من أروع القصص ((لا تفوتكم )) قصة مشاعل وطلال

أم وليد · 18-Nov-2007, 10:26 PM

الجزء الحادي عشر

كان طلال يقرا بالرسايل رساله بعد رساله لحد ماوصل لرساله خلت الدم يتجمد بعروقه,,,
رساله ماكانت مرسلتها له ,, رساله هزته هز انجن رجع يقراها مره ومرتين يحاول يستوعب ,,,
مو مصدق الكلام الي بالرساله
رجع يقرأ المسج وطالع باعلى المسج كان مكتوب اسم الشخص الي مشاعل مرسله له المسج
كان اسم وحده من صاحباتها اسمها ((حياه)) واكيد هالشي مو المهم بالنسبه لطلال ان شاء الله
يكون اسمها عفريته خضراء المهم بالنسبه له هو ان الاسم مو راكب مع الكلام الي بالمسج
رجع يقرا المسج ع امل انه يلقى تفسير للي يقراه
كان المسج
"حاتم بليز لاتدق علي لان موبايلي مع ابوي ,, انا اذا هدت الاوضاع بدق عليك"
جلس يفكر حاتم والاسم حياه
طلال"خلاص الموضوع مفهوم ومايبي له شرح,, خويها حاتم وعلشان خايفه من اهلها يشوفوا
رقمه خزنته حياه,,, الحقيره كانت تخوني وانا الي ذابح نفسي من القهر والندم ع الي سويته
,,, وهي كانت تكذب علي وتخوني ,,, وانا الي توقعت انها تغيرت"
سكر عيونه طلال بحزن ونزلت دمعه قهر من عينه وبصوت حزين " مشاعل ,,, معقوله
قطوتي ميشو تسوي كذا ,, انا كنت معاها بكل دقيقه وبكل ثانيه ,, متى لحقت تخوني,, كيف
طاوعها قلبها ,, ميشو ليش ,,, قطوتي انا ربيتك ع يدي ,,,و علمتك كيف تحبي ,,,,وعلمتك
الاخلاص,, ولما خنتي خنتيني انا,,, عمرك ماراح تتغيري,, عمرك ماراح تتركي الغزل
والكذب ياحسافه الوقت الي قظيته معاك"
جر حسرته وندمه ع كل دقيقه ضيعها مع مشاعل ,, البنت الكذابه الي اخذت قلبه وضحكت
عليه طلع من غرفته والي كانت تدل ع رفاهيه بالعيش ,,, كانت جناح مكون من 3 غرف ,,,
الغرفه الاولى والاصغر كانت غرفه ملابس فيها من كل الملابس الي ممكن يتخيلها الانسان
او تخطر بباله مو الولد لبيس يحب الكشخه كانت عباره عن رفوف ومقسمه اربعه اقسام
القسم الاول نسميه القسم السعودي لوووووووول كان عباره عن مجموعه من الثياب
السعوديه والمشالح والشمغ والغتر ودهن العود والجزم وانتم بكرامه وبعض الشرابات الي
تمشي مع الثوب
القسم الثاني نسميه القسم الرسمي وهو عباره عن بدل رسميه يحظر فيها بعض اجتماعات
مؤسستهم لان نشاط مؤسستهم استيراد بعض الاجهزه والمعدات من الخارج ومعظم
اجتماعاته مع اشخاص اجانب فيحتاج دايما للبدل الرسميه ,, وكان يشمل هذا القسم بعض
العطور الرجاليه وبعض الاحذيه الرسميه وبعض الكرافيتات وكانت مرتبه جدا بحيث يسهل
عليه الوصول للي يبي وكان طلال شخص يحب الترتيب جدا بحيث ان الشراب الاسود لازم
يكون جنب الجزمه السوداء والعطر الرسمي لازم يكون جنب قسم الملابس الرسميه وهكذا
كانوا الخدم يتعبوا معاه
اما القسم الثالث كان عباره عن ملابس السبور وبعض ملابس الجيم بالاضافه الى الجزم
والعطور والجل وغيره وغيره كل شي يخص قسم السبور
اما القسم الاخير في هالغرفه وهو قسم البيت ع قولته ,, فيه كل شي يخص لبسه بالبيت من
بيجامات وشورتات للنوم وجزم البيت حتى البيت له شرابات خاصه لوووووووول
واهم شي كريم الي بعد الحلاقه لان الحلاق بعد مايجيه بالبيت ويحلق له يحط كريم الي بعد
الحلاقه بس طلال ينقرف من كريمه يخاف انه استخدمه احد قبله فهو عنده كريمه الخاص
والحلاق متعود ع طلال الي يسميه موسوس لان الحلاق لما يجي طلال يجي ويده فاضيه
بدون امواس وبدون كريمات وبدون اي شي لان طلال يمتلك كل هالادوات لانه مايبي احد
يستعملها وبعدين يستعملها هو مو احتقار للناس بس يحس ان هذا من النظافه ,,, وفكره ان
الشخص يستخدم ادوات استخدمها مليونو واحد قبله هذا شي مقرف ومقزز مثل المشط او
المقص
حتى مره صار موقف له مع الحلاق
الحلاق: بسم الله(مسكين نسى وجاب معاه امشاطه,, وبدا يمشط شعر طلال عشان بيقصه)
طلال: ابعد يامقرف ماتفهم انت ؟؟؟؟
الحلاق ليش ايش سويت
طلال: مدري تبيني اكلمك تركي ع شان تفهم ؟؟؟؟
الحلاق: ايش صاير
طلال: قلت لك لاتلمس شعري باشيائك هذي ليش انا قلت لهم يجيبوا المشط والادوات علشان
تطالعها
مسكين وقتها ارتاع روعه بغى يصيح
بس طلال يحبه ودايما يعطيه القسمه ع قولتهم كان مايحب يحلق الا عنده لانه يضبط له
السكسوكه لوووووووووووووووووووووووول
كان اشطر واحد في محل بلاك هورس ولما يسافر يضطر طلال انه يستعين باحد زملائه الي
بنفس الحلاق بس محد كان يضبط سكسوكته ع قولته الا هالحلاق
نرجع لغرفه طلال كانت هذي بس غرفه ملابسه
اما الغرفه الثانيه كانت غرفه الجلوس وكانت عباره عن كنب مبهر واضح انه باهض الثمن
وتلفزيون 10000000 بوصه يحسسك انك بصاله سينما
وتسمى هذي الغرفه ع قوله اخوياه الغرفه السحريه ليش سحريه؟؟؟
لانك ممكن تحولها لصاله سينما اذا قفلت الانوار لوووووووووووووووول
وممكن تحولها لديسكو وهالشي ممكن تسويه بضغطت زر ع الريموت الي يتحكم بكل شي
بهالغرفه وبهالضغطه تصير الغرفه كلها انوار صاخبه وكانك بدي جي تصير ماتعرف الي
جنبك هو اخوك والا ابوك خخخخخخخخخخخخخخخخخ
وممكن تحولها لغرفه رومانسيه بعد بضغطه زر تتحكم بالنور ويكون نور خااافت ورومنسي
ناهيك عن الموسيقى الرومانسيه الي برضوا ممكن تتحكم برقم السي دي ورقم الاغنيه عن
طريقه
اما الغرفه الثالثه والاخيره هي عباره عن غرفه نوم طلال وهي اكبر غرفه بجناحه كله
الجدار الي يفصل بين غرفه النوم وغرفه الجلوس عباره عن حوض للاسماك ع شكل جدار
((ولاحد يسالني شلون يأكلوا السمك ترى مدري))ماعلينا
وفي وسط الغرفه سرير كبير يكفي ل 4 اشخاص وكانت الوان السرير هاديه والاضاءه
وكل شي مرتب ومحبوك كان السرير مرفوع عن مستوى الارض بثلاث درجات
وموضوع ع الارض الرخاميه بعض السجاد الفاخر
المهم طلال طلع من غرفته والي تطل ع البيت لان غرفته مو جوا البيت كانت في قسم
منفصل وكانها ملحق بس كانت غرفه كبيره
مشى طلال وقطع الارض الخضرا مار بالجلسه الي يسموها ((الدكه)) واكمل مشيه لما
وصل الخيمه وكان اهله متجمعين بالخيمه حاول يتجاهلهم بس ابوه وقفه وناداه
ابو طلال: طلال
00000000000000000000000000000000000000000000000000 00000

أم وليد · 18-Nov-2007, 10:28 PM

ام فهده: فهدوه قومي يله الساعه 4 العصر قومي بياذن المغرب وانتي ماصليتي لاضهر ولاعصر
فهده: يوووووووووووه يمه خليني نايمه ايش عندي غير النوم ترى احنا اجازه
ام فهده: بكيفتس اذا جاء رجلتس يدور عليتس بقول نايمه
فهده فزت من نومها: رجلي ؟؟؟ ليش بيجي؟؟؟
ام فهده: الحين فزيتي يالتسلبه والا يوم اني اقومتس ماقمتي, يوم سمعتي طاري الرجل فزيتي
فهده: يوووووووووه يمه هذا رجلي مايتحملني بس انتم اهلي مظطرين تتحملوني ,, ماتقدرون تتبرون مني
ام فهده: ااااااايه قالوها ,, ادق لامي مافيني حيل وادق لرجلي كلي حيل
فهده باستغراب: ايش ادق,, ادق رقبه يمه
ام فهده عصبت: جعل رقبتس المصع والفهاق ,,, جعلتس الزناج الي يفقع مصارينتس
فهده ارتاعت: يمه حرام عليك بنتك انا ,, وشو هالزناج؟؟؟
ام فهده توهقت ماتدري ايش معناه تسمع امها تدعي عليها به بس ماتدري ايش هو: قومي بس
صلحي شاهي لرجلتس وقهوه ترى داقن على اخوتس يقول بيجي يشوفتس
فهده فزت : يمه ماني فاضيه بتكشخ لرجلي تبيه يقول ايش هالشوشه الي ماخذها
ام فهده: من متى وانتي تنفعيني ,,, بنات الكروش ماعاد ينفعن ماينفعنا الا بنات القروش
فهده بغباء: من بنت الكروش يمه انا ماعندي كرش
ام فهده عصبت من غباء بنتها: بنات الكروش انتي ,,, مو انتي جايه من كرشتي
فهده: طيب ومن هم بنات القروش يمه بتتبني بنت؟؟؟؟ماتوقعت انك بتفقديني لهدرجه لدرجه انك تتبنين بنت
ام فهده : يالخبله الهبله بنات القروش هالشغلات , انا بشب ع صويلح يجيب لي شغاله,, مانسقم بدونها
فهده: يمه خليني اتزوج واخلي رجلي يجيب لك خدامتين
ام فهده تميل شفتها ع بنتها: قطيعه من بتاخذين ,,, ولد عمك حافي منتف
فهدهعصبت: يمه لو سمحتي هو الحين منتف بس توه باول مشوار حياته وانشالله بوقف معاه
لحد مايصير مليونير
دخل صالح معصب مثل كل يوم من الشمس والحر
صالح : وش هالحر الي يصلا صلي ,,, هذا واحنا تونا باول الصيف اجل اذا جانا طباخ التمر وش بنسوي؟؟؟
فهده بصدمه: يمه بتجيبون طباخ تمر مره وحده,, الناس اول يجيبوا طباخ عادي وانتم ماشالله مره وحده طباخ تمر
بعدين من متى التمر يطبخ؟؟؟ الى اعرفه انه يوكل من النخله ع طول
صالح يطالع امه بصدمه
ام فهده: لاتستغرب ياوليدي مهيب صويحيه من عقب مااعرست ,, يالخبله طباخ التمر هذا
احر شهر في الصيف من حرارته سموه طباخ التمر لانه يستوي التمر فيه من الحراره
صالح: ايه وفيه العقارب
فهده: ايش هالعقارب بعد
ام فهده : اسفهها بس وانا امك وخلني اروح اصلح الشاهي والقهوه للرجال
فهده: اها قصدكم طباخ التمر هو شهر اوقست(اغسطس)
صالح يناظرها بعين شريره: منهو قرست ذا؟؟؟ صديقتس؟؟؟ يالتسلبه
فهده : اووووووه ايش صديقي هذا شهر اسمه اوقست واذا مو مصدقني روح افتح موبايلك وتلقاه مكتوب
تلقاه بالتاريخ
توهق لانه مايعرف انقليزي معذور ماكمل الابتدائي :"""""""""""""(

أم وليد · 18-Nov-2007, 10:31 PM

ابو طلال: هاه طلال مااقتنعت ياوليدي انك تمسك اداره فرع مؤسستنا الي في امريكا
طلال بعد ماتذكر خيانه مشاعل: والله يبه انا فكرت وقررت اني راح امسك مؤسستنا الي هناك
ابو طلال: بيض الله وجهك ,,, هذا ولدي طلال ,, انا عارف انك ماراح ترد لي كلمه
طلال: ابشر يبه متى تبيني اباشر الشغل هناك
ابو طلال: شوف اقرب طياره رايحه هناك
طلال: ابشر ,,,بس يبه عندي طلب
ابو طلال: لك ماطلبت
طلال: يبه ماودي الموظفين الي هناك يكون عندهم خبر اني بكون عندهم
ابو طلال استغرب : ليش ياولدي ابيهم يستقبلوك
طلال: يبه انا ابي اشوف الشغل شلون ماشي هناك ,,, انت عارف اني احب النظام وماحب
التلاعب بالشغل ,, وابي اعرف اذا الشغل ماشي مثل ماتركته
ابوطلال اعجب بتفكير ولده ,, كان دايما يوجه ابوه مع ان ابوه عنده خبره ,, ولولا الله ثم
خبره ابو طلال ماكان جمع هالاموال والثروه ,, ويبدو انه ورث ولده طلال الذكاء الحاد
وسرعه البديهه ,, ومن كان صغير وهو مع ابوه وهالشي بعده عن امه كثير ,,, كان يسافر
مع ابوه ويحظر اجتماعات,,, حتى لما كان ب10 سنوات كان يهمتم بكل شي ,, واخذ من
طبع ابوه الكثير والاهم انه اكتسب من ابوه الخبره ,, اما نواف فهو دلوع البابا ,, كانت
رغباته وطلباته اوامر بالنسبه لابو طلال ,,,ابو طلال لما يدخل مجلس يفزون له الرجال
ويعملون له الف حساب ,, اما عند ولده نواف فهو ضعيف ومايقدر يقاوم دلع ولده
نواف بدلع: بابا ودي اغير لوحه سيارتي
طلال منصدم: ايوه يالشيخ طال عمرك ,, ليش ايش فيها لوحتك
نواف: مالك دخل انت انا اكلم بابا
طلال: احترمني ياحمار انا اخوك الكبير
ابو طلال : طلال شلون تبيه يحترمك وانت تقول له ياحمار
طلال: منت شايف ايش يقول يحمد ربه مافيه ولد بسنه عمره 10 وعنده همر ,,, وحظرته يبي يغير اللوحه
ابو طلال: ماعليك منه اذا دفنتني هذيك الساعه سيطر عليه,,, حبيبي نواف ليش تبي تغير لوحتك
نواف يطالع طلال بنظره انتصار: بابا لوحتي مو عاجبتني ,, ابي لوحه مميزه
ابو طلال: طلال كلم ابو بندر الي بالشرطه خله يشوف لنواف لوحه زينه ومايهم السعر
طلال منصدم: بابا تدري ان اللوح الحين صارت بالميه والميتين الف ,,, ترى ولدك بزر
ويحمد ربه انك شاري له سياره فوق الثلاثميه الف يبه انت تدلعه
ابو طلال: طلال شفيك ع الولد الحمدلله عندنا خير وماظن اننا بنخسر فلوسنا اذا جبرت
بخاطر الولد ,,, كلها لوحه
نواف: ايه بابا وقول لولدك اني ابي لوحه فيها ستات ,, يعني لو فيه ن ن ن 666 ابيها
طلال اتشت اخلاقه: وليه ياطويل العمر تبي ن ن ن
نواف: علشان اول حرف من اسمي ,, والستات عشان البنات
طلال منصدم: وانت ايش عرفك بهالحركات
ابو طلال مبسوط: هههههههه خل الولد ينبسط ,,, خلاص حبيبي طلال بيشوف لك اللوحه
واذا مو موجوده بندور لك اي لوحه فيها 666 امر بس
نواف: لا بابا مابي طلال هو الي يدور لي,,, اكيد بيجيب لي لوحه خايسه
ابو طلال: ولايهمك انا الحين ادق ع الرجال ونروح انا وياك نشوف اللوح واللي تبيها بس اشر عليها
نواف: ايه وبابا ترى ابي اركب جنوط ,, فيه محل اعرفه بالتحليه صديقي صاحب المحل
طلال: ومتى صادقته ان شاء الله
نواف بغرور: تعلم كيف تتعرف ع الناس لازم تكون اجتماعي ,, ابد كنت رايح لمحله وشفت
الجنوط الي عنده واعجبتني الجنوط المراوح ,,, بس هو امين نصحني وقال تراها قديمه فيه
انواع احلى واجدد
طلال: ايه ع شان هالنصيحه الي بيلعب عليك فيها وبيسحب فلوس هالضعيف ابوي صار
صديقك هاه
نواف : اصلا انا حاط ايقنور عليك من زمان لاتكلمني بس,, بابا ابي اوريك شي بموبايلي
ابو طلال: هاه حبيبي ايش؟؟؟
نواف فتح موبايله وكان يوري ابوه صوره جمس يدور بالتحليه كان حاط بجمسه سترس كله
نواف: يبه ابي اسوي مثل هذا
ابو طلال: بس حرام حبيبي سيارتك تونا مطلعينها وجديده ليش تخربها بهالخرابيط
طلال قط وجهه وشاف الصوره: انا اموت واعرف ايش عرفك بهالاشياء
نواف: امس لما طلعت انا واخوياي التحليه ومرينا توتي كفي شفنا هالجمس واعجبني وصورته
عشان ابوي يسوي لي مثله
طلال كان يطالع ابوه مو معقوله انه طبيعي الحين يعطي سياره لولد عمره 10 قيمتها فوق 300
الف هذا غير اللوحه والجنوط والحركات الي بيسويها بتطق المليون ,, انهبل الشايب
طلال: يبه لاتكون بتسوي الي يقول عليه
ابو طلال خايف من طلال ويغمز لنواف ان طلبه مجاب: المهم ماعلينا انا بروح اتوضى ترى بياذن
المغرب يله عشان نلحق الصلاه
بعد ماطلع ابو طلال منحاش من طلال الي مل من نصايحه
طلال: نوافوه
نواف: خير
طلال: ابي صرف 500
نواف بغرور: مامعي
طلال: اقول لاتتغلى انا ادري انك تملك بالبيت اكثر من الي املكه بالبنوك,, اخلص روح جيب لي
نواف: ايش تبي بالصرف
طلال: ابي اعطي السواق فلوس يروح للمحطه يعبي سيارتي بنزين
نواف: لا حبيبي انت ديونك كثرت ومقدر اسلفك
طلال مستغرب: ديوني ,, متى اخذت منك يالنصاب؟؟؟
نواف: تتذكر لما جاك الحلاق وخذت مني 100 وانا قلت لك باخذ عليك 50 كل يوم تاخير
ماترجع لي فلوسي ولك الحين اسبوع يعني 7 في 50 يساوي 350 هاتهم بس لاعلم ابوي
طلال: يالكلب تاخذ فوائد ,, حرام ربا
نواف: ماعلي منك هات الفلوس واصرف لك 500 ,,, وبعدين لاتعتبرها ربا اعتبرها صدقه
لاني ماشرطت عليك الفوائد لما سلفتك
طلال انقهر من هالولد دايما يلقى له مخرج: ايش عرفك بهالكلام
نواف: سالت ابوي ,, وقال لي اذا قالوا لك ربا قول انا ماشرطت
طلال : طيب انت خذ 500 واحذف منها 350 يبقى لي 200
نواف : ههههههههههه كان غيرك اشطر ,, باقي 150 ,, المهم ايش تبيها عشرات والا ميات والا خمسينات
طلال يستهبل : لا ابيها ريالات
نواف: اوكي دقايق اجيبها
طلال منصدم: ليش عندك ريالات تكفي 150 ؟؟؟
نواف: لا عندي ريالات يمكن تجي لها 50
طلال: والميه ؟؟؟؟؟؟؟
نواف: الميه ياحبيبي لي,, لان قيمه طلعتي من الخيمه 20 ومشيتي لما اوصل للبيت 20
ودخلتي للبيت 20 وطلعتي الدرج 20 ولما ادخل غرفتي وافتح المكان السري الي اخبي فيه
فلوسي 20
طلال: يابعد عمري وماتبي لرجعتك 100 بعد
نواف : لا لاني ماراح ارجع, انت صاحب الحاجه الحقني لغرفتي
طلال: طيب صله الاخوه مالها اعتبار عندك؟؟؟
نواف: لا اسف ,,, يله تبي فلوسك انا بغرفتي
وطلع وخلاه
طلع طلال من الخيمه واتجه للمكان الي كان رايح له قبل يناديه ابوه
راح لما وصل البوابه ودخل غرفه الحارس
طلال: ادم
ادم: سم
طلال طلع موبايل مشاعل وتاملت لاخر لحظه :اسمع ياادم بعطيك الموبايل هذا ,,, وخله معاك
لما يدق عليك صاحب الموبايل قول له انك لقيته عند محل طايح ,,, وانك تنتظر صاحبه يدق
ع شان تسلمه له
ادم مستغرب: ابشر ياعم ,, بس متى بيتصلوا
طلال: والله مدري ,, المهم خليه معاك ان شاء الله سنه بس رد ع اي مكالمه ,, واصحى تستخدمه
ادم : ابشر طال عمرك ,, بس اذا طلبوا يرجع لهم الموبايل ,, اخليهم يجوا هنا ياخذوه
طلال: لا خذ اي سياره من سيارات البيت ووده لهم
ادم كان محل ثقه طلال كان من اوفى العمال واخلصهم ,, وهو الشخص الوحيد الي يثق انه
يخلي موبايل مشاعل معاه,,, وخاصه انه مو سعودي يعني لما يتصل اخو مشاعل والاابوها
يدوروا ع الموبايل ماراح يشكوا في مشاعل لان لو سعودي الي رد راح يستغربوا شوي
بس اجنبي مافيه امل يشكوا فيه او يشكوا انها تعرفه
وبعد هالخطوه لطلال ,,, قرر بان مشاعل انتهت من حياته للابد ولايبي اي شي يربطه فيها
او يربطها فيه ,,, وهذي كانت نهايه علاقه طلال بمشاعل ,, نهايه الحب الي ممكن يكون اسطوري
لكن تجري الرياح بما لاتشتهي السفن
00000000000000000000000000000000000000000000000000

أم وليد · 18-Nov-2007, 10:34 PM

مشاعل كانت تحاول تتاقلم نفسيا للهم الي راح يجيها ,, بكره الصبح موعد خروجها من
المستشفى ,,,راح تطلع للبيت الي عاشت فيه وهي صغيره بكل مكان فيه ذكرى ,,, كل مكان
كان له احساسه بس الحين ماتقدر تعيش هالذكريات ,,, لانها ببساطه ماراح تقدر تشوفه
كان يوم طويل ومتعب بالنسبه لها زارها ابوها وام مشعل الي من اول مادخلت ماسكتت من
الصياح وزاروها سعود ومشعل وزوجه مشعل الي كان زواجه هو حديث البيت قبل مشاعل
ماتدخل المستشفى
كانت الساعه 9 الحين طلعوا اهل مشاعل لان وقت الزياره انتهى
دق التلفون وكان الي يدق يستنى ان وقت الزياره ينتهي
مشاعل: الو
نايف بتميلح: مساء الخير
مشاعل عرفته: نعم
نايف: قلت مساء الخير ليش الجفاف بالرد
مشاعل في نفسها يالله ع المصاله : هلا اخوي من معي
نايف: يعني ماعرفتي صوتي؟؟؟
مشاعل تقلد تميلحه: لا ماعرفت صوتك
نايف: انا نايف ,,,مشغوله او عندك احد؟؟؟
مشاعل: اتوقع تجيك الاخبار اول باول اكيد تعرف ان الي عندي طلعوا ليش تسالني
نايف: ليش معصبه فيه احد مضايقك
مشاعل: ايه
نايف: مين وشوفي انا ايش اسوي له
مشاعل: فيه واحد يزعجني يدق ع غرفتي ويتميلح تقدر تسوي له شي؟؟؟ وبصراحه هو ثقيل
دم وماينطاق
نايف باهتمام: عطيني رقمه وانا اوريك فيه
مشاعل: والله انا ماعرف رقمه ولايشرفني اعرفه ,,, بس هو يكلمني الحين
سكت من الصدمه
مشاعل : اسمع يااخ يمكن انت متعود ان فيه بنات يستقبلوك بكل حب وحنان ,, بس اصابع
يدك مو سوا ,,, انا بنت مالي بهالحركات اوكي,,, وممكن تحترم نفسك وماتدق علي مره
ثانيه
نايف: بس انا ماصار مني اي غلط
مشاعل في نفسها "ابو الكرامه الي تعرفها" : اوكي يااخ ماصار منك غلط بس انا انسانه
فيني حاله نفسيه اذا حاول واحد يغازلني ,, يجيني انهيار عصبي حاد وممكن ادخل بغيبوبه
سنه,,,تخيل واحد حاول يغازلني بالسوق وشوف ايش كانت النتيجه هذا انا بالمستشفى ,,
فارجوك لاتدق
نايف خاف لانه كان متاكد ان البنت متهوره الي حاولت تقتل نفسها اكيد بتسوي اي شي
00000000000000000000000000000000000000000000000000 00000
ساره كانت مصممه انها تنفذ خطتها الي راح تدمر طلال كليا,, فكرت وخططت بس باقي
التنفيذ,,كانت محتاجه شخصين ,,, الشخص الاول هو صاحبتها سابقا ((منال)) والي كانت
مشاعل تمنعها انها تروح لها او يكون بينهم اي صله وحبها لمشاعل خلاها تقطع هالبنت
ومنال بتكون هي الي تنفذ اول الخطه ,, اما الجزء الثاني من الخطه كانت معتمده ع حسين
,, بس للاسف حسين خذلها وطلع جبان لما عرف الخطه وبالاخص اذا كان صاحب الموضوع
طلال ,, هنا كانت محتاره ماتدري مين تختار ,, تبي شاب ثقه وكل الي تكلمهم مو ثقه,,, تبي
واحد مجرم ,, مو واحد راعي غزل,, بس مين ,,, فكرت انها لازم اول تركز ع الجزء الاول
من الخطه ولما تنفذه راح تفكر مين ممكن تستعين,, ومثل مايقولوا حامي بحامي دقت ع
البنت والي تشكل الجزء الاول من الخطه
ساره: هاااااااااااااااااااااااااي منوله
منال: هايات سارونه وين الناس توك ذكرتي ان عندك صاحبه
ساره: شسوي مشاغل الدنيا بس مانسيتك ابد قلت اتصل اشوف اخبارك
منال: ياحبيبتي ,,, انا تمام الحمدلله ,, ولو ان صدري تاعبني هالايام
ساره ببراءه: سلامتك ,, ليش عندك ربو؟؟؟
منال: ههههههههههه لا ياقلبي غيرت نوع الدخان وذبحني صدري
ساره: اها ,, حبيبتي ودي اشوفك ابيك بموضوع
منال: تعالي انا فاضيه
ساره: ماعندك احد ((كانت ساره خايفه لايكون عندها احد لان البنت واحد داخل ببيتها وواحد طالع))
منال بنت عايشه مع امها ,,, والي من مات زوجها وهي مشغوله عن بنتها بالطلعات
والسفرات وحاليا هي مسافره وبنتها لوحدها بالبيت
منال: لا تعالي ماجد توه طلع من عندي
ساره: مين ماجد ابوك
منال: هههههههههه ابوي لي 3 سنوات ماشفته ,,, لا ماجد هذا البوي فريند حقي
ساره: اها اهم شي طلع هو
منال: ايوه تعالي
ساره : اوكي انا اصلا ماراح اطول
منال: عندي احساس انك تبي تديتي عندي
ساره: اديت؟؟؟
منال: تبي توهميني انك ماتكلمي وماتديتي؟؟؟
ساره : اوكي اكلم بس ماتوصل اني اديت
منال: هههههههههههههه ياحليلك المهم استناك
ساره: يله مسافه السكه
00000000000000000000000000000000000000000000000000 00000

أم وليد · 18-Nov-2007, 10:38 PM

استسلمت مشاعل للنوم في وقت مبكر ,,, بس قبل النوم اكيد مانست الحوار الي يدور كل
ليله حتى بهالضروف كانت ماتقدر تنام لحد ماتأنب نفسها ع كل الي مر لها
صحت ميشو ع صوت خطوات جايه من الغرفه الي جنبها وحست بهذي الخطوات تطلع من
الغرفه الي جنبها وتقرب من غرفتها,, كان المستشفى هااااااااادي ومافيه صوت غير صوت
هالخطوات الي تقرب منها اكثر واكثر
اختفى صوت هالخطوات عند باب مشاعل كانت تتمنى تهرب ,, كان واضح ان الشخص
واقف ورى باب مشاعل
سمعت صوت فتحت الباب وكأنه إنفجار كان الشخص مبين عليه معصب او زعلان ,,, حست
بحقده عليها من مشيته
بدت تقرب الخطوات منها اكثر واكثر لحد ماوقفت عند سريرها
مشاعل برعب : مين انت ,, انت الي امس كنت هنا ,, انت مين؟؟؟ ايش تبي مني؟؟
كان ساكت بس حست بتنفسه يدل ع انه شخص في موجه غضب حاااده
وبسرعه وبدون مايترك لمشاعل فرصه تدافع عن نفسها
سحب مخده مشاعل من تحت راسها بعنف ,,, ودفن وجهها تحت المخده
كانت مشاعل تحاول تقاوم ,, تحاول تبعد المخده عن وجهها,, ماتقدر تتنفس,,, حاولت تتنفس
بس كانت انفاسها مكتومه مخنوقه ,,, حاولت تضرب يده او تبعدها ,, بس كان اقوى منها ,,
بكل مقاومه تقاومها مشاعل كان يقوي ضغطه ع المخده
بدت مشاعل تقاوم وتقاوم وتحاول تدف هالشخص الغريب وبأكبر ماتملك من قوه قدرت
توصل ليده حاولت تبعده عنها ,,, حست بيده تهزها وتهزها وفجأة .....

من هالشخص الي له مصلحه يقتل مشاعل ,,معقوله طلال يقتلها لانها خانته؟؟؟, يمكن ام
سلطان لانها تكرهها , وليش مايكون غسان ,,, والا يمكن نايف الي اهانته ,,, احتمال يكون
شخص مجهول ,,,,

الآن بدت تتضح ملامح خطة سارة المجنونة لكن بقى نعرف تفاصيلها

ان شالله بالجزء الجاي راااااااااح نعرف كل هذا ؟؟؟

*ميار* · 19-Nov-2007, 03:13 AM

وااااااااااااااااااااااااااااااااااااااااو
تسلمين أم وليد
لكن لاتتأخري علينا اليو
وأرجوكــــِ تنزلي أجزاء كثيره

أم وليد · 19-Nov-2007, 09:48 AM

هـــــــلا بكل الحبايب اللي متابعين معي الأحداث

أخاف ينقطع النت عندي اليوم لذلك بحاول أنزل جزء كبير اليوم يصبركم للوجبة اللي بعدها >>تسمع بدعاية السنكرس

بس أنتو بعد اقروا شوي شوي عشان ماتخلص الرواية بسرعة

ياللاه بنات ...

البارت 12

أم وليد · 19-Nov-2007, 09:52 AM

بدت مشاعل تقاوم وتقاوم وتحاول تدف هالشخص الغريب وبأكبر ماتملك من قوه قدرت
توصل ليده حاولت تبعده عنها ,,, حست بيده تهزها وتهزها وفجاءت
سمعت صوت الممرضه كانت خايفه: ويك اب ,,,ويك اب
مشاعل : انا وين
الممرضه: انتي فيه مستشفى ,,, انتي في نوم بعدين انا يسمع انتي فيه صيه
مشاعل : الحمدلله انه حلم الحمدلله
التفتت يسارها ونفثت وتعوذت من الشيطان
حمدت الله انه كان حلم لانها كانت ع وشك الموت
مشاعل في نفسها" ليش مااشوف كوابيس بعد الي صار ,, فقدت اغلى انسان وبعدين كنت
اواجه الموت ولما الله انقذني من الموت فقدت نظري ,,, وتفكيري بالشخص الي امس كان
بالغرفه ,, كل هذا اكيد بيجيب لي كوابيس"
حست انها ماتقدر تكمل نومها كان ودها تقرا قران بس .... ماتقدر ,, قرت الي حافظته
وحاولت ترجع تنام
00000000000000000000000000000000000000000000000000 00000

أم وليد · 19-Nov-2007, 09:54 AM

فهده تكلم زوجها
فهده: شلون اشتقت لي وانت اليوم شفتني
عبدالمجيد: لو اشوفك 24 ساعه مامل منك
فهده متشققه من الوناسه: اووه خلاص استحي
عبدالمجيد يضحك: ياقلبي ع الي يستحون
فهده: عبدالمجيد ماقلت لامك ع الموضوع الي قلت لك عنه
عبدالمجيد: قلت لها بس تقول دفعنا نص المبلغ وماراح يرجعوه لنا
فهده: بس المكان مره قروي ,, ودي يكون زواجي بمكان حلو بصراحه استحي اعزم صاحباتي
عبدالمجيد: انتي عارفه حالتي الماديه قبل تتزوجيني ايش تغير؟؟؟؟؟
فهده: ماقلنا شي ,, انتم ادفعوا النص واحنا النص ونحطه بمكان حلو
عبدالمجيد: حبيبتي الكروت انطبعت ,,, وكل شي جاهز ,, ترى باقي اقل من اسبوعين واكون اسعد رجال بالدنيا
كانت فهده مخفه اي كلمه حلوه يقولها عبدالمجيد ينسيها كل شي
فهده: طيب وكروتنا متى راح تجيبها
عبدالمجيد: صراحه المفروض اليوم جبتها بس قلت لا,, عذر عشان اشوفك بكره
فهده خلاص ميته من الفرح اخيرا بتطلع من هالبيت ,, وبتتزوج ولد عمها الي اكيد حبته
لانها ماتعرف غيره,,, ويكفي انه ولد عمها ولازم تحبه ,, وغير انه زوجها
قفلت فهده واخذت ورقه وراحت عند امها عشان تدون فيها اسماء الناس و البنات الي راح تعزمهم
عبدالمجيد قال لها انه راح يعطيها 85 كرت قررت انها تاخذ 55 لها و30 لامها هذا اذا
وافقت امها ,, وزي ماتوقعت امها رفضت وقالت خليني اخلص من اسماء الحريم الي
بعزمهم وبعدين خذي الباقي,, انقهرت من امها ,, بتعزم ناس قراوى يجون يتعشون
ويروحون وهي تبي احد يحيي الزواج ,, وتبيه كله بنات ماتبي عجايز,, بس امها والله ماتخليها
ام فهده : يله اكتبي اسماء خالاتك وبناتهم وحريم عيالهم
فهده: كتبتهم يمه كلهم 17
ام فهده : وزوجات خوالك وبناتهم وحريم عيالهم
فهده بطفش: كتبتهم وعددهم 15 للحين وصلنا 32
ام فهده: حطي عماتك وبناتهم وحريم عيالهم
فهده: ماتبين تعزمين شغالاتهم بعد
ام فهده: خلي عنتس البربسه وكملي
فهده : طيب عددهم 9 للحين وصلنا 41 والحين طبعا عماني وزوجاتهم وبناتهم وحريم
عيالهم خلاص حفظت الموال
ام فهده: ايه واكتبي جارتهم احبها وش حليلها
فهده: يمه انتي تحبيها مو انا
ام فهده: وانا منيب امك ,, ماقلت عليك يابا الفرج؟؟
فهده: قلتي ,, المهم هذول القوم مع جارتهم عددهم 38 وصلنا 50 خلاص يمه باقي 35 بعزم صاحباتي
ام فهده: مهبولتن انتي تبين الناس يزعلوا علي كملي بس,,, اكتبي جارتنا ام و..و...و...
وبناتهم وحريم عيالهم
فهده قفلت اخلاقها: الحين الحريم اعزميهم بس بناتهم وحريم عيالهم ليش؟؟؟؟؟
ام فهده: تبيهم يزعلون لاني ماقدرتهم وعزمتهم ,,, والله ماتطلع مني
فهده: طيب يمه خلاص ماباقي الا 12 كرت خليهم لي
ام فهده: طيب اخر شي اعزمي مرت المقاول ,, ومرت الهندي الي في المحطه ارحمها ودها
تشوف عرس السعوديين
فهده معصبه: وماتبين مرت الي يشتغل بالبقاله ,, والا تبي تعزمين مثلا مرت الخباز ترى عادي
ام فهده: احمدي ربتس باقي لتس 10 كروت
هنا دخل صالح : ايش تسوون
ام فهده: نكتب الاسماء الي بنعزمها
هنا فهده تبي تشكي لاخوها يمكن ينقذها ويتوسط عند امها وتخفظ من عدد المدعوين الي
ع قولت فهده قراوى,, بس ماامداها تتكلم لانه تكلم قبلها وحطمها
صالح: اقول فهده اعملي حساب 4 كروت لي بعزم اهل صديقي وطلع
فهده راحت غرفتها تبكي 6 كروت مين بتعزم
اكيد ميشو وسارونه ومهاوي هذول اساسيات
وبتشوف الثلاثه مين بتعطيهم لانها ماتبي تعطي احد وتزعل الثاني
خلاص زواجها الاثنين واليوم السبت يعني بالضبط باقي عليه اسبوع ويومين
00000000000000000000000000000000000000000000000000 00000
ساره: لا اسفه منال انا ماشرب معسل
منال: ياغبيه هذا معسل تفاح ,, يخلي راسك يمخمخ
ساره بخوف: منال رجاء لاتضغطي علي
منال: الي يريحك بس اذا حبيتي تفكري وتخططي لشي مثل الي قلتي لي يبي لك مخمخه
ومافيه مثل المعسل يخليك عال العال
ظلت تقنعها وتقنعها وان نفس واحد ماراح يخليها مدمنه بعدين المعسل كيف ماهو ادمان
اقتنعت ساره ونفس جذبها له وبدت النفس الثاني والثالث وهكذا
ساره: واو طعمه يجنن
منال: قلت لك
ساره: احس راسي ثقيل
منال: ههههههههههه توك جديده ,,, بس والله انك فنانه تعرفي تطلعيه مع خشمك
ساره: هههههههههههههههههههههههه لو تبي من اذاني طلعته
منال:ههههههههههههههههههههههههه لا خليها ع خشمك ,, المهم ماقلتي لي كم تبين من كيلو حشيش
ساره: مدري الي يكفي انه يدخل شخص السجن
منال: ههههههههههههههه حسبتك بتكيفي عليه ,,, بس الحشيش غالي
ساره: كم يعني
منال: صدقيني منتي قده وخاصه انك بتشترين كميه كبيره عشان تحطيها بسياره الولد
وتوهمين الشرطه انه يبيع حشيش
ساره: ايه هذا الي بسويه
منال: بس ودي اعرف ليش انتي حاقده عليه لهدرجه
ساره : موضوع خاص
منال: طيب ليش ماتاخذي شي ارخص
ساره: مثل ايش ؟؟
منال: خذي حبوب هلوسه الي يسموها قضوم وياخذوها الطلاب ايام الاختبارات ,, ياخذ له
كم شهر بالسجن
ساره: وكم سعرها هذي
منال: يعني ممكن اتوسط لك يبي لك كميه لابأس بها تقريبا 400 حبه 50000
ساره انصعقت: 50000 مجنونه انتي,,, اشتري بها شنطه لي ولا اشتري بها مخدرات
منال: تحسبين المخدرات رخيصه ,,, حبيبتي هذي تكسب ذهب
ساره: اعوذ بالله فلوس حرام
منال:هههههههههههههه ماعلينا ايش قلتي اقول للرجال؟؟
ساره: لا خليني بفكر
جت الخدامه تقول ان فيه احد عند الباب يبيها ,,, وقالت للخدامه انها تدخله
ماجد : هلا حبي
ساره انصدمت ايش هالوقاحه يدخل ويطلع ببيتهم ع كيفه وايش هالبنت الي مخليه بيتهم
للداخل والطالع
ماجد ماكان لوحده ,, كان معاه وليد صاحبه
وليد كان وسيم ويشبه الممثل احمد عز مررررررررررررررره
هنا ساره صح كانت خايفه بس سعبلت لما شافته ,, تقدر الجمال ,,, وماتقدر تقاوم الشاب الوسيم
وليد: مالك حق يامنال ليش ماقلتي ان القمر عندك اليوم تعبنا ندوره
منال: لاتقرب منها ترى البنت عندها رده فعل غريبه الحين تهجم عليك
وليد طالع ساره بنظره خطيررررررررررررررررررررررررررررررره : ممكن بعد اذنك
احكي معاك شوي
ساره: لا بطلع انا
وطلعت بسرعه لما وصل الباب كان وليد يلحقها
وليد: اوكي انا مابي احرجك او ازعجك بس ممكن اعطيك رقمي ,, مقدر انام اليوم قبل اسمع صوتك
ابتسمت وخذت رقمه
في السياره شالت طرحتها وصار تقطع بشعرها (هبلا) وتصارخ لدرجه ان السواق وده
يرميها بالشارع ازعجته ماخلته يركز بالسواقه ,,, منجنه ,, راحت لمصر مرتين علشان
احمد عز بس مالقته ,, والحين قابلت واحد نسخه منه ويتغزل فيها ,,, كانت تبي تدق بالسياره
ساره في نفسها" سويره اعقلي لايقول هالمطفوقه المشفوحه ,,, خليك ثقل مثل ميشو ,, ميشو
ثلاث ارباع الشباب منجنين عليها لانها ثقل ماتعطيهم وجه ,, وتسمعهم الكلام الحلو بالقطاره
لازم اثقل "
00000000000000000000000000000000000000000000000000

أم وليد · 19-Nov-2007, 09:56 AM

break time

أمـــا فهدة هذي شي ...

بالله وش رايكم فيها هي وعايلتها التحف ؟؟؟

والله غصب أضحك منها ومن غباء أهلها ,,, ولسه بتشوفون ليلة زواجها وش الموقف اللي بيصير لها مع زوجها

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

زفات	دليل الافراح	اكاديميه افراح	تواقيع العرسان	تنسيق ميزانيه الفرح	تولبار افراح	مركز التحميل	اتصل بنا
المتجر النسائي	المتاجر الخاصه	دليل المواقع	العاب افراح	تدريب الالكتروني	الطب البديل	الاسره المسلمه	اعلن معانا
البوم صور افراح	مقالات للعرسان	بطاقات افراح	جوال افراح	المؤثرات الصوتيه	فساتين افراح	كوش أفراح	شبكة افراح

من أروع القصص ((لا تفوتكم )) قصة مشاعل وطلال

الروايات الطويله والمصوره