلونا نروح كوفي وبعد صلاه العشاء ادق على سواقي
يمرني وانتوا اطلعوا تمشوا
حنان: اوكي صادقه اصلا المغرب ماتكون الشوارع زحمه,, طيب وين تبوا نروح اي كوفي
مشاعل: ايش رايكم في تي قاردن
ساره: يله اي مكان متحمسه ابي اشوف الي معاك.. طيب قربي لي ايش فيها
مشاعل : بلا لقافه ,, بس انا متاكده انك بتنصدمي
ووصلوا الكوفي ونزلوا
ساره: يله جلسنا عطيني الي معاك بسرعه مقدر استنى
مشاعل: لا اول خلينا نطلب
حنان: يوووووووووه ميشو بلا دلع
مشاعل: هههههههههه طيب طيب لا تاكلوني
فتحت مشاعل الورقه الي معاها كانت كبيره ومطويه ورابطتها بشريطه بينك ,, فكت الشريطه
وعلى طول طاحت الرسمه
حنان وساره: اللللللللللللللللللللللللللللللللللللللللللللله
حنان: من هالحلو,, لايكون اخوك؟؟
ساره منصدمه: طلال
مشاعل: هاه شرايك ؟؟؟ نفس شكله؟؟؟
ساره: بصراحه احس انه قدامي
حنان: تكلموا مين طلال ؟؟ اخوك ميشو؟؟؟
مشاعل: امممم يعني
حنان: شلون يعني يااخوك والا لا
مشاعل: يعني واحد يقرب لي
حنان: يالله مره يجنن
ساره: اذكري الله
حنان: ماشالله بس ميشو احسه كانه ممثل اجنبي
مشاعل: ايه هو صناعه اسبانيه تركيب سعودي ههههههههههههههههه
ساره وحنان : هههههههههههههههههههههه
ساره: شلون رسمتيه ؟؟ عندك صورته؟؟؟
مشاعل: لا بس انتي عارفتني شاطره بالرسم بالذاكره.. يعني حاولت اتذكر شكله ,, وهذا الي طلع معاي
ساره: ميشو لازم تشوفها الدكتوره بالجامعه والله على طول بتنجحك
مشاعل:هههههههههههههههههههههه .. علشان رسمتي والا الي جوا الرسمه
ساره: بصراحه كلهم ههههههههههههههههه
حنان: اقول متزوج؟؟؟
مشاعل عصبت: خير ايش دخلك لايكون بس مخططه عليه
ساره تغمز لحنان: حنونه لاتجين ممتلكات ميشو ,,, تراها مثل القطوه ماتحب الي يجي عيالها
واذا احد فكر يجي عيالها تاكل عيالها ولاتخلي احد يلمسهم
حنان: خلاص هونا ماله داعي بكره يموت الولد هههههههههههههه
ساره ومشاعل: ههههههههههههههههههههه
بعد ماخلصوا قرروا حنان وساره يكملوا وناستهم بالدوران اما ميشو اتصلت على سواقها
يمرها بالكوفي ,,, مالها خلق تدور ,, والحاله هذي مو جديده عند مشاعل تجيها فتره تكره الطلعات
بس ترجع بعدين لحالتها,, وهالشي ماخلى ساره وحنان يستغربوا من تصرفها
بس مشاعل كانت تتحاشى تطلع ماتبي تقابل شخص كانت خايفه انها لما تشوفه تضعف ,, وخاصه انها
حست بتطور كبير في مشاعرها تجاهه,, وخايفه ماتقدر تتحكم في نفسها ,,, يكفي انها للحين قويه
وقادره تكبت رغباتها,, ولازم تستمر لحد ماتنساه
مشاعل كانت في الطريق لبيتها غرقانه في بحر من الافكار
اما ساره وحنان فهم غرقانين في (التميلح)
----------------------------------------------------------------------------------------

أم وليد · 16-Nov-2007, 08:09 PM

وصلت مشاعل للبيت وكانت ام سلطان وابوها جالسين بالصاله قررت تسلم على ابوها لان
مالها خلق تلبس قناع الطيبه قدام ابوها ,, ملها خلق المجاملات ,, والكلمات الحب الي تقولها لها ام
سلطان سلمت على ابوها وباست راسه وسلمت على ام سلطان واعتذرت منهم لان عندها مذاكره
دخلت غرفتها ,,, غيرت ملابسها ,,, وفتحت التلفزيون ,,, كان فيه فلم (فورتي ير اولد فيرجن)
الفلم كان كوميدي عن رجل اعزب عمره 40 يخجل من النساء ,,, واصحابه يحاولوا يطلعوه من عزلته
ضحكت من قلب ,, حست ان اخوها فهد عنده نفس المشكله
قطع انسجامها رنه الموبايل
مشاعل: هلا حسين
حسين بحزن: هلا ميشو
مشاعل: حسونه,, ايش فيه صوتك؟؟؟ خرعتني
حسين: ميشو ابي فزعتك
مشاعل: من عيوني ,, بس ايش فيك؟؟؟
حسين: ميشو انا في ورطه ومحد يقدر يساعدني الاانتي... ميشو انا تعرفت على وحده من
3 سنين ,,, ومدري شصار لها يرد اخوها على موبايلها
مشاعل: ههههههههههههه, احسن
حسين: ميشو لاتضحكي .. احر ماعندي ابرد ماعندك
مشاعل: طيب واذا ,,,,, يمكن اخوها موبايله مفصول هههههههههههه
حسين: يووووووه ميشو,, لالا مره وانا اكلمها قفلت بسرعه ومن بعدها واخوها يرد
مشاعل: يعني المطلوب؟؟؟
حسين: ابيك تدقين على موبايلها وتطلبيها
مشاعل: طيب هات رقمها ,, بس لحظه اذا كلمتني ايش اقول لها
حسين: قولي لها انك مشاعل ال.. هي على طول بتعرف انك من طرفي
مشاعل: طيب وبعدين ايش راح تستفيد
حسين: اعرف ايش فيها
مشاعل: طيب عطني رقمها
دقت ميشو على البنت
مشاعل: الو
: نعم
مشاعل: السلام عليكم
: عليكم السلام,, من انتي
مشاعل: انا مشاعل صاحبه العنود,, مو هذا موبايلها
: لا,, غلطانه
مشاعل: غريبه ,, متاكده ان هذا رقمها ,, مين انت
: انا واحد
((شكل الولد مغزلجي))
مشاعل بدلع: تصدق حسبتك ثنين ,, اخلص بس بتنادي البنت والا لا؟؟؟
: ليش مو راضيه تصدقين ان هذا مو رقم العنود,, بس اصير العنود لعيونك
مشاعل: مشالله عليك, ايش تشرب ع الصبح دمك خفيف
: حليب نياق
مشاعل: ااااااااااااااااااااااه يامصلك,,, اقول بتعطيني العنود والا اقفل؟؟؟
: قلت لك انا العنود
مشاعل: هاي العنود كيفك؟؟؟
: تمام ,, هلا والله بصوت الغزال
مشاعل: ليش انت سامع صوت الغزال؟؟؟احس حدك صوت الضب
: اكيد عندنا مزرعه كلها غزلان
مشاعل: ايه عاد انتم شكلكم غزلانكم شغالات هههههههههههههههههههههه
: هههههههههههه ,, مقبوله ممكن نتعرف ياقمر
مشاعل: اقول شوي واطلبك طيب
: لاتطولين ياقمر
طوط طوط
مشاعل ماقدرت تتحمل مصالته
دقت على حسين
مشاعل: حسينوه ,,, ايش هالي مخليني اكلمه,,,, مو طبيعي
حسين:ليش؟؟؟
مشاعل:جالس يغازل,,, حتى ماعنده اسلوب
حسين: طيب مانادى العنود
مشاعل:لا يقول هو العنود
حسين: يالله اكيد صار لها شي ,, اجل ليش اخذ موبايلها
مشاعل:والله مدري عنك,,, بس انا الي علي سويته
حسين:ميشو تكفين طلبتك
مشاعل:ايش؟؟؟
حسين:كلميه كم يوم يمكن تقدري تعرفي ايش صار
مشاعل:مستحيل هذا لو اكلمه 5 دقايق رجعت كل اكلي ,,,, لالا مستحيل
حسين: تكفين طلبتك ,,, لو انتي طالبه مني شي وربي ماردك,,, تكفين ميشو ماعمري طلبت منك شي
مشاعل: طيب طيب لاتبكي,,,, بس اسمع هي مكالمه وحده ولو ماقال لي شي ماراح ادق
حسين: طيب انتي بس كلميه
مشاعل: اقول حسين يقول عندهم مزرعه كلها غزلان جد؟.؟؟؟
حسين:ههههههههههههه والله عندهم حوش كله غنم هههههههههه
مشاعل:هههههههههههههههههههه
-----------------------------------------------------------------------------------
مشاعل (اضطرت)تكلم اخو العنود (حاتم)على امل تعرف اي شي عن العنود علشان اعز
صديق لها حسين ماكانت تبي حسين يزعل عليها لان له معزه ,,, تغليه مثل اخوانها,,, ويكفي
انه متفهم,,,وهو الانسان الوحيد الي تقدر تحكي له كل شي يخصها,,,, ولاممكن تخبي عنه
اي شي,,, حتى هو تعرف عنه اشياء مايعرفوها اخوياه,,,, كانوا اكثر من اخوان,,, بس
مسكله حسين فالها مع مشاعل يعني مخليها تكلم وتطلع ولاعمره نصحها ,, يمكن لانه مراهق
وعنده كل شي (قدام) كان عمره 18,,, اصغر من مشاعل بسنتين
قفلت مشاعل من حاتم الي استمرت مكالمته 45 دقيقه ,, بس حست انها 45 سنه
استعدت للنوم وقفلت الانوار والابجوره ,,, طبعا هي متعوده قبل تنام تخلي موبايلها على
السايلنت ,, كانت الغرفه ظلام ,,,, حست بنور ياشر في غرفتها,,, طالعت موبايلها لقت فيه
رساله وصلتها فتحت الرساله لقتها من ساره وكتبت فيها
"ميشو انا سويت حاجه مدري هي غلط او صح بس تاكدي انا ما سويتها الا لاني احبك"
استغربت مشاعل" مجنونه ساره ايش فيها اكيد غلطانه بالرساله كانت بترسلها لاحد وبالغلط
ارسلتها لي ,,, بس لا اسمي مكتوب فيها؟؟؟؟"
جتها رساله ثانيه من ساره
"ميشو انا بقفل موبايلي وبكره ماراح اجي للجامعه,,,بصراحه خايفه منك ,,, المهم انتظري اتصال راح يجيك بعد شوي"
مشاعل" انهبلت ,, ايش فيها قامت تخبط بالحكي؟؟؟ بدق عليها اشوف ايش قصتها"
دقت لقت كلامها صدق ,,, ساره قفلت موبايلها
استنت الاتصال الي تحكي عنه ساره ماحد اتصل ,,, رجعت موبايلها على الصوت ,,, وقفلت النور
واستعدت للنوم
مشاعل" سخيفه ياسارونه مسويه بتخوفيني ,,, تشوفين بتروحين مني وين"
جاها مسج
مشاعل" اكيد هذا سويره ,, اف منها ماراح تخليني انام"
فتحت المسج لقته رقم غريب وكان مضمون الرساله
"صباح الخير مشاعل انا اسف اني ازعجك بهالوقت بس حبيت اشكرك على الرسمه بصراحه
روعه تسلم ايدك (طلال)"
يمكن كلمه انصعقت شويه ,, لاشعوريا راحت تركض تدور الرسمه بكل مكان مو لاقيتها
على طول اتصلت على ساره موبايلها مقفل,,, اتصلت على حنان ,,, والحمدلله موبايلها مفتوح
ظل يدق ويدق ومحد يرد
ارسلت رساله لحنان
"لو سمحتي حنان ردي ابيك ضروري"
جتها رساله من حنان
"ميشو انا مالي شغل سارونه هي صاحبه الفكره ,, اذا عندك كلام كلمي سارونه,,,انا كنت
رافضه بس هي اصرت,,, ميشو والله انا مالي شغل"
مشاعل مو فاهمه اي فكره واي خرابيط,,, طلال كيف عرف رقمها,,, وشلون عرف بالرسمه
,,,, لالا سارونه ماتسويها,,,,,,, ووين الرسمه كانت معاها,,,,وايش قصه المسج ,,,, معقوله
طلال؟؟؟؟؟؟؟؟؟؟؟؟
ارسلت مشاعل للرقم الي ارسل لها الرساله
"مين انت؟؟"
ارسل لها مسج
"ليش كم طلال تعرفي ؟؟ وكم طلال رسمتي صورته؟؟؟ شكلهم كثير!!!!"
حست انه مقلب
ارسلت له مسج
"ايش السالفه؟؟؟؟؟؟؟؟؟؟؟؟"
ارسل لها
"ممكن اكلمك لاني مو شاطر بالمسجات؟؟ اذا انتي فاضيه"
هنا مشاعل خافت وحست الموضوع جدي ,,,لو ماكان طلال ماكان تجرأ يقول لها انه بيتصل
اكيد وقتها بتكتشف انه مقلب,, بس الي يرسل المسجات واثق من نفسه
ارسلت له
"انا فاضيه"
ثواني ودق نفس الرقم ,,, كان قلب مشاعل بيوقف من الخوف ,,, معقوله طلال يدق عليها؟؟
ردت عليه
مشاعل بلهفه: الو
طلال:صباح الخير
عرفت انه هو على طول لان محد يملك هالصوت العذب الا طلال الي عذبها
مشاعل بنعومه: صباح النور

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

زفات	دليل الافراح	اكاديميه افراح	تواقيع العرسان	تنسيق ميزانيه الفرح	تولبار افراح	مركز التحميل	اتصل بنا
المتجر النسائي	المتاجر الخاصه	دليل المواقع	العاب افراح	تدريب الالكتروني	الطب البديل	الاسره المسلمه	اعلن معانا
البوم صور افراح	مقالات للعرسان	بطاقات افراح	جوال افراح	المؤثرات الصوتيه	فساتين افراح	كوش أفراح	شبكة افراح

من أروع القصص ((لا تفوتكم )) قصة مشاعل وطلال

الروايات الطويله والمصوره