من أروع القصص ((لا تفوتكم )) قصة مشاعل وطلال

أم وليد · 16-Nov-2007, 08:11 PM

طلال: ليش مانمتي وعندك بكره جامعه؟؟؟
مشاعل: اممممم كنت بنام ,,, بس مسجاتك ماخلتني انام
طلال:..........................
مشاعل: .........................
طلال:......................
مشاعل: بتطول ساكت؟
طلال: وليش انتي ماتحكي؟
مشاعل: انت الي عندك كلام مو انا ,,, ابي اعرف ايش قصه الرسمه؟؟
طلال:يعني ماتعرفي؟؟؟
مشاعل: لا وربي, سارونه ارسلت لي مسج غريب وقفلت موبايلها,, وحنان مو راضيه ترد
طلال بكل ادب: اول حاجه انا اسف اني ازعجك بالهوقت,,, انا ادري ان عندك جامعه الساعه 9
مشاعل انصدمت وقاطعته: ايش عرفك؟؟؟؟
طلال بخبث: مو صعب علي اعرف اي شي عنك
مشاعل ارتبكت طلال يكلمها واول مره بدون مشاكل ,,, وكان صوته هادي
مشاعل: طلال
طلال:سمي
مشاعل: ممكن تحكي ايش صار
طلال: انا ححكي بس انتي تقاطعيني ... اذا وعدتيني انك تسكتي لما اخلص كلامي .. راح اقول لك كل شي
مشاعل بنعومه وكانت فرحانه انها تسمع كلامه : وعد
طلال: اليوم شفت صاحبتك ساره ,,, وبالصدفه كان معاي واحد من الشباب ,,, المهم ان
صاحبتك كلمته وقالت ابي اسلم ,,,,على صاحبك طلال,, وبعد ماسلمت عليها ,, قالت لي معي امانه لك
وابتسم طلال:والامانه كانت الرسمه,,, وكانت خايفه اني اخذها معاي لانها كانت خايفه تفقديها
وطلبت مني ارجعها,, بس بصراحه ماقدرت ارجعها تعرفي لي؟؟؟
مشاعل حست بغصه من الربكه وطلع صوتها مخنوق: ليه؟؟؟؟
طلال: لانها اعجبتني ,,,, بصراحه توني اعرف اني وسيم
مشاعل حست بخيبه امل كانت تتوقع يقول لها لانك انتي رسمتيها
طلال:بصراحه مشالله عليك جد فنانه ,,, بس كيف تذكرتي شكلي ,, وخاصه انك ماشفتني كثير
مشاعل تجرأت: انا مانسيتك من اول يوم شفتك فيه وانت شكلك ماغاب عني ولا لحظه
طلال:..........................
مشاعل:.......................انحرجت من الكلام الي قالته وندمت حست انها تسرعت
طلال: مشاعل شرايك اخليك تنامي علشان تصحي بكره
مشاعل ندمت على كلامها ,, ايش راح يقول عنها: اوكي ,, وانت اكيد عندك دوام؟؟؟
طلال: دوامي الساعه 8
مشاعل: يالله مجنون,, وللحين مانمت ,,,, الساعه 1 ونص
طلال: مو رسمتك مو مخليتني انام
مشاعل بخجل: ليش؟
طلال: مدري بس احس اني مقدر اشيل عيني عنها
مشاعل تضحك: ههههههه لهدرجه معجب بنفسك؟؟
طلال: لا عندي النسخه الاصليه,, الي هي انا ,, بس الرسمه فيها شي حلو غير النسخه الاصليه
مشاعل: ايه انت مو حلو بس انا حاولت لما رسمتك اخفي عيوبك هههههههههههههه
طلال: لالا مو على الحلاوه ,,, يمكن الايد الي رسمتها فيها سحر يخلي الشخص مايقدر يشيل عينه عنها
مشاعل انحرجت وصار وجهها احمر ,, كانت دايما تسمع كلام غزل ومدح بس ماكنت تهتم
بس طلال اي كلمه يقولها تهز مشاعل مهما كانت بسيطه,,, الكلام مو بحلاته ,, لا اكيد بالشخص الي يقوله
مشاعل: .................. ماكانت تقدر ترد اول مره تحس بفرحه مالها حدود كان نفسها تصرخ
طلال ابتسم: فيه ناس خدودهم صارت حمر,,, ناس اول حرف من اسمهم ميشو
لااااااااااااااااا خلاص مشاعل انجنت بعد يدلعها اول مره تحس ان كلمه ميشو تجنن
طلال: خلاص بقفل لايغمى عليك
مشاعل: لا تخاف الشينات مايغمى عليهم
كانت تبي تذكره بالكلام الي قاله لها
طلال: اكيد علشان كذا انا امدحك لانك شينه ,, احاول ارفع معنوياتك
ماحست مشاعل بالزعل من الكلام الي قاله ,,, يمكن علشان هو معاها وهذا يكفيها
طلال: اوكي مشاعل ,,, انا اسف اذا طولت عليك ,,, بس جد انا شاكر لك على الرسمه ,,,واحلام سعيده
اكيد راح تكون احلام سعيده بعد ماسمعت صوتك
مشاعل: لاعادي اصلا انا اسهر كل يوم,,, وبخصوص الرسمه انا اسفه اني رسمتك بدون مااستاذن
طلال: لالا انا متبرع بوجهي ,,, الي يبي يتدرب عليه ماعندي مانع
مشاعل: هههههههههههههههههههههههه
طلال: مشاعل
مشاعل: هلا
طلال: تعرفين ان ضحكتك جنان
مشاعل:.....................((انحرجت وماقدرت ترد))
طلال: مشاعل الساعه متاخره ,,, اذا ماصحيت بكره بدعي عليك
مشاعل: تبيني اصحيك؟؟؟
طلال: لالا شكرا ان شاء الله انتي الي تصحي
مشاعل: لا مو مشكله اذا تبي اصحيك وارجع انام
طلال: لالا انا عندي الي يصحيني ,,, اهم شي انتي اصحي,,,لاتطنشي الجامعه
مشاعل: اوكي تصبح على خير
طلال: وانتي من اهل الخير
مشاعل:باي
طلال: باي
قفلت مشاعل وراحت ركض لغرفة الملابس وقفلتها وصاااااااااارخت باعلي صوتها خافت تصحي اهلها
رجعت لسريرها
" مو قادره اصدق ان طلال داق علي لااااااااااااااااااااااااااااااااااااااااااااااااا ااا,,, ساره وربي احبك
,,, لو انا عارفه ان هالرسمه لها هالتاثير الحلو,, كان رسمته من زمان,,, سارونه خدمتيني خدمه
العمر ,,,, عمري ماراح انسى لك هالموقف,,,,,,,,,,,, بس ايش قصده لما قال عندي الي يصحيني؟؟
اكيد هذي بطته الي يقول عنها؟؟؟؟؟؟؟؟؟؟مو مهم ,,, اهم شي انه كلمني ,,, طيب بيدق بكره,,,
والا بس مجرد شكر على اللوحه وخلاص,,,,,, يالله طلال والله احبك ,, احبك ,, احبك,, من بعد
ماماتت امها مافرحت فرحه قد فرحتها اليوم
-------------------------------------------------------------------------------------
صحت الساعه 7ونص على صوت المنبه لانها تصحى قبل المحاظره بساعه ونص ,, لزوم الكشخه
كانت مره تعبانه,, فيها نوم.,,, اخرت الساعه للساعه 8
مشاعل" ساعه تكفيني البس"
وكملت نومها ,, والساعه 8 دق المنبه
مشاعل" اوووووووووووووووووووه فيني نوم,, بلا جامعه بلا هم"
قفلت المنبه وكملت نومها
-----------------------------------------------------------------------------------
العصر كانت في الصاله تحاول تتصل على ساره الي ذبحتها ماترد ,, اكيد خايفه
مشاعل ارسلت لها مسج
"سارونه ,, من قلبي اشكرك على الي سويته,, سويتي حاجه انا ماكنت بتجرا اسويها
بليز ردي بقول لك ايش صار"
ومثل ماتوقعت ساره دقت علطول
مشاعل:الو
ساره بخوف:هلا
مشاعل:بصراحه انتي بايخه وبزر على هالحركه تدرين انه دق يضحك ويقول مصدقه انك تعرفي ترسمي
ساره مصدومه: احلفي,,, شلون ,, لما اعطيته الرسمه ,,, كان منجن عليها ,, يقول مره تجنن
مشاعل: هذا الي صار ,,, يله ايش تبريرك للي سويتيه,, وين اودي اجهي الحين اكيد كل الناس عرفوا
ساره:ميشو لاتكبرين الموضوع ,,, ترى محد عرف الا هو وصاحبه
مشاعل:لاوحضرتك ,,, شغاله تاخذي ارقام,, حتى خويه اخذتي رقمه
ساره: مين قال لك؟؟؟
مشاعل:مو مهم بس انتي خنتيني
ساره:ميشو قسم بالله ماسويت كذا الي اني حسيت انك منجذبه له ,,, ماودي اشوفك تفكرين فيه
وماقدر اسوي شي
مشاعل:تدرين انك احسن خويه بالدنيا
ساره منصدمه: مو فاهمه الحين انتي زعلانه والى فرحانه
مشاعل: والله انا مو فرحانه الا بطير من الفرحه
ساره: يله انقلعي المفروض تشكريني مو تهزئيني
مشاعل:اووووووووه سارونه شسوي احبك.... تدري امس جلسنا نسولف ربع ساعه
ساره: مشالله حاسبتها
مشاعل:شلون ماتبيني احسبها
ساره:هاه قولي ايش حكيتوا فيه وايش صار
مشاعل قالت لساره كل شي
مشاعل:الاتعالي انتي الي احكي لي شلون عطيته الصوره
ساره: ابد امس لما طلعت مع حنونه بالصدفه شفته وتعرفين خويتك شويت تميلح عند خويه
رقمني ودقيت علطول وقلت له يالله عطني طلال بسلم عليه ,, خويه خاف ايش عرفني بطلال
قلت لالا خوي وحده من البنات
مشاعل:هههههههههههههههههههههههه
ساره:المهم ,,, وكلمته وسلمت عليه,, هو كان منجن ,, ماعرفني اول شي لاننا بسياره حنونه
,,, قال لي مين انتي,, قلت انا خويه مشاعل,, قال مشاعل مين,,, قلت له تبي كلمه السر,,,
تخيلي ايش قلت له كلمه السر
مشاعل:ايش؟؟؟
ساره:ههههههههههههههههههه الكيكه
مشاعل:هههههههههههههههههههههههههههه
ساره:هو مات ضحك,,, قلت عرفتها ,, قال اكيد احد مايعرف ام الشر,,, قلت تراها تسلم عليك
مشاعل:متى قلت لك سلميني عليه
ساره: انتي عاد لاتدققي مره,,, المهم قال الزبده ايش تبي ,,, قلت له عندي لك امانه تدري ايش قال
مشاعل:ايش؟؟؟؟
ساره: قال لا مابي اماناتكم خليها لك ,, قلت والله شي يخصك,, وبالموت وافق ,,واحنا عند الاشاره
عطيته الرسمه ولما فتحها انجن ,, قال لي من وين جبتيها ,, قلت له قول اول مين الي رسمها
انصدم لما قلت له كذا ,,, قلت له عموما هذي لوحه مسروقه من غرفه مشاعل بدون ماتدري
وبليز لاتقول لها شي لانها بتذبحني ,,و انا شفتها قلت لازم تشوفها انت تعرف هذا وجهك,,, وحقوق الوجه محفوظه
اخاف بكره ترفع قضيه ملكيه على صاحبتي,, مات ضحك,, وماصدق انك رسمتيها ,,, بس لما شافني اترجاه مايقول لك شي
.. استغرب ايش الي يخليك ترسمين صورته,, ضحكت وقلت لك انا اعز وحده من صاحباتها ماعمرها
رسمتني ,, وانت رسمتك,, عاد انت شاطر وتفهمها ,, اكيد لك مكان عندها كبير,,, وقتها تعرفي ايش قال لي
مشاعل:ايش ,, والله احس بتجيني سكته قلبيه من كلامك
ساره:سلامتك ,, المهم قال اوكي الموضوع بيني وبينك بس الصوره انا ابيها,, قلت تكفى اذا سالتني ايش راح اقول لها
قال عطيني رقمها وانا استاذن منها ,, هو لما قال عطيني رقمها انا ماصدقت خير وعطيته ,,وبس
مشاعل:سارونه انا خايفه مايدق اليوم
ساره:امممم انتي طيب دقي,, هو بدا ودق ,, انتي عليك الباقي
مشاعل:مجنونه تبيه يقول عني مشفوحه
ساره:والله بكيفك ,, بس لو انا مكانك والله لازعجه ,, تدرين ميشو لما اشوف طلال مااتخيل الا
انك زوجته
مشاعل:الله يخليك لاتعيشيني احلام ,,, اصدقها بعدين واتحطم
----------------------------------------------------------------------------------------
--

أم وليد · 16-Nov-2007, 08:13 PM

طلال كان المغرب طالع من البيت بيمر واحد من اصحابه,, اخذ الموبايل ودق على يزيد خويه
الي رقم ساره صاحبه مشاعل
طلال: هلا يزيد
يزيد: هلا والله اخبارك
طلال:تمام , انت شلونك
يزيد: تمام ,,, شخبار الدوام
طلال: والله ماشي الحمدلله ,, اقول يزيد ماكلمت ساره اليوم
يزيد: الا والله توني مقفل منها
طلال: ماقالت لك شي عن مشاعل
يزيد: لا ,, ليش ماكلمتها
طلال: كلمتها امس بالليل
يزيد: تبي ادق عليها اسالها عنها
طلال: لالا بس ماتدري اذا هم طالعين مع بعض
يزيد: لا ماقالت انها طالعه معها اظن بتطلع مع خويتها الي امس كانت معاها
طلال: غريبه ماراح تطلع مشاعل معهم
يزيد: والله مدري بس ماقالت تبي ادق اشوف مين بيكون معاها
طلال: لالا خلاص بس انت لاتجيب لها سيره اني سالت عن مشاعل
يزيد: ابشر
طلال: يله تامر شي
يزيد: سلامتك
طلال: يزيد تكفى العيال لايدرون اني كلمت مشاعل
يزيد ضحك: لاتشيل هم
طلال: ايه عاد مو تمسكها علي تهددني
يزيد: ههههههههههه كانك تقرا افكاري
طلال: ايش طلعني معاك لو كنت لحالي كان اصرف
يزيد: لو انا مو معك كان البنت ماعبرتك ,, ماطيحها الا رمش عيوني
طلال: زين انك عارف ان احلى مافيك رموشك والا انت مقشع ههههههههههههههههه
يزيد:مقشع بعينك ,,,, يله بس لايكثر ,, ضف وجهك
طلال: ابشر طال عمرك
--------------------------------------------------------------------------------
الساعه 1 وطلال مادق
مشاعل" اكيد متصل يشكرني وانا فسرت الموضوع غلط,, عشت احلام ورديه ,,وتخيلت ان ممكن يكون شي حلو
بيننا ,, ليش مافهمت لما قال لي فيه احد يصحيني ,,, اكيد قصده افهمي ان عندي وحده مابي
اخونها بس انا الغبيه الي مافهمت"
مشى الاسبوع ومشاعل تنتظر طلال الي مافكر حتى يتصل
-------------------------------------------------------------------------------
الاختبارات اسبوعين وتبدا,,, خلاص المحاظرات انتهت وكل البنات يستعدون للاختبارات
مشاعل نظمت وقتها ,, تصحى 5 الفجر وتبدا تذاكر لما 9بالليل وطبعا فيه اوقات استراحه
للفطور والغداء والعشاء,, ابتعدت عن حتى صاحباتها,, ماتبي تحمل مواد لانها كانت خايفه
من ابوها,, صح انه معطيها حريتها,, بس بالدراسه لو حس انها مقصره,, راح يزعل
,,, الاشخاص الثلاثه الي مابعدت عنهم حتى بفترت الاختبارات هم صاحبتها ساره لانها ماتقدر
يمر يوم ماتسمع فيه صوتها ,,, واكيد حسين اللي تغليه مثل ساره,, واكيد حاتم اخو العنود
الي اجبرها حسين انها تكلمه يمكن يقول لها شي عن العنود
---------------------------------------------------------------------------------
كانت مشاعل نازله تفطر بغرفه الاكل والكل طبعا نايم
سمعت احد دخل عليها توقعت انه وحده من الخدامات لان اكيد مافيه احد بيصحى الساعه 8
الصباح سمعت صوت مشعل
مشعل: السلام عليكم
مشاعل :عليكم السلام هلا والله ايش عندك اليوم صاحي ,, ترى اليوم خميس ,, والا تعودت
على القومه ((خافت لما شافت ملامحه,, كان شبه منهار))
مشعل بارتباك: مشاعل حبيبتي ,, ابوي شوي تعبان وبالمستشفى من امس بالليل خفت تعرفي امس وتخافي
مشاعل تصارخ: بابا لااااااااااااا ايش فيه قولي لي يامشعل انك تمزح
مشعل: اذكري الله الوالد مافيه الاالعافيه بس تعرفين السكر مرتفع شوي ,,, وان شاء الله اليوم
والابكره بيطلع
مشاعل: احلف انه بيطلع,, احلف انه مافيه شي,, مشعل تكلم قول انك تكذب
مشعل: يالله بصراحه ندمت اني قلت لك,,, قلت اكيد مشاعل هي العاقله صرتي اجن منهم
مشاعل: اجن منهم؟؟؟ يعني خالاتي كانوا عارفين وانا اخر مين يدري
مشعل: بصراحه مابغيت اصحيك بالليل علشان اقول لك خبر مثل هذا
مشاعل: ليش تعتقدون انه ابوكم ومو ابوي ولا خلاص علشان امي ماتت ,, انا صرت وحده زايده في هالبيت
يكون في علمك يامشعل هذا ابوي مثل ماهو ابوك,,, واذا امي ماتت انا موجوده... وانا اول وحده
المفروض تعرف ,,, انت واخواني عندكم امهات الا انا ,,لو ابوي صار له شي بكون وحيده
مشعل: اعوذ بالله مشاعل ايش صار لك ابوي ان شاء الله بخير,, وبعدين احنا وين رحنا نسيتي اننا اخوانك
مالك حق تقولي هالكلام
مشاعل: بعد عني ,,,اصلا كلكم تكرهوني ,, ابوي وين باي مستشفى
مشعل: مشاعل استهدي بالله والبسي عبايتك وانا بوديك
مشاعل: مين قال لك اني بروح معاك ,,, الحمدلله عندي سواقي وماني محتاجه لك
مشعل: مشاعل اذكري ربك لاتخلي الشيطان يلعب بعقلك ,,, روحي البسي وانزلي انا استناك
مشاعل: قلت لك ماراح اروح معاك بتقول لي وين المستشفى والا اتصل على سعود يقول لي
مشعل: خلاص هدي نفسك هو بالتخصصي واذا ماتبي اوديك براحتك ,,, بس مشاعل هدي نفسك
والله الموضوع مايستاهل ,,, والله الوالد مافيه شي
مشاعل: اكيد مافيه شي مو كلكم حوله,,, بس انا بالبيت مرتاحه ونايمه ,,, اهم شي عندكم ان تطلع
صورتي عند ابوي اني انا الانانيه اللي مااهتم فيه,, ترى هذا ابوي مثل ماهو ابوكم
مشعل: مشاعل اكيد انجنيتي ,,, ايش هالكلام,, انتي عارفه اني مستحيل افكر هالتفكير,, هذا جزاي الي خايف عليك
مشاعل: شكرا لاتخاف علي ,,, الله لايحدني لك
وراحت تركض لغرفتها واخذت عبايتها وراحت للمستشفى
اول مادخلت غرفه ابوها لقته صاحي وحواليه خالاتها واخوانها الا هي ,, ارتمت بحظن ابوها
مشاعل وهي تبكي: بابا محد قال لي ,,, بابا الله يخليك لاتروح وتخليني,, انا مالي الاانت,, بابا لاتروح مثل ماما
ام مشعل: اذكري الله يامشاعل,, الحمدلله ابو مشعل بخير وبصحه ,,, وان شاء الله بكره يطلعونه
مشاعل تتكلم بحقد: انتي تطمنتي عليه ,, بس انا لا
انصدمت ام مشعل من رد مشاعل الي عمرها ماكلمتها بهالهجه
اما من جهه ام سلطان فكانت الفرحه مش سيعاها على قوله المصريين ,, اول مره تحس ان العلاقه بين مشاعل وام مشعل متوتره
قررت مشاعل انها تنام عند ابوها وماحد يقدر يكسر كلمتها لانهم كانوا خايفين من ثورتها
--------------------------------------------------------------------------------------
صحت مشاعل من النوم على صوت الممرضه الي دخلت الساعه 5 تقيس لابوها السكر والضغط
طلعت من الغرفه بعد ماشافت مليون اتصال من ساره الي اتصلت ع البيت وعرفت من الخدامات
انهم بالمستشفى كانت تبي تطمن على ابو مشاعل ,, كلمتها وطمنتها عليه
بعد الدكتور ماشافه قرر انه يطلعه بس اكيد بعد مااعطاه اوامر ,,, انه ماياكل شي فيه سكر
ولا احد يزعله او ينرفزه ,,, وانه يتبع الحميه ,,وكانت مشاعل تسمع كل شي يقوله الدكتور
علشان تمنع ابوها منه
طلعت مشاعل مع ابوها من المستشفى ,,,واكيد اخذهم مشعل ,,, اول ماوصلوا لقوا ام سلطان
وام مشعل برا يستنونهم ,, وتحمدوا له ع السلامه ,,, وراح غرفته يرتاح
مشاعل كانت مرهقه من نومه المستشفى ,, ممرضه داخله وممرضه طالعه,, راحت ترتاح في غرفتها
قبل تنام قالت ادق على ساره اطمنها
مشاعل: الو
ساره: هلا والله بهالصوت
مشاعل: هلا سارونه
ساره: هاه بشري كيف ابوك؟؟
مشاعل: الحمدلله احسن تونا طلعنا من المستشفى
ساره: الحمدلله ع سلامته ,, مايشوف شر
مشاعل: الشر مايجيك ياقلبي ... انتي كيفك,, وكيف المذاكره ,,, ان شاء الله تمام
ساره: انا الحمدلله,, بس المذاكره اف الله يعين مو فاهمه شي
مشاعل: طيب تعالي عندي هاليومين نذاكر سوا
ساره: وليش انتي ماتجي عندي؟؟
مشاعل: اول شي انتي تعرفي بابا توه طالع من المستشفى وماودي اروح واخليه وبعدين انا
ماعندي اخوان كبار تنحرجي منهم
ساره: ايه بس عندك السوسه ام سلطان,, اخاف تطردني
مشاعل: مايخسى الا هي ,, هذا بيتي قبل لايكون بيتها
ساره: عموما بشوف امي وبرد لك
مشاعل: اسمعي خليني انا اكلمها اكيد ماراح ترفض
ساره: خليني اقول لها اول ونشوف,, خليك انتي لوقت الحاجه
مشاعل:هههههههههههههههههههههه اوكي
---------------------------------------------------------------------------------------
اتصلت ساره على مشاعل علشان تزف لها خبر الموافقه
مشاعل: الحمدلله الله يبشرك بالخير ,,, زين وافقت ,, اسمعي مستحيل تطلعي من عندي قبل ماتبدا الاختبارات
ساره: ايه تكفين خليني افتك من هالمزعج,,, لانه ذبحني بس يسال عنك
مشاعل: ياحبي له حسونه والله اشتقت له,,, من زمان عنه,, وشكله زعلان من زمان ماكلمته
ساره: ومن قال اني اتكلم عن حسين
مشاعل باستغراب: اجل مين تتكلمي عنه؟؟؟
ساره: من غيره روميو
مشاعل: مين؟؟؟
ساره: طلال
مشاعل منصدمه: طلال!!!!!!!!!!
ساره: ايه كل 5 دقايق يتصل يقول اتصلي عليها تطمني ,,, بعدين يتصل طيب اتصلي شوفي
يمكن محتاجين شي بالمستشفى ,,, بعدين يقول اتصلي يمكن مااكلت ,, اكل المستشفى مو حلو,,
دقي عليها قولي لها من وين تبي عشاء,,,وقولي لها انك انتي الي بترسلي العشاء,, واذا قلت
له البنت تعشت يقول دقي اخاف برد في المستشفى خلي الممرضات يجيبوا لها بطانيه,,,,,,,,
بصراحه مليت منه
================================================== ========

أم وليد · 16-Nov-2007, 08:15 PM

أنـــــــــــا الآن نزلت بارت كــــــــــــــــامل

أشوف توقعاتكم وانطباعاتكم لين ينزل البارت السادس

*ميار* · 17-Nov-2007, 01:39 AM

حبيبتي أم وليد
الله يخليك أعصابيييي أنحرقـــــت
أبي البقيه
ماعندي توقعاااات
الــلــــــــ يسلمك ــــ لا تتأخري ـــــــــــــــــــــــــــــه

أم وليد · 17-Nov-2007, 04:57 PM

البارت السادس

ساره جهزت ملابسها وطلعت بعد ماسلمت على امها
في السياره دق موبايلها
ساره: الو
يزيد: اهلين سارونه
ساره: هلا يزيد ,, كيفك؟؟؟
يزيد: تمام انتي شلونك؟؟؟
ساره:اذا اسمع صوتك اكيد بخير
يزيد:حركات ايش هالتطور
ساره:ههههههههههههه شسوي اواكب العصر هههههههههه
يزيد:هههههههههههههههه,, شكلك برا ؟؟؟
ساره:اي والله رايحه لمشاعل ,,, تعرف الاختبارات قربت وبروح اذاكر معاها هالاسبوعين
يزيد: اها,,, طيب اذا وصلتي عندها دقي على ودي اسلم عليها
ساره في نفسها انت الي بتسلم والا بعض الناس:اوكي بس اوصل اطلبك
يزيد:اوكي انتبهي لنفسك باي
ساره:باي
------------------------------------------------------------------------------------------
في بيت فهده صاحبه مشاعل
فهده كانت بغرفتها تسمع محمد عبده ((الاماكن)) ,,, ودخلت امها
ام فهده: فهدووووه وجعن يوجعتس قصري ع الصوت امرن يلوفتس
فهده: ان شاء الله يمه ,,, بس يكفي تقولي قصري ع الصوت مولازم التهزئ
ام فهده: انتن يالبني ماينفع معكن الا العين الحمراء ,,, انزلي صلحي لخوتس شاهي انا بروح
عند ام سالم جارتنا
فهده: يمه ترى عندي اختبارات هالايام مو معقوله حتى مذاكره مقدر اذاكر منكم
ام فهده: وش مذاكرته وانتي رافعتن على صوت هاللي ينهق
فهده: يووووووووه يمه هذا بريك
ام فهده: وشو وش برك ذا,,, انتي مير بزعتي قمتي تقولين حتسي مدري وشو
فهده: اقول يمه تدرين انزل اسوي الشاهي بس وارتاح من الزن,,, الله يفكني منكم
ام فهده: امين جعل يجيتس رجلن يطير بتس وراء الشمس
فهده: وراء المريخ ان شاء الله بس يجي
ام فهده: وجع يافهيده لاحياء ولامستحى يوم احنا بزمنكم نستحي يجي طاري الرجل وانتن
بزعتن
فهده: يمه زمنا غير زمنكم ,, وبعدين وش انا لاقيه من وراكم غير التهزئ ,, ياليت يجيني
رجل يدلعني ويفكني منكم وشرهتكم ان جيت زرتكم
ام فهده: جعلتس ورى الشمس بسبع
فهده: امين
----------------------------------------------------------------------------------------
مشاعل كانت ندمانه ع الكلام الي قالته لمشعل وخالتها ام مشعل وماهي عارفه كيف تعتذر
طالعت موبايلها وفكرت شوي ,,, بعد دقايق دقت على مها
مشاعل: هلا مهاوي
مها: هلا والله ميشو كيفك
مشاعل : تمام ياقلبي انتي كيفك؟؟؟
مها: الحمدلله ,,, كيف المذاكره؟؟؟
مشاعل: الحمدلله ان شاء الله خير ,, حبيبتي لاكون ازعجتك بهالوقت
مها: لا حبيبتي فاضيه ماعندي شي
مشاعل: طيب مهاوي كنت بسالك
مها: تفضلي حبيبتي
مشاعل: بنت خالتك نجود الي معانا بالجامعه ايش اخبارها؟؟؟
مها مستغربه: الحمدلله ,, غريبه تسالي عنها
مشاعل: لابس اتذكرها لما كنت باول مستوى بالجامعه
مها: ايه بس ميشو هي تخرجت من الجامعه من سنتين تقريبا ,,, ايش ذكرك فيها؟؟؟
مشاعل: لا بس سمعت انها مخطوبه جد؟؟؟
مها: لا مين الي طلع هالاشاعه؟؟؟
مشاعل: بصراحه انا ,, مها شوفي الزبده ودي اخطبها لاخوي فهد
مها: ونعم باخوك بس كان سالتيني ,, لازم يعني الاشاعات والنصبات حقتك
مشاعل: هههههههههه اخاف انها انخطبت واتفشل هههههههههههه
مها: ههههههههههههههههه ,,, عموما هي مو مخطوبه ,,, تبي اعطيك رقم امها؟؟؟
مشاعل: امممممم لا مها ودي بفزعتك
مها: امري
مشاعل :اخوي شرطه انه يشوف البنت قبل يخطبها
مها: لا ميشو مستحيل توافق هي متدينه مره ومستحيل ترضى تشوفه
مشاعل: ادري حبيبتي بس مثلا انتي ماتقدري تجيبي صورتها علشان يشوفها؟؟ وتاكدي ان الصوره
بتكون معاي ,, واظنك تعرفين اني مستحيل اسوي فيها شي ,, بخاف على صورتها اكثر من نفسي
مها: والله ماعندي لها صوره,,, ولو طلبت منها اكيد بتشك ,,, بس اسمعي انا عندي حل لك
مشاعل: ايش ,,, الحقيني به
مها: شرايك ادق عليها و اقول لها انك عازمه البنات كلهم عندك وانك قلتي لي اعزمها
مشاعل: تتوقعي توافق؟؟؟؟
مها: مدري عنها خلينا نحاول
مشاعل: اوكي بس ردي علي الله يخليك اليوم اوكي
مها: ان شاء الله الحين برد لك ,, بس ادق عليها واتصل عليك
مشاعل: اوكي مشكوره حبيبتي بتعبك
مها: شسوي دايما تتعبيني بس ان شاء الله يثمر فيك ههههههههههههه
مشاعل: ههههههههههههه
------------------------------------------------------------------------------------------
وصل ساره بيت مشاعل ودقت عليها
ساره: ميشو تعالي اخاف امنا الغوله خالتك تشوفني اخاف منها تعالي انتي تدخليني
مشاعل: ههههههههههه اوكي يله بنزل لك
واستقبلت مشاعل صاحبتها ساره بفرح ع الاقل بيتونسون وقت المذاكره يعني ساعه مذاكره وساعه سوالف
طلعت مشاعل مع ساره للغرفه سمعت موبايلها يدق
مشاعل: هلا مهاوي
مها: هلا
مشاعل: صوتك مايبشر بالخير؟؟؟
مها: لا
مشاعل: ليش ماوافقت؟؟؟
مها: لا
مشاعل: اوووووووووه والحل
مها: مالك الا تخلي خالتك تكلم خالتي وتخطبها,, وعادي لو ماصار نصيب ,, ترى الزواج مو غصب
مشاعل: مدري بس اخاف من اخوي ماتعجبه بعدين يفشلني ,,, صح ان البنت ماشالله حلوه
بس تدري ماينعرف ذوق الرجال
مها: صادقه ,, اخوي خطبنا له فوق 5 بنات ومره حلوات ,, ورفضهم ,, وشفتي زوجته مره
عاديه ,, سبحان الله
مشاعل: وهذا الي خايفه منه
مها: لاعادي حبيبتي ,,, الزواج قسمه ونصيب
مشاعل: يله الله يكتب اللي فيه الخير ,,, عموما عطيني رقم اهلها اخلي خالتي تدق
وبعد ماعطتها الرقم ,, قفلت مشاعل,, وحست انها ارتاحت ,, ع الاقل اذا راحت تعتذر لاخوها يدري انها مهتمه فيه
ساره: ميشو ,,, ايش صاير كني اسمع طاري خطبه؟؟؟ لايكون اخوك مشعل
مشاعل: هههههههههه ايه طار عليك
ساره: لا مالك داعي ,, يالنذله انا صاحبتك
مشاعل : ههههههههههههه ادري بس انتي تحت السن القانوني عند مشعل هههههههههههههه
ساره: مالت عليه ,,, اصلا لو يدور مايلقى ربعي
مشاعل: هههههههه صادقه ,,, بس يمكن يلقى ثلاث ارباعك
ساره: بايخه
مشاعل: هههههههههههههههههههه فيه ناس عصبوا هههههههههههههههه
ساره: لاعادي اصلا انا خلاص حبيت
مشاعل: اخس مين تعيس الحظ
ساره: ميشو انا ببيتك احترميني,,, بعدين الي حبيته يزيد
مشاعل: مين يزيد بعد ,, ياكثر احبابك
ساره بخبث: ههههههههه شسوي ,,, مالقيت واحد يحبني ,,, ويسال عني ,, ويخاف علي ,,,
مثل واحد اول حرف من اسمه طلال
مشاعل انحرجت: تعالي من جدك الكلام الي قلتيه
ساره: من جد وخال وعم,,, لحظه يزيد يبي يسلم عليك ,,, خليني ادق عليه ,, ونشوف اذا طلال جنبه

أم وليد · 17-Nov-2007, 04:58 PM

مشاعل: اصلا طلال لو يبي يدق كان دق يعرف رقمي
واخذت ساره موبايلها تدق
ساره: ياشيخه يمكن استحى,, اصصصصص دق
ساره: هلا يزيد
يزيد: هلا والله سويره هاه وصلتي عند مشاعل
ساره: ايه يزيدوه وصلت
يزيد : وكيفها الحين ان شاء الله احسن
ساره:والله اذا تبي تطمن عليها هي جنبي
يزيد : اوكي ممكن اكلمها
ساره: اكيد ممكن بس لاتطول 3 ثواني بس
يزيد: هههههههههههه طيب
مشاعل: الو
يزيد: هلا مشاعل,, كيفك؟؟؟
مشاعل: تمام الحمدلله
يزيد: كيف الوالد ان شاء الله احسن
مشاعل: الحمدلله احسن اليوم
يزيد: والله كان ودي اتعرف عليك واكلمك بضروف احسن
مشاعل: مو مشكله ,, فرصه سعيده
يزيد: وانا لي الشرف اني كلمتك
مشاعل: الله يسلمك
يزيد: مدري اذا كنتي فاضيه,,, طلال جنبي وده يسلم عليك
مشاعل تشققت من الفرحه: اوكي
طلال:السلام عليكم
مشاعل: عليكم السلام
طلال: كيف الحال مشاعل
الله ياحلو اسمي ع لسانه
مشاعل: الحمدلله ,,, انت كيفك؟؟؟
طلال: انا الحمدلله بخير ,,, بشري عن الوالد كيف صحته؟؟؟
مشاعل: والله الحمدلله احسن بكثير عن امس
طلال: سلامته ايش عنده؟؟؟
مشاعل: ابد ارتفع السكر عنده
طلال: وايش قالوا لكم المستشفى؟؟؟
مشاعل: لا الحمدلله طمنونا عليه... بس تعرف لازم يتبع حميه
طلال: ايه اكيد,, طيب جبتوا له ممرضه علشان الادويه والحميه؟؟
مشاعل: لاوالله ,,, انا الممرضه حقته
طلال: ماشالله طيب لو سمحتي يااخت ممرضه انا تعبان ممكن تجي تهتمي فيني
مشاعل انحرجت واعجبها كلامه ع الاقل ماكان رسمي معها
مشاعل: طلال من جد شكرا ع الاهتمام سارونه قالت لي انك سالت عني وانا بالمستشفى
طلال بخبث: قلت انتي قاطعه ,, اسال انا
مشاعل: انا ماقطعت انت الي ماتتصل
طلال: مشاعل يضايقك اتصالي؟؟؟
مشاعل بدلع: لا مستحيل
طلال ابتسم: يعني ممكن ازعجك اليوم
مشاعل بخبث: بس اليوم,, مو تزعجني كل يوم
طلال : هههههههههه على حسب ,,, بفكر اذا عجبني الوضع اكيد بزعجك
مشاعل: لي الشرف اني اسمع صوتك
طلال بعذوبه: انا يامشاعل والله الي لي الشرف,,, اكيد اذا هالشي مايزعجك
مشاعل: مين قال لك انك تزعجني؟؟؟
طلال: انتي
مشاعل انصدمت: انا ؟؟؟ متى؟؟؟
طلال: لانك مادقيتي علي قلت اكيد اني ازعجتك
مشاعل: بليز لاتفسر كل شي ع كيفك
طلال ابتسم: ابشري اوامر ثانيه
مشاعل : هذا مو امر هذا تبرير
طلال: طيب ,,, المهم ماودي اطول عليك ,,, انا عارف ان ساره عندك اكلمك وقت ثاني ان شاء الله
مشاعل بدون ماتحس قالت: استناك لاتطول
طلال:...........................
حست انها تسرعت شوي,,, وتمنت تهدي الوضع ولاتتسرع بشي وتخلي الامور تمشي ببطء
طلال: عموما انا برا بس ارجع للبيت اطلبك
مشاعل: اوكي
طلال: باي
مشاعل: باي
مشاعل كانت كاتمه صرخه اول ماقفلت صارخت باعلى صوتها
ساره: هيه انتي يامجنونه اسكتي لاتسوي لنا فضيحه صدق انك مشفوحه
مشاعل: سارونه بيتصل بيتصل بيتصل
ساره: طيب واذا
مشاعل: مجنونه يعني بسمع صوته كل يوم
ساره: واذا
مشاعل عصبت من ساره البارده: شلون واذا ,, تخيلي اني اكلمه كل يوم مقدر سارونه اتحمل
الفرحه اخاف بس يصير لعقلي شي
ساره: لا الله يخليك بعد الاختبارات
مشاعل: اااااااااااااااااااااااااااااااااااااااااااااااااا ااااااااااااااااااااااااااه احبه
ساره مصدومه: تحبينه,,, قولي معجبه فيه ,, تستضرفينه,, يهمك,,, بس حب ,,, ميشو لا,,,
لاقولي انك تكذبي
مشاعل: ليش يعني ماعندي قلب انا؟؟؟
ساره: لابس انتي كنتي تنصحيني وتعطيني محاظرات عن الحب,, والحين انتي الي تحبي
مشاعل: سارونه صدقيني الحب شي مره حلو ,, وحلاوته انك لما تحسي فيه ماتقدري تتحكمي فيه
ولا تقدري تحددي الشخص الي راح تحبيه ,,, كنت قبل ياسارونه كل حياتي تمثيل وكذب
وغش حتى اني كنت اكذب كذبه واصدقها ,, بس صدقيني سارونه لما تحبي شخص ,,, تحسي
انك على طبيعتك ,,, هذا الاحساس الوحيد الي يخلي الانسان يتصرف بطبيعته ويحس ان
الحياه حلوه
ساره: واذا ان شاء الله اكتشفتي انك يكذب عليك
مشاعل بمراره: بكون اتعس وحده بالدنيا
ساره: وليس تعذبي نفسك ,, بلاش حب وريحي نفسك
مشاعل: سارونه وربي مو بكيفي ,,, ودي احب الشخص الي انا ابيه ,,, بس جد سارونه احس مع طلال
مقدر اتحكم بمشاعري
ساره: الله يستر لاتكون عقوبتك بكل الي كذبتي عليهم
مشاعل: ياشيخه واللي كنت اعرفهم قبل كانوا يحبوني ,,, كل واحد يحسبني لعبه بيده وبيحركني ع كيفه
باسم الحب ,,, والبنت الشاطره الي ماتنخدع بهالكلام
ساره: ماشلله عليك والكلام الي تقوليه عن طلال يبين انك مره شاطره هههههههههه
مشاعل: لالا سارونه مع طلال المشاعر غير ,, طلال ماقال انه يحبني ولا حتى يفكر فيني
ومع كذا احس اني مقدر اعيش بدونه,, وهذا هو الحب
ساره: والله مدري عنك
مشاعل: المهم ماعلينا شرايك اليوم اعزمك ع العشاء برا
ساره: لاحبيبتي بلا طلعات بلا هم خلينا نذاكر
مشاعل: وانتي بتذاكرين 24 ساعه
ساره: وانتي صادقه
مشاعل: اقول سارونه شرايك تقولي ليزيد يجي ودي اشوفه
ساره بخبث: اوكي,, بس بقول له تعال لوحدك
مشاعل :سارونه ياشينك
ساره:هههههههههههههههههههه
قرروا اخر شي انهم يتعشوا بالبيت لان يزيد كان معزوم عند اصحابه وبكذا مشاعل ماراح تشوف طلال
نزلوا يتعشوا مع ام سلطان وسلطان وفهد وفيصل وكان العشاء باربكيو,,, تعشوا وبعد العشاء كانت ام سلطان
ومشاعل وساره بالصاله عند التلفزيون كانت الساعه 11 وطلال مادق
مشاعل تهمس لساره علشان ام سلطان ماتسمع: اقول سارونه مادق وعنده دوام بكره اخاف بس مايدق
ساره بهمس: ميشو ذبحتيني والله ,,, خليك ثقيله
ام سلطان كانت تقلب بالقنوات وحطت على فلم
ساره:واو ميشو الفلم هذا مره يجنن شفته بالصيف الي فات بالسينما لايفوتك
ام سلطان عناد بساره ومشاعل غيرت الفلم
مشاعل: ...............((كانت غارقه بافكارها))
ساره تاشر بيدها: ياهوه وينك
مشاعل: هاه

أم وليد · 17-Nov-2007, 05:00 PM

ساره بهمس: اقول شكلي بنام واذا مادق لاتزعجيني وتصحيني
ساره: تصبحوا على خير الساعه 11 والوقت تاخر بروح انام
ام سلطان : .................((طبعا مستحيل ترد على صاحبه عدوتها))
مشاعل: سارونه اجلسي ياشينك تو الناس
ساره: والله صاحيه بدري
مشاعل: اوكي حبيبتي تصبحي على خير
ساره: وانتي من اهله
مشاعل طبعا اكره ماعندها انها تجلس مع ام سلطان بس هي ماكنت معها تفكر في طلال ليش مادق؟؟
غفت على الكنبه وصحت على صوت موبايلها الساعه 12
راحت ركض على غرفتها ,,, استغربت ام سلطان حركه مشاعل
ام سلطان: غريبه ايش هالاتصال الي خلى مشاعل تطمر هالطمره ,, من الي متصل... وبعدين
من الي راح يتصل هالوقت,,, لازم اقول لابوها يراقبها ان شاء الله يكون الي في بالي صح,,, ويزوجها ابوها
وافتك منها
---------------------------------------------------------------------------------
اما مشاعل راحت ركض على غرفتها وخافت ترد في الغرفه تصحي ساره الي كانت نايمه ,, دخلت غرفه الملابس,,
بس لما وصلت الغرفه قفل ,,, رجعت دقت عليه
طلال: الو
((في نفسها فديت الالو))
مشاعل: اهلين
طلال: هلا ومرحبا ,,, صحيتك؟؟
مشاعل: لا عادي كنت اطالع فلم
طلال: اوه اكيد قطعت عليك الفلم
((يوووووه ايش قصته اجيبه من هنا يجيبني من هنا))
مشاعل: لالا عادي اصلا خلص
طلال: انا اسف تاخرت عليك
مشاعل: لاعادي اصلا انا ماانام الا 1 ((في نفسها ,, اشوى انها ماتجي الساعه 9 الاانا في سابع نومه))
طلال: ليش ماعندك اختبارات؟؟؟
مشاعل: ايه بس تعرف ماعندي جامعه انام واصحى على راحتي
طلال: يله شدي حيلك الاختبارات قربت
مشاعل: مقدر
طلال: ليش؟؟
مشاعل: مقدر اشد حيلي مسويه دايت
طلال ضحك مجامله
حست انها بايخه ,,, مسويه خفيفه دم
مشاعل: وانت ماعندك دوام؟؟؟
طلال: عندي بس عندنا ضيوف وتوهم طلعوا
مشاعل: اكيد فيك نوم((كانت تتمنى يقول))
طلال: بصراحه ميت نوم بس بسولف معاك شوي
فرحت مشاعل بالشويه هذي,,, المهم انها بتكلمه
استمروا بالسوالف اللي تقريبا رسميه ,, يعني تدور حول طبيعه دوامه ,, ودراسه مشاعل
وطموحها ,,,, وعن الاحوال والاخبار مو اكثر,,, صح انها كانت سوالف عاديه,, بس مشاعل
كانت في قمه سعادتها ,, كانت تحس برجولته,, وباسلوبه الراقي ,,, وبقوة شخصيته ,,, حست فيه
انجذاب كبير مو بس منها,,, حست طلال منجذب لها بس يمكن منحرج يبين او يمكن خايف
من مشاعره ,, بس اكيد حست فيه,,, الشويه صارت ساعتين ,, وطبعا طلال حقد على مشاعل
لانها اخرته ,,,وهي تتهمه انه هو اللي مو راضي يقفل
---------------------------------------------------------------------------------------
صحى مشعل الساعه 7 ونص علشان يروح الشركه لقى عنده رساله فتحها لقاها من مشاعل
"حبيبي واخوي وكل دنيتي مشعل ,,, لاتزعل على ,,, وعلى فكره خطيبتك تسلم عليك"
ابتسم مشاعل ماتخلي طبعها مستحيل تتاسف ,,, فرحانه بلاتزعل,, و من خطيبتي الي تسلم علي
لاتكون خطبتلي وانا مدري
---------------------------------------------------------------------------------------
اما مشاعل صحت الساعه 10 وكانت موقته المنبه على الساعه 7 بس من كثر النوم سكرت
المنبه كان ودها هي اللي تصحي طلال
دقت عليه الساعه 10 ,,, مارد عليها ,,,, بعد نص ساعه رجع دق عليها
طلال:صباح الخير
مشاعل:صباح النور ,,, كويس صحيت
طلال:ليه شايفتني الدلوعه مشاعل انا صاحي من 7 ودعيت عليك 30 دعوه
مشاعل: ههههههههههههههه ياساتر
طلال: مره ثانيه لاتسهريني
مشاعل: ياسلام مو كنت اقول لك قفل علشان ماتتاخر ع النوم
طلال: المفروض تقفلين بوجهي
مشاعل: مايطاوعني قلبي
طلال: يسلم لي قلبك
--------------------------------------------------------------------------------------
تطورت الاحداث بالاسبوعين اللي تسبق الاختبارات
ساره نزلت عليها الشطاره فجاءه وصارت 24 ساعه تذاكر
مشاعل كانت اسعد وحده بالدنيا كان طلال ماينام لحد مايكلمها ولايصحى الا على صوتها
مع انه كان رسمي شوي معاها
مشعل قرر اخيرا انه يكمل نص دينه ,, واتصلت امه على اهل نجود واتفقوا ان الزياره تكون
السبت
اما سعود كان متشقق من الوناسه لان الفرج قرب ,,,وقريب راح يتزوج الهنوف
-------------------------------------------------------------------------------------
تعودت مشاعل تصحي طلال كل يوم للدوام ,,, كانت تصحيه الساعه الساعه 7 ويتدلع 10 دقايق بالسرير
ويعذبها لحد مايصحى
يوم الاربعاء الي يسبق اسبوع الاختبارات كانت مشاعل سهرانه مع ساره يذاكروا لما الساعه 5 الفجر
صحت الساعه 8 تاخرت على طلال كان المفروض تصحيه 7 ,,, دقت عليه مرتين مارد ,,
خافت انه زعل منها,, وبعد سبع اتصالات رد اخيرا
طلال وصوته كله نوم: الو
مشاعل:ان شاء الله ماصحيت؟؟
طلال: ليش كم الساعه؟؟؟؟
مشاعل: الساعه 8 اصحى بسرعه ,,,مره تاخرت ع الدوام
طلال: وليش توك تصحيني حضرتك؟؟؟
مشاعل: يالله بسرعه اصحى انت الحين بعدين نتفاهم
0طلال: لا ماراح اصحى لحد ماتقولي لي ليش ماصحيتيني ,,, مانمتي الا متاخره صح؟؟؟
مشاعل: يا الله ,, والله انك فاضي
طلال: يعني تعاندي ,,, ميشو كم مره قلت لك لاتسهري ,, تدري ان السهر مو كويس خاصه وقت الاختبارات
سبحان الله زي الاطفال
مشاعل: طيب يالكبير ممكن تصحى؟؟
طلال: لا مابي
مشاعل: ايش اللي ماتبي قوم طلول بليز
طلال: قوم يا ايش

أم وليد · 17-Nov-2007, 05:02 PM

مشاعل استحت: طلال مو وقته
طلال : انا عرفت ليش ابوك ارتفع السكر عنده
مشاعل استغربت ايش جاب طاري ابوها: ليش؟
طلال: اكيد تدلعيه بلسانك الي ينقط سكر وعسل,, خفي ع الشايب شوي
مشاعل: ههههههههههههههههههههههههه
نفسها تقول له احبك,, يا الله هالانسان قدر باسبوعين يصير كل شي بحياتها ,, وباي كلمه يهز عالمها الصغير هز
طلال: ميشو
مشاعل: عيونها
طلال: ماراح اروح للدوام ,, ابي احكي معاك,, بليز لاترديني
مشاعل: فيه احلى من الوقت الي اكلمك فيه
طلال: يامجرمه كنت اختبرك ,, بشوف تخافي علي والا لا,,, تبين ابوي يقتلني ادري فيك
مشاعل: ههههههههههههههه
طلال: خلاص ميشو بروح البس وانتي نامي بس بصحيك 12 الضهر اوكي
مشاعل: لااا حرام عليك مانمت الا بوقت متاخر
طلال: مالي شغل لازم تعدلي نومك
مشاعل: طلول علشان خاطري خليها 2
طلال: ولا عشر دقايق ماراح ااجل
مشاعل" طيب عادي اقفل موبايلي مو صعبه
طلال: اوكي عادي بس كنت بقول لك ترى المؤسسه حقتنا جنبها بنك
مشاعل: طيب؟؟؟ايش اسوي لك
طلال: لابس كنت بقول لك ان البنك يقفل الساعه 12
مشاعل: تستهبل ... ايش تبي اجي اقفله انا
طلال: يعني الساعه 12 يطلعوا موظفات البنك ينتهي دوامهم ويقولون حلوات... انتي نامي
وخذي راحتك يمكن اشوف لي كم وحده حلوه اكحل عيوني
مشاعل: جعل عيونك العمى لو طالعت,,, اوريك,, تشوف
طلال: بسم الله على عيوني ,, طيب شسوي قطوتي نايمه
مشاعل: ومين قطوتك هذي؟؟؟
طلال: انتي
مشاعل: طلال ممكن سؤال؟؟؟
طلال: سمي
مشاعل: تذكر اول مره شفتك فيها كنت تكلم وحده وتقول لها بطتي؟؟ مين هذي؟؟
طلال مات ضحك:يوووه شكلك حاقده مانسيتي,, المهم بطتي هذي بنت واحد من اصحابي ,,, صغنونه,, عمرها 3 سنوات
لو تشوفيها ميشو تاكليها,, اما قطوتي فهي انتي لانك شريره ,, وماتحبي احد يحارشك
اما سياره البنت الي كانت واقفه كانت سياره خويه الي معاي ,, بس كنت ابي اقهرك
مشاعل: ليش تقهرني؟؟؟
طلال: ميشو بعدين اشرح لك الموضوع بروح البس الحين
مشاعل : قلبي الله يخليك لاتسرع وانت طالع
طلال : ابشري ,, وانتي تغطي كويس
مشاعل: بتوحشني
طلال: ياكذابه كيف اوحشك وانتي نايمه
مشاعل: مدري بتوحشني بالحلم
طلال: اها زل لسانك ... تعالي مين بتحلمي فيه
مشاعل: ههههههههههه يوه طلال خلاص روح لاتتاخر
طلال: ابو التصريف ,, المهم انتظرك الساعه 12 اذا مادقيتي ترى مقدر اتحكم بعيوني
مشاعل: شكلك ودك تنضرب
طلال: اذا انتي الي راح تضربيني فانا احبه
مشاعل ماكان عندها اي شك ان طلال كان حبها الاول والاخير ,,, ماكان يهمها ايش يحس ناحيتها
المهم انها تحبه ,,, يكفي انها تسمع صوته كل يوم,, يكفي انه حنون معاها,,, يكفي انه يخاف عليها
ويقلق عليها,, وهالشي تعتبره حلم وتحقق
---------------------------------------------------------------------------------------
كان الخوف واضح ع ساره مو الاختبار بكره السبت وماخلصت الماده
اما مشاعل فكانت مطنشه نوعا ما لو ان طلال مايدق عليها كل شوي ويغصبها تذاكر ماكانت فتحته حتى
ساره: ميشو بنجن الساعه11 وماخلصت الماده
مشاعل: ياشيخه طنشي انتي ع الاقل باقي لك 10 صفحات ,, انا ماخلصت ولا نص الماده ,, وسعي صدرك
ساره: اذا صرتي مجنونه اصير مجنونه مثلك
مشاعل: ياشيخه ,,, اقول ظنك فهده خلصت؟؟؟
ساره: ماتوقع هي ميت قلبها مثلك
مشاعل: تدرين بدق عليها اخرب عليها
دقت مشاعل على فهده
مشاعل: هلا والله بالدافوره
فهده: اي دافوره توني اصحى
مشاعل: هههههههههه بالله ,, يعني ماذاكرتي
فهده: والله يقولوا البنات فيه ملخص تصدقين توني ادري
مشاعل: ههههههههه والله انك فله
فهده: اقول اخبار طلال
مشاعل: ياحبي له
فهده: هاه السناره غرزت؟؟؟
مشاعل: الا غرزت وصادت حوت بعد ههههههههههههه
فهده : هههههههههههه اقول ليش ماتجوا تذاكروا عندي بكره
مشاعل: والله ماتوقع اذا اجتمعنا انا وانتي بنذاكر
فهده: على قولتك ,, مدري ايش اكل ميته جوع
مشاعل: اطلبي لك اكل من اي مطعم
فهده: شرايك من وين اطلب
مشاعل: اسمعي انا بطلب لك
فهده: طيب بس قولي لهم يجون بسرعه ترى ميته جوع
مشاعل: اوكي
فهده :بس ايش حتطلبي يمكن ماحب هالاكله الي حتطلبيها
مشاعل: لاماعليك بطلب لك شي تحبيه ,,,باي الحين قبل يقفلون
فهده: اوكي باي
بعد ماقفلت التفتت مشاعل لساره وسالتها
مشاعل: سارونه ايش المطعم الي فهده ماتحب اكله
ساره: والله مدري بس ليش؟؟؟
مشاعل: ابي اطلب لها اكل تقول ميته جوع
ساره: والله انك فاضيه مقالب ايام الاختبارات لاتدعي عليك بس
مشاعل: اسكتي انتي بس وكملي مذاكره
مشاعل طلبت من كنتاكي تذكرت ان فهده حلفت اذا دخلوه ان ماتشرب لو بيبسي مره تكرهه
مشاعل: هههههههههههههه توهقت فهده ,, شكلها اخر شي حتسوي لها بيض هههههههههه
ساره: ههههههههههههههه ,, ميشو يالخبله ذاكري بكره الاختبار,, هاتي موبايلك
مشاعل: طيب طيب بس شوي
ساره: لا هاتيه
مشاعل: طيب اخر شي بكلم حسين والله مره واحشني
ساره: ميشو ذبحتيني
دقت مشاعل على حسين
مشاعل: هلا حسونه
حسين: هلا ببنات الجامعه
مشاعل:هاه كيف ثالث ثانوي ,,,عسى بس ذاكرت
حسين: هههههههه ,, تسمعين بالمذاكره,, انا برا
مشاعل: اقول والله انك فله ,,,, بس لما ماتلقى لك قسم يدخلك من نسبتك الخايسه لاتصيح ههههههه
حسين: لاحبيبتي نشغل الواسطات
مشاعل: اخس واسطات
حسين: ايه ايش على بالك,, وانتي يالفالحه خلصتي
مشاعل: ياشيخ طنش تعش تنتعش
سمعت صوت خط ثاني بالانتظار ,, لقت رقم طلال
حسين: هاه اخبار خوينا حا..
مشاعل: حسين باي الحين بعدين اكلمك
ماانتظرت يرد ,,,, على طول ردت على طلال
طلال: ماشالله معاك خط وانتي بكره عندك اختبار
مشاعل: الناس يسلموا اول
طلال: السلام عليكم
مشاعل: عليكم السلام
طلال: مين تكلمي؟؟
مشاعل: حسين
طلال: حسين؟؟؟
مشاعل: ايه اخوي
طلال: بس اول مره تقولي ان عندك اخو اسمه حسين
مشاعل: لا هو اخوي ومو اخوي
طلال: مو فاهم,, اخوك من الرضاع؟؟؟
مشاعل: لا,, يعني هو مو اخوي بس انا اعتبره اخوي
طلال: اها يعني مايقرب لك
مشاعل: لا
طلال: اها
مشاعل: وحشتني ,, تدري ان لك ساعتين ماسمعتني صوتك
طلال:...............
مشاعل: الو
طلال من غير نفس: معاك
مشاعل: ايش فيك ساكت
طلال: ولاشي
مشاعل: طلال ايش فيك؟؟
طلال من غير نفس: لا بس شكلي قطعت مكالمتك مع حسين
مشاعل: طلال قلبي حسين مثل اخوي وربي
طلال: ترضي اني اكلم وحده واقول هذي مثل اختي؟؟
مشاعل: لا
طلال: اها
مشاعل: طلال بس حسين وربي مثل اخوي اعرفه من زمان
طلال بزعل: الله يهنيك فيه,, تامرين شي بروح انام
مشاعل: طلول والله مو قصدي ولابينا شي قسم بالله
طلال: طيب انا قلت ان بينكم شي
مشاعل: طلال
طلال بزعل: نعم
مشاعل: ايش فيك ,,, طيب اسمع بعطيك رقمه واساله
طلال: لا مايحتاج,, ممكن اقفل
مشاعل بدلع: طلال بليز لاتزعل ,, ترضى اروح بكره للاختبار متضايقه ,, بعدين ماعرف احل واسقط
طلال: خلي حسين يوسع صدرك
مشاعل: طلال خلاص والله ماكلمه الا اذا استاذنت منك
طلال بنرفزه: اقول بس باي ,,, صدق انك ماتستحي
مشاعل خافت: حبيبي انا اسفه
طلال: ..........................
مشاعل: والله اسفه اسفه اسفه وربي ماكلمه ابد ابد ابد ,, طلال تدري ان حسين اعتبره اعز صديق لي
ومع كذا وربي لو هالشي يزعلك وربي ماراح ارد عليه ابد
طلال..........................
مشاعل: خلاص طلال وربي اسفه بليز لاتزعل
طلال:........................
مشاعل:الو
طلال: معاك
مشاعل: ليش ساكت
طلال: مستغرب
مشاعل: من ايش
طلال: فيه كلمه قلتيها مصدوم منها
مشاعل مره خافت: ايش قلت
طلال: اسفه
مشاعل: طيب؟؟
طلال: ميشو انتي عمرك ماقلتيها ,,, انتي تتاسفي؟؟
مشاعل ابتسمت: طلال وربي انت غيرت فيني اشياء كثيره ,, الحين بس احس اني عايشه
احس بطعم الدنيا,,, واشياء كثيره ماكنت راضيه عنها بس كنت الاقي صعوبه في تغيرها ,, اما
الحين القى نفسي ابعد عنها بدون ماحس ... طلال
طلال: لبيه
مشاعل: احــــــــــــــــبـــــــــــــــك

أم وليد · 17-Nov-2007, 05:04 PM

طلال:........................
مشاعل: ....................((كانت تتمنى يقفل الخط بس مايسكت ماتدري ايش يفكر فيه))
مشاعل: طلال
طلال بهدوء: لبيه
مشاعل: انا اسفه ع الكلمه
طلال: ليش ندمتي عليها؟؟؟
مشاعل: لا بس يمكن ضايقتك
طلال: تدري ميشو وربي هذي احلى كلمه سمعتها بحياتي ,,, سمعتها كثير بحياتي ,,, من امي
واخواتي ,,, وعلاقات قديمه,, بس اول مره احس فيها,,, ميشو قلتيها كلمه وبس ,,, والا انتي حاسه فيها
مشاعل: طلال واللي خلقني اني اموت بالارض اللي تمشي عليها ,,, طلال احبك احبك احبك
طلال : ميشو ايش طلال بحياتك؟؟
مشاعل: ااااااااااه
طلال: سلامت قلبك من الاه ان شاء الله فيني ولا فيك
مشاعل: انت ياطلال عمري ,,, وماراح انساك الا لما ينتهي عمري ويدفنوني ,,, طلال انت الدم الي بعروقي
انا كنت خايفه اني احب واتعذب,, بس انا مقهوره على 20 سنه الي راحت من عمري بدونك
,, ماكنت اتوقع ان الحب شي حلو ,,, طلال من بعد امي انا ماحبيت احد بالدنيا ,, وانت الشخص
الوحيد الي حبيته ,, ماتدري انت ايش سويت بحايتي ,,, طلال انت حياتي
بدت مشاعل تبكي يمكن علشانها اول مره تحكي من قلبها,, يمكن علشان المشاعر اللي كانت مكبوته
ولما طلعتها حست بدموعها تنزل بدون ماتحس
طلال: ميشو قلبي ليش تبكي؟؟
مشاعل: لاني فرحانه ,,, هالكلام كان ودي اقوله من زمان بس ماكان عندي جراءه
طلال: الله لايحرمني منك
مشاعل: ولا منك
طلال: ان شاء الله مايفرقنا الاالموت
مشاعل: امين يارب
طلال: حبيبتي لازم نتفق اتفاق اذا نبي نستمر مع بعض
مشاعل: انا رهن اشارتك .. انت طلباتك اوامر
طلال: حبيبتي انا مايهمني اعرف ماضيك,, ولا مين عرفتي اوكلمتي,, ولاراح اعاتبك على ماضيك
بس من اليوم ياميشو.. انتي لي,,وماراح ارضى احد يشاركني فيك... ميشو ماتتخيلي النار
اللي تحرق صدري لما ادري انك طالعه,, ميشو مابي احد يطالعك غيري,, مابي احد يسمع صوتك غيري..
مابي تحكي ولاتضحكي مع احد غيري.. ابيك لي لوحدي,, ملكي... ميشو بليز انا بتغاضى عن ماضيك
وهذا شي صعب خاصه على شاب شرقي ,,, بليز لاتخونيني ,,, كوني لي,,, عشان خاطري ابيك لي,, لاترديني
صارت مشاعل تبكي اكثر ,, خافت انها ماتقدر تتحمل هالفرحه
مشاعل: والله ما اطالع احد غيرك ولاافكر بغيرك ,,, معقوله افكر بغيرك وانت معاي,, صدقني
مااشوف احد غيرك ,,,,, طلال والله احبك
طلال: ميشو انا غيور مره تقدري تتحملي
مشاعل: لوتقفل علي بغرفه وماتخليني حتى النور اشوفه انا راضيه ,, انت نوري وشمسي
انت الفرحه بقلبي
طلال: ياحبيبتي,, طيب بليز ميشو لاتبكي علشان خاطري ,, اذا لي خاطر لاتبكي دموعك غاليه
مشاعل: طلال والله من الفرحه
طلال: ميشو اوعديني ماتردي على حسين ولاغيره ,,تدري انا بغير رقمك علشان محد يدق عليك
مشاعل: ماراح ارد على حسين ولا غيره ,, واذا تبي تغير رقمي غيره ,, اهم شي رضاك علي
طلال: وربي انتي دنيتي,,, ميشو من اليوم وطالع ماتطلعي الا من بعد اذني
مشاعل: ابشر
طلال: ودوران مافيه
مشاعل: ابشر
طلال: وصاحباتك ماراح يزعلوا؟؟؟
مشاعل: ماهموني,, اهم شي رضاك
طلال: ميشو ابيك تغطي وجهك ,, مابيك تطلعي كاشفه ,,, مابي احد شوفك غيري
مشاعل بسعاده: ابشرررررر , احبك احبك, احبك
ومرت دايق وهم يتواعدون ان كل واحد مايخون الثاني ,,, وكانوا يتبادلون احلى كلمات الحب
قطعها سؤال طلال
طلال: ميشو حبيبتي متى اختبارك بكره
وكانه بهالسؤال صحاها من احلى حلم
مشاعل: الساعه11
طلال: وانتي حظرتك جالسه تكلمي ,,خلصتي مذاكره
مشاعل: يعني
طلال: طيب نامي وانا بصحيك الفجر تخلصي الباقي
مشاعل: لالا مايحتاج ,, بس ياليت تصحيني 10 علشان الاختبار
طلال: ابشري حبي,, تغطي كويس
مشاعل: ابشر
طلال: الله لايحرمني منك
مشاعل: ولامنك
طلال: الله يحفظك باي ياحبيبتي
مشاعل: باي ياعمري
ماكانت تعرف تبكي والا تضحك ولاتصارخ ,,, حست انها صارت تمتلك الدنيا كله ,,ولو ان طلال
ماقال لها انه يحبها,, بس يمكن متردد,, كل تصرفاته تدل على انه يحبها,,, بس ليش ماقال لها
,, يمكن يبي يتاكد من مشاعره
-------------------------------------------------------------------------------------
الساعه 10 كان موبايل مشاعل يدق
مشاعل بصوت كله نوم: الو
طلال: صباح الخير على قطوتي
مشاعل: صباح الانوار والفل والياسمين
طلال: وحشتيني
مشاعل: وانت اكثر
طلال: ياكذابه كنتي نايمه شلون وحشتك
مشاعل: بالحلم ههههههه
طلال: هههههههه يله حبيبتي اصحى ,, مقدر ارجع ادق عليك عندي اجتماع
مشاعل: اوكي يله صحيت
طالعت مشاعل سرير ساره لقتها صحت اكيد الدافوره تحت تذاكر
لبست بسرعه ونزلت تشوف ساره لقتها لابسه وجالسه تذاكر
طلعوا وركبوا السياره واول شي سوته مشاعل انها تغطي وجهها اكيد وعدت طلال ومستحيل
تكذب عليه ودق موبايل مشاعل
مشاعل" غريبه طلال داق يقول عنده اجتماع"
طلال: هلا والله باللي تسمع الكلام
مشاعل: ايش؟؟
طلال: مشاعل حبيبتي اكشفي
مشاعل: مافهمتك مره تقول تغطي ومره تقول اكشفي
طلال: اكشفي والتفتي يمينك
مشاعل التفتت لقت سياره طلال ((يالله حتى الصباح شكله يجنن))كان لابس ثوب وشماغ
مرسم الولد علشان الدوام: وين الي عنده اجتماع
طلال بخبث: وهذا مو اجتماع حب
مشاعل تضحك: ياقلبي احبك
طلال: خلاص تغطي
مشاعل: مابي,, ابي اشوفك
طلال: قلت تغطي
مشاعل: ان شاء الله ,, تعال ايش طلعك الصباح
طلال: مستحيل اخليك تروحي الجامعه بدون ماوصلك,, بعدين احد يفوت القمر بالصباح
مشاعل تبي تقهره: مو كنت شينه
طلال: كنت اعمى ,, بعدين ماعندك مرايه علشان تعرفي اني اكبر كذاب
مشاعل: طيب ارجع للدوام جامعتي بعيده
طلال يبي يقهرها: ليش تصرفيني ايش عندك اكيد مواعده حسين
مشاعل: حسين بوجهك
طلال: ايش عندها خويتك ساره بتاكل الكتاب اكل ,, الله يخلف علي خويتي كسلانه,,يزيد الي لاقيها خويه دافوره
اقول ماتعرفين وحده دافوره تعرفيني عليها
مشاعل: وجع ,, مو دافوره لله ,, ابوها حالف انها اذا مانجحت ماراح يسفرها هالصيف
طلال: اها , وانتي ماراح تسافري؟؟
مشاعل: اذا نجحت راح نسافر
طلال: يارب ماتنجحي
مشاعل: حرام عليك ليش
طلال: لاني هالصيف ماارح اسافر
مشاعل: ليش
طلال: ماقدر اترك المؤسسه ,,ياانا ياابوي ,, وابوي بيسفر اهلي,, وانا ماراح اسافر الا بعد مايرجعوا
مشاعل: اها
طلال: اهون عليك تسافري وتتركيني
مشاعل: مشكلتك
طلال: اوكي روحي,, اتعرف على البنات الي بالبنك الي جنبنا
مشاعل: هههههههههههههه والله احسهم شينات
طلال: شينات بعينك ,, الا كل وحده احلى من الثانيه
مشاعل: والله,, اوكي باي بكلم حسين
طلال: والله لاخليه حسن مو حسين لو فكرتي تدقي عليه
مشاعل: طلال احبك شسوي
طلال: لاتسوي شي عطيني بوسه
مشاعل احمرت خدودها: اقول باي انا وصلت الجامعه
طلال: يالله كذابه عيني عينك ,,, ترى انا وراك
مشاعل: طيب البنت معصبه تقول ماخليتيني اذاكر ازعجتيني
طلال: طيب اوكي انا وراك لحد ماتوصلي ,, بعدين برجع للمؤسسه ,, بس قلبي طمنيني اول ماتطلعي
مشاعل: ان شاء الله
--------------------------------------------------------------------------------------
خلص الاختبار وكانت مشاعل تدعي بس انها تجح لان الاسئله جت مره صعبه
ساره: اوف اخيرا خلص مابغينا نفتك
فهده: والله شكلي بحمل الماده
مشاعل: ومن سمعك
مشاعل راحت تكلم طلال تطمنه
مشاعل: والله ان شاء الله اقدر اعدي
طلال: احسن جالسه تكلمي حسين ومدري مين
مشاعل: يالله طلال خلاص ترى ذليتني بحسين
طلال: طيب متى اختبارك الثاني
مشاعل: الثلاثاء
طلال: ثلاث ايام فيه وقت تذاكري
مشاعل: ان شاء الله تتركني اذاكر ماتنشب لي
طلال: ههههههههه والله طيب طيب , المهم بتطلعي الحين من الجامعه؟؟
مشاعل: ايه
طلال: لاتطلعي انا قريب من الجامعه ,, لاتطلعي لما ادق عليك
مشاعل: ايش عندك جاي الجامعه
طلال: ماراح اخليك ترجعي لوحدك
مشاعل: معاي ساره
طلال: حتى لو ,,, حبيبتي ومن حقي اوصلك وارجعك
مشاعل: ياقلبي بس مابي اتعبك,, والا عذر علشان تشوف البنات
طلال: يعني تقريبا
مشاعل: طيب اذا قربت دق مره تعبانه
----------------------------------------------------------------------------------
------

أم وليد · 17-Nov-2007, 05:13 PM

مره اسبوعين الاختبارات اطول من ماكانوا يتوقعوا وصار فيه تقدمات كثير
مشعل راح يشوف الخطيبه وانجن عليها وماصار يتكلم الا عنها وتحدد زواجه بعد شهر
اما مشاعل كانت غرقانه في بحر الحب والغرام مع طلال الي للحين ماسمعت منه كلمه احبك
وفهده اخيرا انخطبت لولد عمها
---------------------------------------------------------------------------------
بعد ماطلعت النتايج
فهده حملت 3 مواد بس ماكانت مهتمه لان الزواج كان كل همها
ساره نجحت وبتفوق
اما مشاعل حملت مادتين وطبعا زعل عليها طلال يومين كل ماده بيوم خخخخخخخخخخخخ
---------------------------------------------------------------------------------
مشعل: ميشو كلمي نجود قولي لها تقنع اهلها يقدمون الزواج ,,, تعبت مع ابوي مو راضي
مشاعل: اذا ابوي مو راضي تبي البنت تقول لاهلها يااهلي قدموا الزواج ابي اتزوج بسرعه
مشعل: شسوي مليت من الانتظار
مشاعل: سبحان الله اللي يشوفك قبل مايقول هذا مشعل,,, كنت كاره شي اسمه زواج ,, اركد ياخوي
الركاده زينه
مشعل: اوووووووه ميشو بليز سوي شي ماني قادر
مشاعل: اقول مشعل انا مو فاضيه لك ولقضاياك ,,, قول لسعود اتوقع يتحمس لمشكلتك
طلعت من عنده ميته جوع وماتعرف ايش تاكل ,,,دقت على طلال يمكن يعطيها اقتراح
مشاعل: طلول ميته جوع مدري ايش اكل
طلال: امري ,,, اطلبي ودقايق ويكون عندك
مشاعل: ايه ان شاء الله وشلون تدخله بيتنا
طلال: عادي خلي الخدامه تطلع تاخذه مني
مشاعل حست انه وقت حلو هي الي تاخذ منه الاكل
مشاعل: ابي دونات
طلال: غالي والطلب رخيص ,,, ثواني البس واطلع
مشاعل: تلبس ليش تعال بالبيجامه ,,, الخدامه الي بتاخذه منك
طلال: اول شي مجنون انا اطلع بالبيجاما ,, بعدين توني راجل من النادي ... وتوني متحمم
تبيني اجيك بالفوطه هههههههههههههههههههه
مشاعل انحرجت: اوكي لاتطول
بعد 10 دقايق دق عليها
طلال: هاه قلبي انا بالبيت توني مشغل السياره ,, حبيبتي من وين تبي اجيب لك دونات؟؟؟
مشاعل: بيت الدونات
طلال: ترى مادل كويس ,,, تعرفي باي شارع هو
مشاعل: اممممم مدري
طلال: طيب ثواني انادي المرشد لاسياحي
مشاعل استغربت عنده مرشد سياحي ليش الاخ وين رايح؟؟؟
طلال يكلم الي عنده: نواف تعال معي بنروح مشوار
نواف اخوه الصغير عمره 10 سنوات: وين انا مشغول ماني فاضي ايش تبي
طلال: ياطويل العمر ابد ابيك تروح معي بشتري دونات وماادل
نواف: وكم تعطيني
طلال: يالله فشلتنا ايش بتقول البنت اخوك طماع ,, تعال ياخي اعطيك الي تبي بس خلصني
نواف: يله مشينا
نواف على صغر سنه بس كان اسلوبه اسلوب شايب عمره 50 يمكن علشان طول الوقت جالس مع ابوه
طلال: هاه وين اروح
نواف: اقرب واحد لنا الي بطريق الملك عبدالله ,,, يله روح هناك
طلال: ابشر طال عمرك,,, ميشو ماتحسين اني اتهزء؟؟؟
مشاعل: طلال انا مصدومه كم عمر اخوك
طلال: 10
مشاعل: ماشالله شكله عمره 30
طلال: ايه نسميه بالبيت الشايب
مشاعل: هههههههههههههههههههه
نواف: خلصني روح يمين
طلال: ابشر ,,, بس لاتعصب الله يحفظك
نواف : بس هنا
طلال: يله عاد انزل اطلب
نواف: خدام عندك انزل انت
طلال: نواف عيب انت اخوي الصغير
نواف: طلعتي معك هذي بميه اما لو تبيني انزل تدفع 200
طلال: خلاص يله بس انزل بعطيك الي تبي
نواف : الحين عطني 300
طلال: وليش ان شاء الله كانت 200
نواف: ماتبي تدفع حق الدونات والا ان شاء الله على بالك انا الي بدفع
طلال طلع من محفظته 300 واعطاه لاخوه وقال له جيب من كل نوع 10 حبات
مشاعل: مجنون مين راح ياكلها هذي
طلال: انتي
مشاعل: ليش شايفني افه
طلال: لا ابيك تسمني
مشاعل: لاجد طلال مره كثيره ,, حرام
طلال: ياحلوك ساكته,, ايش رايك في هالخبل نوافوه
مشاعل: ماشالله يجنن خطير ,,, بليز هاته عندي يوم
طلال: لا انا اخاف عليك منه مااظمنه صح انه صغير بس عينه زايغه
مشاعل:ههههههههههههههههه
ركب نواف وماكان شايل الاغراض ,,, خلى الهندي يشيل عنه
طلال: الله يحييك ليش ماشلت الاغراض
نواف: ياحبيبي فلوسي تخدمني
طلال ومشاعل:هههههههههههههههههههه
وهم في الطريق لبيت مشاعل
نواف : اقول طلال مالاقي عندك سلف 100
طلال: ههههههههههه ايش عندك كل شوي ساحب 100 وهذي حقت ايش الرجعه لاتخاف ادل البيت
نواف: لا مو ميه ريال
طلال: اجل
نواف بصدق: ميه الف
طلال ومشاعل اللي على الخط مستمعه : هههههههههههههههههههه
طلال: ليش بتتزوج من ورانا
نواف عصب: اتكلم جد
طلال:ليش ايش تبي فيها
نواف : والله طلعت مع السواق قبل امس للعربه(معرض سيارات) ,,, وشفت لي همر خطير
وقال لي ادفع ميه الف نحجزه لك,, وقلت لابوي قال خلها الاسبوع الجاي,, واخاف يطير علي الموتر
طلال:ههههههههههههههه ماتبي ماي باخ؟؟؟
نواف: اقول ترى اكلمك جد وانت تستهبل
طلال: من جدك ابوي وافق؟؟؟
نواف: اي والله
طلال: وانشالله مين بيسوقه انت؟؟؟
نواف: لا السواق
طلال: ياخي اشك انك مسوي لابوي عمل ,, مستحيل يرفض لك طلب
نواف: المهم تسلفني والا لا
طلال: اقول يركدون بس ,, حبيبتي انا برا خلي الخدامه تجي تاخذ الاغراض
راحت مشاعل ركض وكانت الاوضاع تساعد انه تفتح له الباب لان البيت ماكان فيه احد
فتحت مشاعل الباب ,,, انصدم طلال من الي شافه,,, او ل مره يشوف مشاعل بدون عبايه
وجلس يطالع مصدوم,,, هي بعد اول مره تشوفه من قريب ,, وعينها بعينه,,, ماتكلم عطاها
الاغراض ومشى
دق عليها
طلال: الخدامه هاه
مشاعل ميته ضحك: ايه
طلال: تدري ان خدامتكم تجنن ,,, نبي زيها
مشاعل: لا مافيها منها الا نسخه وحده
وكانت حياه مشاعل وطلال مره تجنن ,, ماكان فيها اي مشاكل ,, كانت مشاعل تسمع كلام
طلال كله,,, ولايمكن تناقشه ابد في امر امرها به
--------------------------------------------------------------------------------
يوم الاثنين كان موعد رحله مشاعل لجده الساعه 11 بالليل ,,, كانت رايحه تزور خالاتها
اللي ساكنين بجده ,,, وبعد مااقنعت طلال انه يخليها تروح,, وافق بس بشرط انه يروح معاها بنفس الطياره
ويطمن عليها بعدين يرجع بنفس اليوم,,,
صحت الساعه 2 الضهر ,,, منصدمه,,, ايش كرم الاخلاق الي نزلت على طلال ,, خلاها تنام
لحد الساعه 2 الضهر ,,, بالعاده الساعه 12 يصحيها غصب ,,,
طالعت موبايلها مالقت اتصال منه,,, دقت عليه مارد
قررت تتحمم وتنزل تفطر او تتغداء
انتهت من الغداء بحدود 4 العصر ,,,
تدور موبايلها تذكرت انها نسته بالغرفه ,,, يالله اكيد طلال معصب
طلعت غرفتها ,, استغربت مااتصل عليها ,,, اكيد طلع من الدوام ونام
كانت الساعه 8 وطلال مادق ولااتصل,, خلاص الرحله باقي عليها 3 ساعات ولازم تكون
بالمطار بعد ساعتين
اتصلت على ساره
مشاعل: سارونه مره خايفه على طلال مادق اليوم كله مو من عوايده
ساره: يمكن مشغول
مشاعل: تكفين عطيني رقم يزيد اكيد شافه اليوم
دقت على يزيد واللي قال انه ماشاف طلال من يومين
دقت على بيت طلال وكان يرد عليها السنترال(ناصر)ويقول لها ان سيارته ماهي موجوده
ولاهو بالبيت
حاولت بيزيد انه يروح بيت طلال يدور عليه,, يمكن لاسمح الله يكون تعبان بغرفته ومو قادر يقوم

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

زفات	دليل الافراح	اكاديميه افراح	تواقيع العرسان	تنسيق ميزانيه الفرح	تولبار افراح	مركز التحميل	اتصل بنا
المتجر النسائي	المتاجر الخاصه	دليل المواقع	العاب افراح	تدريب الالكتروني	الطب البديل	الاسره المسلمه	اعلن معانا
البوم صور افراح	مقالات للعرسان	بطاقات افراح	جوال افراح	المؤثرات الصوتيه	فساتين افراح	كوش أفراح	شبكة افراح

من أروع القصص ((لا تفوتكم )) قصة مشاعل وطلال

الروايات الطويله والمصوره