أبغا أرائكم جميعا ملكتي قربت..

السلام عليكم ..

أخواتي .. أخواني.. لكل من لديه لمسة إبداع بهذا المجال أنا أطلب منكم مساعدتي وأثق تماما انكم بتساعدوني..

أنا بجده .. ملكتي قريب انشاءالله.. انا من النوع احب الاشياء المميزه والغريبه .. وسمعت ان فيه قاعات فيها زي مثلا نوافير .. وسمعت ان فيه قاعه من تحت الممر او المسار اللي تنزف فيه العروسه فيه مويه وفيها دلفين يطلع ويفتح فمه وفيه الدبل حقت العروسين .. المهم انا احب الاماكن الغريبه ابغا قاعه متوسطه الكبر ومناسبعه وغريبه ما احب الشي المعتاد.. ياليت تفيدوني عن قاعات جده..


ثانيا/ انا ودي اسوي زفه لتورتة العروسه بحركه استعراضيه معينه وبقول فكرتي وياليت اذا فيه اضافات من عندكم او تعديلات..

اول شي التورته تكون محطوطه ع شي يندف مثلا عربيه وتكون غريبه .. هذي تدفها وحده لابسه زي معين مثلا وتطلع فيها وتمشي من الممر بين الحضور ع زفه معينه الين توصل الكوشه ويجو بعدها الفلبينيات 6 او 8 كل وحده شايله تورته صغيره .. يعملو رقصه استعراضيه عالكوشه انه عن الكيكه بأغنيه خاصه بكذا وبعدين يوقفو بأماكنهم..

بعدها زفتي انا اطلع من البلكونه عااااااد انا لما اطلع فيه شي مهم دايم العرايس يرمون ورد .. انااا لااا ما ابغا كذا فكرت اخذ لي الهوايه الريش واطلع كأني اهوي نفسي فيها بحركة دلال الين تنتهي الزفات ومو عرفه اش تكون؟؟؟؟ ولما تنتهي اقوم انتف ريشه ريشه وارميها عالناس لين تخلص انزل ويكون تحت فيه وحده تديني مسكتي .. والديله ماني عارفه اش اسوي لان العريس ما يدخل هل اخلي احد اخواته يلبسوني ولا كيف وبعدها اوصل الكوشه اقطع الكيكه وبعد ما اقطع يروحو الفلبينيات يوزعو عالمعازيم.. هنا انا ابغا فكره للدبله اذا القاعه فيها مكان خاص بالدبله كالدلفين حلو واذا مافيه ابغا افكاركم ..
وابغا زفات عروض للمعازيم مميزه وغريبه .. شوكولاته مثلا ..

طبعا العريس تجي زفته بعد مايروحو الناس انا فكرت انه هوه يطلع من باب ويشتغل له زي اغنية هيبه ملك مثلا بدون ميوزك وبعدها انا اطلع من البلكون مع اخويه بعدين كأن أخويه يوديني للعريس وبس بعدين نمشي عادي الدبل بعدين الكيك بعدين العصير ولكل شي اش اشغل طبعا كله بدون ميوزك..

اتمنى تساعدوني حتى الفستان والمسكه والكوشه وكاسات العصير انا اول بنت بالعيله ومالي اخوات كبار وابغا مساعدتكم الله يبعد وجيهكم عن النار يااارب .. انتظركم على أحر من الجمر..

وبالنسبه للزفات هل في فرقه تسوي الاغنيه اللي ابغاها بدون موسيقى ؟؟ ياليت المايسترو يفيدني اكون شاكره..

بصراحة افكار رووووووووعة

بالتوفيق

........أفكار روووووووووعه ........
أولا الله يتمملك على خير ويوفقك ان شاء الله .
ممكن تلبسوا الدبل والمعازيم يشوفو عن طريق شاشة العرض يعني لما تنزلي تعرضوها على الشاشه .
أتمنى أكون أفدتك .....

اول شي حبيبتي اختاري موضوع لملكتك عشان تعرفي تحددي الازياء والزفات وتنسيقيها على حسب الشي اللي تحبيه

يعني اما غابة او أميرة وخلي كل شي متناسق

في الزفات اسئلي المايسترو عنده خبره يعطيكي احلى الزفات واجددها وممكن لو عندك فكرة بس اعطيه خيط وهو ماشاء الله عليه بيكمل

اذا زوجك مو داخل اجل ماله داعي الدبلة ابدا وهو مو موجود الا اذا دخلتي اول الميز وسويتي هناكاول شي عرض الكيكة للفلبينيات ولما يخرج تجي زفته هو يدخل وبعدين انتي واخوك او ابوكي يزفك ليه ويلمو على العريس وبعدين يسلمك ليه وتلبسوا الدبل وتقطعوا الكيكة وتهدوا بعض كلمات تكتبوها في سجل الزوار او حتى بدفتر خاص او البوم صورك
طبعا هذا كله في الميز وينعرض على الناس في الصالة وبعدين خلي المصورة تبطيء الحركة شوي وتأخرها واطلعي انتي للناس من نص شاشة العرض زي مايجو في برنامج اوبرا (المايسترو ممكن يعلمك كيف تطبيقيها كمان)
ولما تطلعي للناس تنزفي على الزفة الاساسية ويكون احد عن الباب مثل امك تسلم عليكي وتعكيكي البوكيه او تلبسك تاج من الورد او عقد فل

او ممكن تطلعي من فوق البلكونة وتسوي حركة الريش ويصير دخولك للناس زي احتفال بتلبيس الدبلة والشبكة

اما القاعات صراحة انا ماشفت اللي قلتي عليه لكن سويت بحث في النت
وهذا اللي لقيته
قاعات الأفراح
ليلتي(2,1), قاعة جدة ويستن( دنيتي), قاعات الهيلتون(1 الهيلتون) (2القصر), الأمبراطورة ,قاعة أماسي(2,1), قاعات الفنادق(الشيراتون,الأنتر كونتانينتال,الهوليدي ان, كروان بلازا,الميريديان(الفيروز,النور),ريديسون ساس,الدار البيضاء3 قاعات(فرساي,شهرزاد,كيلو بترا),الحمراء سوفيتيل,البلاد(البلاد,الاميره),الوصال(سن ست), أمسيتي , الف ليله وليله, الكريستال,نوف,الارجوان, المنصور, اللؤلؤه,ملكة الليل,درة جده , الشرق الاوسط, نسايم ليل,فرح,الفيصل, العرب.


وكثير يمدحوا في قاعة الدار البيضاء والهيلتون وريفان والقاعة في اوركيدا بس نسيت اسمها

الف مبروك ويارب يتمم لك على خير
مره كتبت لك عن القاعات اللي في جده وانفصل النت عندي
بكتب لك مره ثانيه بس بالمختصر
في قاعه في جدة
العروسه تطلع من تحت الارض ومكانها في الكوشه بس كذا محد بيشوفها زي لمن تمشى انتي خلي التورته تطلع وانتي امشى في الممر والتورته تطلع بشويش لين ماتوصلي الكوشه
وفي قاعه ثانيه بداية ممر العروسه يطلع
يطلع على فوق ويدورها وبعدين ينزل وتكمل تمشى لين توصل الكوشه وهاذي الحركه مره خطيره بصراحه
ومحلات للكوش كثير في جدة في جنتي في شارع صاري وتصاميم غمرتي
اتمنى اكون افدتك