إيزي نت واكبر عمليات النصب من الإتصالات السعودية

ابنقل لكم توضيح قرأته علي لسان موظف بأحدي شركات الانترنت يقول فيه :

بما اني خبره وبما انه واضح ان فكره ايزي نت اصلا ميب مفهومه انا راح اشرح لكم الفكره.

قبل كم سنه ظهرت خدمات انترنت شبه مجانيه بكذا دوله .. مافيه انترنت ببلاش لكن فيه انترنت فوق البيعه .. أول دوله عربيه طبقت النظام هذا حسب علمي كانت مصر .. الفكره قائمة على نفس مبدأ ال 700 .. يعني بدال ما انت تروح للشركه وتدفع لهم فلوس ويعطونك اسم مستخدم وكلمة مرور (او تشتري بطاقه لانها نفس الفكره) يقول لك انت اتصل على رقم يبدأ ب 07 (الخدمة اصلا اسمها 900 لانها بدأت بامريكا وكانت بداية الارقام 900 .. عندنا بالسعوديه 700 وبمصر 07 وبالبحرين 900 وهكذا) فأنت لما تدق على الرقم هذا تاخذ انترنت ببلاش بدون اسم مستخدم وكلمة مرور بس تدفع اكثر من قيمة الاتصال العادي على فاتورة التلفون .. فرق السعر يروح لشركة الانترنت اللي قدمت لك الخدمه.

بما ان الخدمة تواجدت في كذا دولة وبما ان ربعنا يموتون بالفلسفه اذا كانوا موب مسؤولين عن الشغلة ازعجت مدينة الملك عبدالعزيز العالم تقول لازم تصير نفس الخدمة موجوده بالسعوديه .. طبعا اللي يسوي مثل الخدمة هذي شركة الاتصالات .. وقتها شركة الاتصالات اقترحت الفكرة على مقدمي خدمة الانترنت ومقدمي خدمة الانترنت رفضوا .. السبب في الرفض كان خلاف على طريقة الحساب .. شركة الاتصالات قالت حنا نحسب مجموع الدقايق اللي جت على ارقامكم ونخصم منها قيمة فواتيركم ونعطيكم الزياده .. مقدمي الخدمة رفضوا .. قالوا حنا اللي نبي نحسب عدد الدقايق .. يعني بالعربي سبب عدم تقديم الخدمة في ذلك الوقت (قبل حوالي 3 الى 4 سنوات) كان عدم وجود ثقة متبادله بين شركات الانترنت وشركة الاتصالات .. طبعا سعودي نت وافقت على كلام شركة الاتصالات بحكم انه وحدة تجارية تابعه لشركة الاتصالات بس هنا شركة الاتصالات هي اللي رفضت والسبب انها قالت لو قدمت سعودي نت الخدمة في وقت ماقدمته فيه شركات الانترنت الثانية يبي يقولون هذيمنافسه غير شريفة وماراح احد يصدق ان شركات الانترنت هي اللي رفضت تقدم الخدمه.

في ذلك الوقت كانت شركة الاتصالات هي الكل في الكل بسبب عدم وجود جهة حكومية لها صلاحية التخطيط والتنفيذ لاي شئ يتعلق بالاتصالات (بعد فصل الشركة عن الوزارة) وبنفس الوقت شركة الاتصالات تبقى مجرد شركة وليست جهه حكومية وفوق كذا شعرتهم حمراء وكل يدور عليهم شئ سواء كانوا مخطين والا لا.

تقريبا صرف نظر عن المشروع بشكل نهائي في ذلك الوقت .. الين تم تأسيس هيئة الاتصالات وصارت هي الجهه الحكومية المسؤولة عن التنظيم واصدار القرارات وفرض تنفيذها .. هيئة الاتصالات قامت على تنفيذ عدة مشاريع لتنظيمات كانت جاهزه من قبل بس متوقفه لاسباب مختلفه (مثل اضافة خانة جديده لرقم الجوال وايزي نت وخلافه)

طبعا يوم جت الهيئة تصدر القرار قررت ان التعرفة تكون موحده لجميع الشركات واللي عاجبه يقدم الخدمه واللي موب عاجبه هو حر يبقى ببطاقاته فاللي حصل ان كل الشركات بلا استثناء وافقت على تقديم الخدمه (وبنفس التنظيم والشروط حقة شركة الاتصالات الاوله)

بنفس الوقت صدر قرار بتخفيض رسوم خطوط البيانات سواء كانت ليزد لاين او دي اس ال او دايل اب .. فتم تخفيض رسم الدي اس ال من 220 بالشهر الى 120 والليزد لاين تم تقديم تخفضينات مختلفه عليه (حسب نوع الخط وسرعته) والدايل اب تم تخفيضه من 3 ريال بالساعه الى 2.25 (ريالين وربع بالساعه) وتم تحديد تعرفة ايزي نت ب 3 ريال بالساعه (اللي هي سعر الانترنت القديم قبل التخفيض).

يعني انت لما تستخدم ايزي نت تصير كأنك اشتريت ساعة الانترنت من مقدم الخدمة ب 75 هلله .. باسلوب آخر لما تشتري بطاقة انترنت 40 ساعه ب 30 ريال وتتصل على 360 تصير دافع نفس تكلفة ايزي نت بينما لو اشتريت الساعه بسعر ارخص تصير ايزي نت اغلى .. يعني لو اخذت بطاقة 50 ساعه ب 30 ريال مثلا او 25 تبي تطلع عليك التلكفه اقل من لو استخدمت ايزي نت .. اما لو كنت من اللي يستخدمون الانترنت لفترات طويله واخذت اشتراك مفتوح تبي تلقى ان السعر اقل بكثير من ايزي نت.

طيب لو جاني واحد وقال وش الفايده من ايزي نت اجل ؟؟ الخدمه ماهي للمستخدم الدائم .. الخدمه للي يبي يفك ازمه .. انتهى اشتراكك بالليل مثلا ولا فيه احد فاتح او مالك خلق تطلع .. كان عندك دي اس ال وتعطل لاي سبب وعندك شغل ضروري .. سافرت لاي مكان كم يوم ومحتاج الانترنت ومعك جهازك .. او حتى لو كنت جاي من برا السعوديه فترهمؤقته وتبي تمشي .. كل الحالات هذي وحالات غيرها ايزي نت تعتبر فيها حل مثالي وممتاز.