...نوايا العطر...

كن الهبايب يـوم تمحـا الخطـاوي

عاشق بكفه يمسح دموع معشـوق

والحزن عمره مـا يبيّـت خـلاوي

ولا يرقد إلا مفترش عين مخلـوق

ياورد علمنـي وش العطـر نـاوي

أوتدري أسكت(يمكن أنساه وأفـوق)

وإن ما نبت بأطراف صوتي شكاوي

حاولت أسافر غيم وأعـوّد بـروق

وش عاد لو كثرت علي البـلاوي؟؟

لاصار مالي بالغـلا عنـدك حقـوق

واللي نشد (وش فيه ناحل وذاوي؟)

مافيني إلا أني بعض طين وعـروق

وأنا نعم ( للحين) شاعـر هـواوي

إن ظقت وإلا إن رقت جيتك بطاروق

وأموت إلى من شفت مشي الحياوي

رجل ٍ تهجّا الدرب وعيون ٍ تمـوق

وأحـب نظرات..العديم..الـنـداوي

لين ألتفت يقراك من فوق إلى فوق

وأذوب في دمعة عيـون الخـلاوي

والحب له في جبهة عروقي حـروق

حبيبتـي مانـي حزيـن وشقـاوي

لكن غدت ضحكاتي لفمـي عقـوق

حبيبتـي والشـوق مالـه عـراوي

ولا لطير العشق برقـع ولا سبـوق

حبيبتي وإن شفتي الحـزن خـاوي

فأنا خنقني البعـد والبعـد مخنـوق

حبيبتـي ماعـاد فيهـا هـقـاوي

بيّن بياض الياس والصبر مشقـوق

وإلا الهبايب لـو تحـنّ الخطـاوي

ماكان أبد عاشق نسا وصل معشوق



عبدالمحسن بن سعيد