جروحي تنزف احزاني ..... قصه واقعيه ورائعة جددددا

النـــاعمه · 05-Sep-2008, 08:32 AM

ولحد هنا انتهى *·~-.¸¸,.-~*الجزء الخامس عشر*·~-.¸¸,.-~*

انتظر ردودكم وتعليقاتكم بفارغ الصبر^_^

المملكه كل دنيتي · 05-Sep-2008, 09:24 PM

البارت مرره نايس اتوقع بدات تفكك علاقة بسمه بخالد والسبه عمها الله يهديه
اما ريم يا خوفي تقابل وليد والله بتروح بستين داهيه الله يساعدها من اخوهاا
يعطيك العافيه نعووومه ما قصرتي

جوريتنا · 07-Sep-2008, 02:44 AM

يعطيك العافيه

جوريتنا · 07-Sep-2008, 02:51 AM

يعطيك العافيه
قصه مشوقه
و ممتعه
و فيها من الالم اللذيذ الشئ الكثير
وياليت لو تنزلين بقيه الأجزاء لإننا بشبكه أفراح أكيد نستاهل
و بصراااااحه أكثر لا أعرف الحكمه من تجزئه الروايه
هل فقط للحصول على ردود أكثر ؟؟
هذا مالا أتمناه
تقبلي احترامي و إعتذاري

النـــاعمه · 07-Sep-2008, 03:48 AM

اقتباس:

المشاركة الأصلية كتبت بواسطة جوريتنا

يعطيك العافيه
قصه مشوقه
و ممتعه
و فيها من الالم اللذيذ الشئ الكثير
وياليت لو تنزلين بقيه الأجزاء لإننا بشبكه أفراح أكيد نستاهل
و بصراااااحه أكثر لا أعرف الحكمه من تجزئه الروايه
هل فقط للحصول على ردود أكثر ؟؟
هذا مالا أتمناه
تقبلي احترامي و إعتذاري

الله يعافيكي حبيبتي
وتستاهلون اكيد ^_^

لا ياقلبي موعشان الردود الكثيره
بس عشان نجزاء الاحداث بحيث انا المتابعين للروايه ما يملوا منها
يعني نخفف عليهم
مشكوره على مرورك الكريم

ملووووكه يسعدكي ربي
مشكوووره يا قلبي على مرورك
دمتي بحفظ الرحمن

مول نواره1 · 07-Sep-2008, 05:52 AM

اقتباس:

تناظر خالد اللي جالس علي كرسي بجنبها وهو منبسط من اسألة الدكتوره....
بسمه بضيق:"يادكتوره متأكده مانيب حامل..."
الدكتوره:"يابنتي مفيش حاقه اسمها متأكده لازم نعمل لك تحليل عشان الادويه اللي حااكتبها لك..."
بسمه :"يادكتوره ما صار لي شهر متزوجه.."
الدكتوره:"وماله...ممكن يكون فيه حمل..."
بسمه شوي تنفجر في الدكتوره بس تحاول تتمالك اعصابها وناظرت خالد اللي لما حس انها منحرجه انبسط اكثر...
بسمه وهي تكلم خالد بصوت واطي:"يااخي فكنا من هالدكتوره..."
خالد:"طيب سوي التحليل وريحي نفسك.."
بسمه وهي تلتفت عليه:"نعم....والله الابره وسحب الدم مو جاي فيك..."
الدكتوره:"يابنتي هو حد بيخاف من الابره في السن ده..."
بسمه:"ايه انا...وعطيني الادويه على مسؤليتي..."
الدكتوره:"خلاص مادام ان متاكده مفيش مشكله....بس لازم مغوزي..."
خالد:"ايه ماعليك منها..."
بسمه:"اش اللي ماعليك منها حتى المغذي ماني ماخذه..."
خالد ببرود:" مو على كيفك..."
كانت الدكتوره تناظرهم باعجاااب ظاهر:"بصراااحه انتو ليئن عل بعض...انا حااكتب الادويه وعشان بعد كدا تحط اللمرضه المغزي"
خالد:"بالله يادكتوره شوفي اذا عندكم علاج لثقالة الدم... والبرووود وال..."
الدكتوره ةاللي راح فكرهها لبعيد تقاطعه:"بروود ايه..."
بسمه وهي حاسه بالصداع زايد من الدكتوره واسالتها الغبيه:"دكتوره اش تخصصك..."
الدكتوره:"طبيبه عامه والله..."
ظحك خالد على الدكتوره وسؤال بسمه...
قربت بسمه منه وكلمته بصوت واطي حتى ماتسمعها الدكتوره:"انت ماشاء الله عليك من تشوف الحريم تنبسط والظحكه تشق الوجه شق..."
خالد بصوت واطي:"حرااام تظلميني هذي دكتروه.... بس دكتوره حلوه..."
الدكتوره واللي الظاهر كانت مركبه رادار:" ربنا يكرمك دا والله من زوئك...."

ههههههههههههههههههههههه
هههههههههههه
روعة الاحداث يا نعومه
انتظر باقي الاحداث
لاتتاخري علينا متشووووقه كثير

يعطيك العافية

النـــاعمه · 07-Sep-2008, 11:57 PM

اقتباس:

المشاركة الأصلية كتبت بواسطة مول نواره1

ههههههههههههههههههههههه
هههههههههههه
روعة الاحداث يا نعومه
انتظر باقي الاحداث
لاتتاخري علينا متشووووقه كثير

يعطيك العافية

يا حبيبتي انتي ^_^
ربي يسعد لي هالحماس كله
وابشري راح اكملها بس مودحين بكره ان شاء الله
الله يسعدكي يا قلبي

النـــاعمه · 09-Sep-2008, 09:34 AM

*·~-.¸¸,.-~*الجزء السادس عشر*·~-.¸¸,.-~*

كانت في غرفتها بعد الظهر... وتذكرت البارح واللي صار بينها وبين خالد...
لما قال اللي قاله وهي منصدمه منه ودخل الغرفه وقعدت اشوي عسى يهدي بس لما دخلت كان مبين عليه العصبيه....
بسمه:"خالد ممكن نتكلم بهدوء..."
خالد بضيق:"الافضل يابسمه نأجل الموضوع اللحين....ترى والله ماودي اغلط عليك..."
بسمه:"طيب وش صااار لكل هذا"
خالد بعصبيه :"بسمه ودي انام...واذا تبين تعرفين كلمي عمك وهو يعلمك"
طلعت لما شافت انه مارح يقول لها شي...
تنهدت وهي تتذكر كل اللي صار...ياربي مااقدر اتصل على عمي ماادري اش صار بينهم ويحط بعد هو حرته فيني...تذكرت سحر اللي مارح يساعدها احد احسن منها...
كان خالد طالع تمنت مايجي اللحين حتى تخلص مكالمتها...
دقت الرقم وبرغم كل الللي فيها حست بسعاده لما سمعت صوتها...لانه من الاصوات القلائل اللي في هالدنيا تثق فيها...
سحر:"الووو"
بسمه:"السلام عليكم.."
سحر:"هلا والله وعليكم السلام..."
بسمه:"اشخبارك يالغاليه:"
سحر:"اخباري يحبها قلبك اشلونك انتي عقب العرس..."
بسمه:"تمااام...مبرووووك سمعنا انك حامل"
سحر:"الله يبارك في عمرك عقبالك ياحياتي..."
بسمه وهي تتنهد:"ان شاء الله"
سحر:"بسمه صوتك موعاجبني فيك شي..."
بسمه:"ايه...خليها على الله فيه اشياء مو شي...بس ماادري اخاف زوجك واشغلك عنه"
سحر:"لا مهو فيه....قولي اشغلتي بالي..."

^^^^^^^^^^

رغم الزعل اللي في داخله بس كان يضحك من قلبه من كلام ناصر وهو يحكي عن فهد وموقفه مع عامل المحطه اللي حتى هوما سلم من فهد ومقالبه....
ابو ناصر:"حسبي الله على ابليسك يافهد حتى العمال لازم تعطيهم اللي فيه النصيب"
خالد:"اتوقع لو يروح الهند بيلقى اعدائه كثير"
فهد:"بالعكس هم يطولون احد يسولف معهم..."
ناصر:"أي سوالف واللي يرحم والديك الهند ي في الاخير عصب(وهو يقلدالهند)صديق ايس فيه.... انته مايفهم كلام"
فهد:"ههههههه شفت كيف عصب بس بعذره يقول هات فلوس اقول عطني باقي الخمس ميه الضعيف بغى ينتحر..."
فيصل:"مالك حق يافهد الضعيف تطير عقله"
فهد:"امزح يااخي عاد انت لا تحولها جد"
ابو فيصل واللي ماكان يعجبه كثر المزح والسوالف:"المزح مو في كل وقت يافهد..."
خالد حتى يقهر فهد:" وانت صادق ياعمي ...طيب هالهندي لو جاته سكته...من رح يكون المسؤول؟؟"
فهد:"خالد يازينك ساكت..."
ظحك خالد لما شاف نظرات تهديد من فهد وكان متأكد ان فهد مايضيع له حق ابد..
ابو فيصل:"المهم فيه اجتماع بيكون في الشرقيه ولازم واحد يروح من شركتنا يحضره...عاد شوفوا انتوا يالثلاثه واحد يروح منكم..."
ناصر:"انا مااقدر لاني مسافر بعد بكره..."
حس خالد انها فرصه له حتى يروح يغير جو ويبتعد شوي عن بسمه حتى يقدر يفكر...
خالد:"انا بروح..."
ابو فيصل:"تراها يومين..."
خالد:"ايه ماعليه..."
ابو خالد رحب في نفسه بروحة خالد يظن ان بياخذ بسمه معه...حس انهم محتاجين يغيرون جو...كان عنده احساس ان علاقة خالد وبسمه تواجه مشاكل
متضايق من الكلام اللي سمعه البارح من ابوه حس الدنيا ماتسوى انه يسمع دعوه عليه من ابوه بسبب الطريق اللي ماشي فيه...حس بشوق لاهله واللي كان ابوه حارمه من دخول البيت.. بس بعد كل فتره يتصل فيه مره يكلمه بطيب... ومره زي مكالمته البارح يكون معصب ويعطيه كم دعوه جسمه يقشعر من بشاعتها.....انتبه للي يدور حوله كان سعود ووليد يخططون تخطيطات جهنميه....
وليد:"عمر فكر معنا شوي وخل عنك الزعل ماتسوى عليك"
عمر:"ماتسوى علي ...انت لو سمعت كلامه البارح كان ما لمتني"
سعود:"تراه مايدعي من قلبه ويومين وبيرضى..."
عمر:"ادري انه مو من قلبه بس اخاف انها تستجاب دعوته علي..."
وليد:"طيب هو ليش زعلان اللحين..."
عمر:"من يوم طلعت من عندهم ومشيت في هالدرب وهو زعلان مااقول الا الله يتوب علي مماانا فيه...."
وليد:"ياشيخ خلك مثلي انام في الشقه واروح اطل على امي كل ثلاثه ايام ويافرحتها بي..."
سعود:"وانا اهلي اروح لهم في الاسبوع مره وعادي عندهم.."
عمر:"انا وضعي غير....انا اكبر العيال وانتوا ماشاء الله اخوانك كبار وسادين مكانكم...:
وليد:"ياشيخ وسع صدرك...الدنيا ماتسوى"
عمر بمراره:"في هذي صدقت الدنيا ماتسوى..."
وليد:"الله ياسعود ماتتصور اشكثر فرحتي لمادريت ان ريم بنت عم فهد..."
سعود:"كنت عارف انه خبر بيفرحك..."
وليد:"اخيرا جاتني الفرصه انتقم من هالمغرور..."
عمر:"أي مغرور واللي يرحم والديك....الغرور ماهو من صفات فهد..."
وليد:"اشوفك تدافع عنه...
عمر:"ماادافع عنه بس اقول الصدق..."
وليد:"المهم ترى لازم خويتك تساعدنا في اقناعها ..."
سعود وهو يااشر على خشمه:"على هالخشم واعتبر الموافقه في جيبك..."
ناظرهم عمر وهو يهز راسه كان محتقرهم....ويبغض كل اللي يسونه.... وكارهه واحتقاره لنفسه يزيد يوم بعد يوم...

^^^^^^^^^^

كانت في انتظار رد بنت عمها بعد ماحكت لها كل شي من اول يوم زواجها لمسجات عبيرلمشاكلها مع ريم لعلاقتها مع خالد اللي في مد وجزر....قالت لها سحر بتتصل في اهلها وتشوف اش كان ابوها يبي من خالد وترد عليها...ماصدقت انها سمعت صوت التلفون وردت بكل لهفه........
كانت منصعقه من اللي تسمعه وتنهدت من اعماق قلبها وتحسبت في خاطرها على عمها ...
بسمه:"حراااام اللي سواه ابوك فيني..."
سحر :"ادري انه حرام الله يسامحه.."
بسمه:"تخيلي شكلي قدامه ...بعذره كان معصب...."
ماردت سحر انقهرت من ابوها واللي طمعه في الدنيا قتل فيه كل شي...
بسمه:"ماادري اش قواة ابوك لمايطلبه يشتري لي ارض...ياويلي والله مالي وجه احط عيني في عينه..."
سحرواللي كانت عاذره بسمه في اللي تقوله:" اكيد اللحين يحس كانك تبين تستغلينه.."
بسمه:"اخر ماافكر فيه....ياسحر شوري علي وش اسوي...."
سحر:"بسمه ابسالك سؤااال جوابك عليه بيحدد لي نوع النصيحه اللي تبينها"
بسمه:"تفضلي."
سحر:"انتي حريصه على حياتك مع خالد ويهمك تنجح هالحياه..."
بسمه:"اكيد حريصه..."
سحر:"مااحس انها تهمك...وشوله اجل هاللامباله والسلبيه.....ليش يابسمه صايره ردة فعل لافعال غيرك سواء خالد او عبير او ابوي.....هم يحركونك على كيفهم مثلا عبير وش يدريك يمكن اللي سوته بس حتى تخرب حياتك مع خالد.... وانتي ماشاء الله عليك ماشيه معها زي ماتبغى.... زوجك يقولك نبدى مع بعض بدايه جديده وانتي سوري خلني افكر ...وش تفكرين فيه ياحظي...المفروض تكونين اسعد وحده بهالشي..."
بسمه:"لا تلوميني لاني خايفه..."
سحر بضيق:"وليش تخافين بسمه لو صار طلاق الضحيه الوحيد انتي مو خالد يوم تتغلين عليه...اللحين انتي زوجته مو عبير لاتنسين هالشي..."
بسمه:"ادري ان الخسران الوحيد بيكون انا بس خساره عن خساره تفرق..."
سحر:"صادقه خساره عن خساره تفرق...لما اخسر وانا حاولت بكل مااستطيع اني انجح مابلوم نفسي لاني قصرت...بسمه انتي تبين ترجعين لحياتك عند اهلي..."
بسمه:"بدون زعل لا..."
سحر:"مستحيل ازعل وانا ادرى بالحال...بس من اليوم ورايح غيري اسلوبك مع الكل وكفايه ضعف ومو من كل مشكله تقلبين الدنيا..."
بسمه:"اشلون يعني اغير اسلوبي وانا احس انه لازال يكلم عبير..."
سحر:"ياحمااااااره حتى لو يكلمها تقدرين مع الايام تنسينه كل شي..."
بسمه:"حماره ماعليه... بس تتوقعين الامر سهل كذا..."
سحر بعصبيه:"والله العظيم لو انا قريبه منك كان ذبحتك..."
بسمه وهي تبتسم بمراره:"الحمد لله انك بعيده..."
وقعدت تسمع كلام بنت عمها حست انها صادقه في كل اللي تقوله ليش تنول عبير اللي في بالها بالساهل وتخسر خالد وهو يااكد دايم لها انه مارح يتخلى عنها....
بسمه:"طيب والمشكله الجديده اللي حطني عمي فيها..."
سحر:"صارحيه قولي مااكنت ادري..."
بسمه:"اكيد مارح يصدقني..."
سحر وهي تفكر:"ماادري يابسمه حليها بمعرفتك"
بسمه:"ماادري اش كان رد خالد على عمي لما طلب منه ارض..."
سحر:"ابوي معصب منه لان خالد قاله انا اعطي بكيفي ولا ااحب احد يستغلني..."
كانت متوقعه هالرد من خالد حست بصعوبة موقفها اللحين ماتدري اشلون تحلها...
بسمه:"الله لا يخليني منك ياسحر تصدقين كنت كاتمه في قلبي ولما ماقدرت اصبر مالقيت غيرك..."
سحر:"ولو ماقلتي لي كان زعلت انتي اكثر من اخت يابسمه المهم ان شاء الله يثمر فيك هالكلام..."
دخل خالد لما كانت تكلم وقعد واخذ الريموت يقلب في القنوات حتى ماناظرها...
بسمه:"اوكيه سحر اكلمك وقت ثاني..."
سحر:"شكل خالد عندك اللحين..."
بسمه:"ايه..."

النـــاعمه · 09-Sep-2008, 09:37 AM

سحر:"ياللا باي بس لا تنسين اللي وصيتك..."
بسمه:"ان شاء الله ...مع السلامه"

^^^^^^^^^^^^^^^^^^

يجهزون اغراضهم لانهم اليوم مسافرين للطايف عندهم زواج ولد اخت ام عبد العزيز
كان ينتظر يخلصون في الصاله وهو يفكر في خالد ومعصب منه....
قعدت ام عبد العزيز حتى يخلصون بناتها...
ابو عبد العزيز:"ها...خلصتوا..."
ام عبد العزيز:"ايه...بس البنات بقى عليهم شوي...اشفيك معصب..."
ابو عبد العزيز:"افكر في خالد...قهرني.."
ام عبد العزيز:"قلت لك لا تزوجه ماطعتني..."
ابو عبد العزيز:"ظنيت انه بيجينا خير من وراه بس ما شفنا شي..."
ام عبد العزيز:"انسى تشوف خير من وراه بس عسى بنت اخوك ماتملى راسه عليك..."
ابو عبد العزيز:"تتوقعين كذا..."
ام عبد العزيز:"ايه اتوقع..."
نزلوا البنات وهم شايلين الشنط...وسرح ابو عبد العزيز في بسمه وهو حاقد عليها كانت دايم تحت شوره واللحين طلعت بس ماعليه يابسمه وين بتروحين مني...
هند:"يبه..."
ابو عبد العزيزبعصبيه:"خير ليش تصارخين..."
هند:"اقول ياللا مشينا ترى خلصنا كلنا..."
هز راسه وقام يلحقهم اللي كانوا في السياره ينتظرونه...

^^^^^^^^^^^

بعد ماسكرت ماكلمها ودخل الغرفه طلت عليه بدون يحس شافته يحط ملابسه في شنطه صغيره استغربت منه ورجعت بدون يحس فيها...
رجع الصاله وكان يكلم احد في الجوال مبين انه واحد من عيال عمه بعد ماسكر التفت عليها...
خالد:"اليوم بسافر الشرقيه...:
بسمه:"وانا..."
خالد:"كيفك اذا بتقعدين عند اهلي او تبين اوصلك لعمك ماعندي مانع"
بسمه:"بس عمي مسافرين اليوم..."
خالد:"خلاص كلها يومين وراجع ان شاء الله"
بسمه:"طيب خلني اروح معك..."
خالد:"بروح لشغل مو لتمشيه وبعدين محتاجين يابسمه نبعد عن بعض شوي..."
هزت راسها وهي حاسه انه صادق محتاجين هالوقت...
بسمه:"طيب بقول شي لا تعصب..."
خالد:"اذا عن البارح فلا تفتحين الموضوع احسن..."
بسمه:"لا مو عن البارح...اشرايك اروح الخرج عند خالتي...بكلم تركي اذا كان في الرياض طلعت معه..."
خالد:"كيفك...."
بعد مانزل كلمت تركي ومن حسن حظها كان في الرياض ووعدها يمرها لما يخلص اشغاله راحت تجهز اغراضهها وهي محتاره اشلون تكلم خالد....

^^^^^^^^^

يقلب الجوال في يده كان متفق معها مايكلمها ابد هي تكلمه اذا ظروفها تسمح ارسل لها مسج وهذا الاتفاق بينهم اذا بغى يكلمها....من وقت مادرى انها بنت عم فهد وهو مزود جرعة الحب اللي كان بدى يخففها من اول حتى تلين وتوافق تقابله بس اللحين حس انه يبي لها وقت وهو ما عند استعداد يخسر ها اللحين....
ابتسم لما شاف رقمها...
وليد:"هلا وغلا بالريم.."
ريم:"هلا وليد..."
وليد:"اشفيك تقولينها ببرود..."
ريم:"لا بس كنت قاعده مع اهلي لما وصل المسج ...وليد مثل هالاوقات لا تظن اني بقدر اكلمك على راحتي..."
وليد:"وحشتيني ياعمري .. وحسيت اني مشتاق اسمع صوتك..."
ريم:"حتى انا والله بس في هالوقت صعب يكونون متجمعين ..."
وليد:"اوكيه حبيبتي ماابي احرجك اكثر من كذا"
ريم:"لا يكون زعلت..."
وليد:"وانا اقدر ازعل من روحي...."
بعد ماسكرت رمت نفسها على السرير وهي طايره في احلامها الورديه وتفكر متى يجي اليوم اللي يجمعها مع وليد...

^^^^^^^^^^^^

كانت تقريبا نازله لان تركي وصل متردده تكلم خالد اللحين ولا بعدين.......كان خالد يناظرها وحاس انها بتقول شي...
خالد:"بسمه ان طولتي كذا بتأخرين ولد خالتك..."
بسمه:"ايه نازله بس ودي اقولك شي قبل ماانزل..."
مارد عليها ينتظرها تكمل وحست ان مهمتها صعبه:"انت مره طلبت انا ننسى كل اللي فات وانا قلت افكر.... اللحين اقولك ننسى كل اللي فات ياخالد انت غلطت وانا غلطت خلااااص لازم نحاول نتجاوز هالشي..."
خالد وهو يبتسم بسخريه:"كلمتي عمك..."
بسمه:"ماكلمته بس دريت بالموضوع ياليت ياخالد تنسى مثل ماانا نسيت..."
خالد:"يعنى انتي طلبتي منه يكلمني..."
بسمه واللي من غبائها حست انها مو لازم تسب عمها مهما كان:"انس الماضي خلاص ليش ننبش فيه"
خالد بضيق:"انتي تظنين كل شي على كيفك..."
بسمه:"خالد انت سويت اشياء ابشع من كذا وقلت انسي..."
خالد:"اوكيه مشينا لاتتاخرين على ولد خالتك واذا رجعت من السفر يصير خير..."
ومد يده عطاها كيس:"هذا جوال شريته لك بس اشحنيه اول ماتوصلين"
نزلوا وهي ماتدري اقتنع ولا لازال زعلان ...لقت ولد خالتها في السياره تحت ينتظرها بعد ماسلموا عليه ركبت كان هووخالد يسولفون برى وبعد ماركب...
ناظر خالد بسمه:"توصلون بسلامه ولا تنسين اشحني الجوال ..."
بسمه:"ان شاء الله"
خالد:"ياللا في امان الله وعن السرعه..."
تركي:"ايه ركبت حرمتك معي وبتبدى التوجيهااات"
خالد:"اكييييد..."
بعد مامشوا ماتدري ليه ماقدرت تشيل نظرها من خالد اللي كان واقف في مكانه حست انه مايهون عليها فراقه حتى لو يومين...
الساعه تسع في الليل كانوا مجتمعين في بيت ابو فيصل... كانوا الحريم الكبار عند ام عبد الرحمن في غرفتها والعنود وبدريه وبناتها وريم وساره في الصاله يسولفون....
ريم:"انا بروح اسولف مع جدتي احد يروح معي..."
العنود:"انا بروح..."
وهم طالعين من الصاله كان فهد نازل من غرفته بعد ماقال لامه اللي اكدت له انهم داخل
شاف ريم ماشيه مع العنود على طول نزل راسه وهي رجعت لورى...
العنودبعد ماتاكدت من ريم انها دخلت:"فهد انزل مافيه احد اللحين..."
اول مانزل:"الله يهديها امي قالت مافيه احد..."
العنود:"صادقه بس كنا رايحين لجدتي..."
فهد وهو متردد:"من اللي كانت معك..."
العنود:"وليش تسأل...."
فهد:"ريم صح..."
ماردت عليه وهزت راسها...
فهد:"ياويل قلبي قمر يالعنود والله قمر"
العنود:"ههههه قصر حسك لا احد يسمعك ..."
فهد:" خلي اللي يسمع يسمع بنت عمي واحبها واموت على التراب اللي تمشي عليه..."
كانت ريم واقفه وسمعت كل شي رجعت على طول حتى ماتنتبه لها العنود وتدري انها سمعت كل شي....ماهان عليها فهد صح ماتحبه بس ماتدري كيف ترفضه لو خطبها وهي داريه انه يحبها....

^^^^^^^^^

في نفس الوقت كانت بسمه مع خالتها وعيالها حست انها مبسوطه معهم ورجعوها لايامها الحلوه...على انها غابت عنهم من وفاة اهلها بس حست انهم ماتغيروا ...
كان الجوال يشحن قريب منها وتناظر اذا خالد اتصل عليها يتطمن عليها ومالقت رقمه
خافت لايكون حصله شي لا قدر الله اخذت الجوال وراحت غرفة الجوهره حتى تاخذ راحتها بالكلام...دقت رقمه وطول اللين رد...
خالد:"الو"
بسمه:"هلا خالد..."
خالد:"اهلين..."
بسمه:"وصلت الخبر.."
خالد:"ايه وصلت...اقول انا مشغول اللحين اكلمك بعدين..."
بعد ماسكرت انقهرت منه ومن بروده معها اللحين حتى كلمة وصلتي ماسألها ولا الحمد لله على السلامه...
قفلت الجوال ورمته في الغرفه وراحت الصاله....
كانوا ماشاء الله عليهم بس ظحك وسوالف كانت منقهره من خالد حتى مااستمتعت بقعدتها...تذكرت بعدين قرارها اللحين من مكالمه زعلت....رجعت وفتحت الجوال واخذته معها الصاله....
طلال:"اكيد تحترين مكالمه من خالد..."
بسمه:"ياشين اللقافه..."
طلال:"انتي أي احد يطري رجلك تحمرين كذا...."
فواز:"ماعليك منه يابسمه تعرفينه مستخف اخوي شوي..."
بسمه:"مستخف شوي الا مستخف وبقوه بعد...."
تركي:"ياللا شباب عيال عمي يحترونا..."
قاموا بيطلعون مسك طلال الجوهره وحطها على كتفه وراح يدور بها في البيت وهي تصارخ.."
ام تركي:"طلااااال حسبي الله عليك من ولد نزل البنيه..."
بعد ماحس انه خلى الدنيا تلف بعيونها حطها عند امه وراح يركض حتى ماتلحقه امه لما وصل عند الباب:"اشرايك يابسمه اشيلك وادوربك في البيت..."
بسمه:"والله لو تحاول لموتك..."
طلال:عاد انا مجنون بحاول ياشيخه روحي....شوفي وزنك كم صدقيني بتتكسر ضلوعي وانا ماقدرت..."
ماعطاها فرصه ترد وراح يلحق اخوانه وبسمه وخالتها يضحكون....
جلسوا يسولفون بسمه وخالتها ...لمست ام تركي شعر بسمه...
ام تركي:"غريبه يابسمه ماتفكرين تقصين شعرك..."
بسمه:"خالد مايحب الشعر القصير بس خاطري اقصه على طوله..."
ام تركي:"اشرايك نروح بكره اشوف خطيبة تركي دايم قصات شعرها تهبل بسالها وين تقص"
بسمه:"خلاص ماعندي مانع....بالمره الواحد يجدد شوي بس اهم شي ماقص كثير من شعري..."

^^^^^^^^^^^^^^^

بعد ماراحوا اهل عمه دخل ولقى جدته صاحيه قعد معها يسولف شوي حتى زهقت منه
ام عبد الرحمن:"فهد رح مادام النفس راضيه عليك..."
فهد:"افاااا تطرديني من غرفتك..."
ام عبد الرحمن:"وبطردك من البيت كله اما طلعت اللحين..."
ضحكت العنود على فهد وعلى رد جدتها...
ام عبد الرحمن:"وانتي وين رجلك عنك للحين..."

النـــاعمه · 09-Sep-2008, 09:39 AM

فهد:"هههههههههه صادقه جدتي وينه رجلك للحين"
ام عبد الرحمن:"امسك يد اختك ومع السلامه انا مانيب مثلكم الواحد لو سهر الليل كله ماهمه"
قامت العنود واخوها بيطلعون...
ام عبد الرحمن:"فهد...ولد عمك المهبول وشوله ماخذ مرته معه يوم سافر..."
فهد:"ماادري عنه المتخلف.....صدق مايستحي ماله شهر الا وسافر وخلاها..."
ام عبد الرحمن:"خله يجي بس ويصير خير..."
فهد واللي حسها فرصه حتى ينتقم من خالد :"لازم ياجدتي الظاهر خالد يحسب بنات الناس لعبه عنده..."
ام عبد الرحمن:"والظاهر انت ماتنعطى وجه ياللا اقلب وجهك اشوف..."
طلع وشاف العنود ميته ضحك عليه ....
راح لعندها وماهمه ضحكها عليه لان سعادته اليوم غير...
فهد:"الله يالعنود سعادتي اليوم غير شكل...واخير شفت ريم "
العنود:"عيب عليك تراها بنت عمك..."
فهد:"ادري انها بنت عمي وان شاء الله تصير زوجتي..."
ماردت العنود وهي تفكر في ريم كانت خايفه لاترفض فهد واللي مبين عليه اشكثر يحبها...

^^^^^^^^^^^^^^

كانت منسدحه في غرفة الجوهره لما سمحت الجوال في خاطرها اخير حنيت ياخالد واتصلت...
بسمه:"الو"
خالد:"سلام .."
بسمه:"وعليكم السلام..."
خالد:"اشفيه صوتك لا يكون نايمه..."
بسمه:"لا ماكنت نايمه..."
خالد:"سوررري يابسمه لمااتصلتي كنت معزوم عند واحد من الشباب وما قدرت اخذ راحتي في الكلام..."
بسمه:"ايه بس قهرتني حتى مااتصلت تشوف وصلت..."
خالد وهو يقاطعها:"دقيت على تركي وبلغني بوصولكم ما قال لك..."
بسمه:"لا...المهم كيف الشرقيه..."
خالد:"تسلم عليك وتقول كان جبت بسمه معك..."
بسمه:"الله يسلمك حتى الخرج يسلم عليك...متى بتجي"
خالد:"امداك تشتاقين..."
بسمه:"اسأل عادي.."
خالد:"ماكان بيضرك لو قلتي ايه مشتاقه....بجي ان شاء الله يوم الجمعه على خير"
بسمه:"تجي بالسلامه ياخالد..."
خالد:"الله يسلمك...تصدقين قعدت افكر في كلامك حسيت انه معك حق خلاص ننسى المشاكل...ولا تحاسبيني على اللي افعال غيري وانا مارح احسبك على افعال غيرك.."
بسمه:"الله يقدرنا ياخالد وننهي مشاكلنا اللي الظاهر مالها نهايه..."
وقعدت تسولف معه ولا حست بالوقت لما يكونون مع بعض مايتكلمون هالوقت كله حست فعلا انهم كانوا محتاجين يبتعدون عن بعض شوي...

^^^^^^^^^^^

"ياابو خالد ه حياتهم وهم احرار فيها"
ابو خالد بضيق:"قاهرني هالخالد شهر عسل مثل الاوادم ماراح واللحين رايح الشرقيه كان خذاها معه قضوا اسبوع هناك ورجعوا.."
ام خالد:"انت وش عليك منهم هذي حياتهم وهي راضيه..."
ابو خالد :"اشدراك انها راضيه..."
ام خالد:"وانت اش دراك انها مهي راضيه ..."
حط راسه على المخده وهويفكر في خالد وبسمه ...صحيح قدامهم كانوا عادي بس هالموقف حسسه ان فيه بينهم شي...
ام خالد:"اقول يابو خالد ابو فيصل ماخطب ريم لفهد.."
ابو خالد:"لا ...وانا مستغرب منه"
ام خالد:"اخاف بنتك ترفض بس..."
ابو خالد واللي قعد:"تتوقعين تسويها ريم..."
ام خالد:"ماادري عن بنتك..."
ابو خالد:"لا ماظنتي ترفض فهد..."
ام خالد كانت حاسه ان ريم بترفض فهد ومتخوفه من رفضها لو صار اكيد مااحد بيغصب عليها بس خايفه من ردة فعل خالد وابوه خاصة خالد اللي مارح يعديها بالساهل...

^^^^^^^^^^

كانت قاعده يوم الجمعه في العصر مع عيال خالتها قاعدين في الحوش كان خالد مكلمها وقايل لها انه مهو جاي الا في الليل عرض عليه تركي ينزلها بس خالد اصر انه ياخذها هو ولا يتعب تركي بنزلة الرياض....قصة شعرها وندمت سلمت الكوفيره نفسها وقالت قصي اللي يناسبني بس لاتقصرينه كثير...صار طوله نص ظهرها كانت متخوفه من ردة فعل خالد اللي حذرها اكثر مره من قص شعرها.....
دخل فواز ومعه واحد بس شافت طرف ثوبه قامت بتدخل بسرعه بس سمعت فواز ينادي...
فواز:"بسمه هذا خالد..."
وقفت في مكانها من غير ما تلتفت تمنت انها سوت نفسها ماسمعته ودخلت بسرعه بس اللحين ما ينفع....
اللتفتت ..كان خلص السلام على خالتها وعيالها لان ابو تركي مهو موجود...
حست انها مستحيه منه موت...ما كنها معه لها شهر بس غاب يومين رجع حياها من اول و جديد...سلمت عليه وانتبهت لنظراته على شعرها ..مو مبين على وجهه أي تعابير...
خالد:"شخبارك يابسمه..."
بسمه:"تمام الحمد لله ...الحمد لله على السلامه"
خالد :"الله يسلمك..."
طلال:"يالله شف الوجه اشلون صاير احمر ..."
ام تركي حتى تغير الموضوع:"مسرع هاليومين مرة علينا ياخالد عشان بسمه معنا..."
طلال واللي ماهان يترك بسمه في حالها:"خالد اشرايك في بسمه وهي في لوك جديد"
بسمه كانت منقهره من طلال بس مايمنع انها حابه تسمع رد خالد:"حلوه..."
طلال:"حلوه بس..."
تركي:"طلال ترى سوالفك صايره سخيفه..."
فواز:"صادق والله ياطلال..."
خالد:"حرام عليكم اشفيكم عليه..."
طلال:"دايم كذا مظلوم معهم ...تجي تتبناني انت وبسمه..."
بسمه:"بسم الله علي عاد مااتبني الا انت لا ان شاء الله..."
خالدوهو يكلم بسمه:"جهزي اغراضك يابسمه لانا بنمشي بعد اشوي..."
ام تركي:"لا والله مايصير بعد العشاء ان شاء الله وخير....."
حاول خالد فيهم بس ماقدر فيهم...وجلسوا سوالف وضحك وبسمه كل ماناظرت خالد وجات عينها في عينه استحت ونزلت نظرها...
التهت ام تركي شوي في المطبخ وبعد ماساعدتها بسمه طلعت عند الشباب كان طلال يحاول يقنعهم يلعبون معه ...
خالد:"لا ياخوي مالي خلق العب بس العبوا انتوا وانا بتفرج..."
طلال:"بسمه تلعبين ..."
بسمه:"اذا بيلعب فواز بلعب معك...."
فواز:"اوكيه عشانك بلعب..."
كانت العبه يحركون القلم في الوسط بينهم واللي يجي راس القلم تجاهه يحكم باي حكم على اللي مقابله...من رداة حظ بسمه جا الحكم عليها واللي بيحكم طلال...
طلال:"هههههههههههههههه الحمد لله ربي حقق امنيتي اني احكم عليك......فكر ياطلال
وش يناسب بسمه....ايه...انتي ياللي ماتستحين جا رجلك من السفر وسلامك له قمه في البرود قومي بوسي ....(لما شاف نظرات اخوانه له واللي تحمل تهديد له)بسم الله على لا تاكلوني بعيونكم..قومي وحبي راسه اعتقد مافيها شي..."
ظحك خالد بصوت عالي بسمه كانت منقهره من طلال...
بسمه:"حبتك القراده قول آمين..."
طلال :"آمين بس ياللا نفذي الحكم..."
بسمه وهي داخله:"والله لو تموت..."
طلال:"الشرهه علي انا اللي العب مع ناس مايلتزمون بقوانين اللعبه..."
فواز واللي حب ينتقم لبسمه منه:"انا العب معك اللحين انا وانت بس..."
طلال :"ياللا..."

^^^^^^^^^^^^^^

يناظر سعود وهو يتكلم ويأشر حتى يستعجل...ماصدق اخيرا انه سكر التلفون.
وليد:"مابغيت يااخي تسكر..."
سعود:"وش اسوي لها تعرف سوالفها ماتنتهي..."
وليد:"ماعلينا من سوالفها كلمت ريم..."
سعود:"تقول ماترد على تلفون واذا دقت تحت تقولها امها نايمه ولا مشغوله يعني تصرفها..."
وليد:"مستغرب منها من الاربعا وهي ماكلمت وجواله يامقفلته اوماترد..."
سعود:"يمكن شافت لها شوفه ثانيه..."
وليد:"مستحيييل بس اشوفها هاليومين تكثر من اخاف من ربي مثل صاحبنا عمر لا يكون الاخت تبي تتوب...."
سعود:"ماعليك بخلي مشاعل وراها حتى تجيب الخبر الصحيح منها..."
وليد:"تكفى وانا اخوك خل هالخبله اللي مماشيها تفر مخها مثل اول..."

^^^^^^^^^^^^^^

كانوا نازلين للرياض بعد ماتعشوا ومشوا ....اول مره خالد يشوف بسمه على طبيعتها تمزح ونسولف...كان وجهها مشرق بالسعاده وهالشي اكد له ان خالتها وعيالها يعزون بسمه ويقدرونها...
اخذتهم السوالف وماانتبهت بسمه الا وهو موقف عند الفندق اللي ناموا فيه اول زواجهم رجعت بالذاكره لورى وحست قلبها تزيد دقاته لماتذكرت كل شي...
نزلت وهي ماهي قادره تتحكم في دموعها اللي نزلت غصب عنها...
اول ماوصلوا مسحت دموعها قبل ماتكشف عن وجهها...
من عيونها الحمر حس خالد انها كانت تصيح ....
بسمه:"اهلك يدرون انا مابنام عندهم..."
خالد:"ايه كلمت ابوي..."
بعد ماشالت عبانها...
قرب منها خالد ومسك شعرها:"ماتتركين العناد يابسمه..."
ابتسمت وفكت يده وجلست:"والله ياخالد ماقصدت بس قلت قصي شوي من شعري...والحبيبه ماقصرت.."
خالد:"لا تعيدينها...المره ذي بعديها.."
كملت بسمه عنه:"وبكيفي..."
خالد:"ماشاء الله عليك تعرفين تحفظين الكلام بس ماتنفذين..."
ماردت عليه وهي حاسه بمشاعر غريبه وكل مالها تتاكد حب خالد في قلبها يزيد ومستحيييل تتنازل عنه بساهل وبتغفر كل زلاته....

^^^^^^^^^^^^^^

كانت في غرفتها دموعها على خدودها كانت صدمتها كبيره لما سمعت فهد يصرح بحبها كانت تدري انه بيخطبها توقعت انه عشان اهله بس انه يحبها هذا اللي حطمها
صحيح هي ماتحبه بس مايهون عليها تجرحه من يوم رجعت من عند عمها ماكلمت وليد ولا ردت على مشاعل كانت محتاجه تفكر وتختار بين حبها الجنوني لوليد وولد عمها اللي ماتحبه بس ماتتمنى له الا كل خير.....

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

زفات	دليل الافراح	اكاديميه افراح	تواقيع العرسان	تنسيق ميزانيه الفرح	تولبار افراح	مركز التحميل	اتصل بنا
المتجر النسائي	المتاجر الخاصه	دليل المواقع	العاب افراح	تدريب الالكتروني	الطب البديل	الاسره المسلمه	اعلن معانا
البوم صور افراح	مقالات للعرسان	بطاقات افراح	جوال افراح	المؤثرات الصوتيه	فساتين افراح	كوش أفراح	شبكة افراح

جروحي تنزف احزاني ..... قصه واقعيه ورائعة جددددا

الروايات الطويله والمصوره