شوفو وصفات عنايتي بنفسي واستفيدو ..للكسولات فقط

السلام عليكم ورحمة الله

كيفكم صبايا انسات سيدات .. ان شاء الله يدوم الخير عليكم اجمعين
دي اول مشاركه ليا في المنتدى وحبيتو من اول زياره ومواضيعو جدا مفيده خصوصي للعرايس
واللي افادني انا شخصيا لانو فرحي قريب ادعولي ربي ييسرلي ويكسني في قلب زوجي..

نجي لموضوعنا

شوفو حبيباتي انا من النوع اللي يطفش من الخلطات الكتيره واقنعة الوجه واللبن والقشطه ودي الاشياء ومتاكده انو اغلبكم زي ,,,,,كسلانين

نسوي الخلطه ونصبر يومين ونعصب منها ونبطل نعملها

فانا دايما اسعى للوصفات السهله المفيده اللي ما تتعبني عشان لا اكسل وابطل اعملها
حقولكم كل جدولي لعنايتي الشخصيه

شوفو بالنسبه للوجه
انا في الاسبوع مره او مرتين استخدم (السدر) الاغلب يعرفو موجود عند العطارين هوا يكون بودره احط ملعقه صغيره واخلطها بموية ورد او مويا عاديه وافركها بيدي الين يطلع رغوه واغسل وجهي بالخليط واتركو دقايق واغسلو حتلاقي انو وجهك طلعت الدهون من المسامات وحتى الرؤس السودا بدت تختفي ولو لمستي بشرتك حتلاقيها مليانه دهون لانو بيقبض السمامات بعد كدا استخدمي غسولك المفضل وافركي بليفة وجهك الخاصه او تكون فرشه لفرك الوجه اشتريتها من بودي شوب جدا رائعه
ملاحظه هامه((البعض وجهو يحمر ويلتهب شويا من السدر يعني اللي بشرتها حساسه لا تستخدمو بس شويا ويهدى تاني لا تقلقو يعني جربيه مره وشوفي اذا ناسب بشرتك))
بعد كدا
استخدم موية ورد خاصه بالبشره تلاقيها عند العطارين برضو وهيا صناعه سوريه وفيه للبشره الحساسه والعاديه وعبوتها ضغاط اضغطي ضغطه على قطنه صغيره ومرريها على وجهك بعدما تغسليه والله والله نتياجو مضمونه ومن تجربتي يسير وجهك فاتح ومورد وتروح اثار الحبوب والرؤس السوداء وينظف وحتشوفي اكيد الاغلب يستعملها لانها مشهوره مره
الكل سار يسالني كيف وجهي صفي من اثار الحبوب والهرجه كلها موية ورد فقط

طيب نجي للشعر
انا احب استخدم خلطة زيوت قبل غسيل الشعر بساعه او ساعتين طبعا الزيت اللي يناسبك استعمليه وللفائده لازم تطولي المده لساعتين واكتر بس بما اننو موضوعي اني اساعد الكسلانات اللي زي حالتي فاليكي الطريقه بعد ما تزيتي شعرك لفيه بكيس نايلون وحطي عليه المنشفه الخاصه بالشعر فوق الكيس وخلي فتحه بسيطه اعلى جبهتك وحطي فيه فوهة الاستشوار وشغليه على الحراره الهاديه المنشفه حتخلي الحراره تتركز على شعرك وماتخرج برى زي ما انتو بتشوفو حمامات الزيت عند الصوالين يحطولك حمام الزيت وتقعدي تحت الحرار فهدي فكره من ابتكاري وما تضطري تقعدي كتير بالزيت لانو الحراره تضاعف المفعول ويكفيكي نص ساعه بحراره ((طبعا كل 10 دقايق شغلي السيشوار على شعرك ولو اضايقتي من الحراراه ريحي بعدين كملي ))
وبصراحه انا استخدم بلسم روعه روعه ويناسب كل الشعور رائع والله يابنات
بس المشكله ما تلاقيه عند اي صيدليه تطفشي الين تلاقيه الله يعينك اسمو ((ويلازيد))بالاعشاب لونو اخضر وتحسي ريحتو زي الفكس بس يخلي شعرك طري مررررره ويعجبك ولو جربتي ما حتجربي غيرو وحتدعيلي

الجسم
شوفي ياقمر بعد ما تخشي حمامك وانتي مزيته شعرك ادهني زيت على جسمك اي نوع وبعد ما تغسلي شعرك حتلاقي جسمك اتشرب مويا بالاضافه للزيت الموجود لمي شعرك على فوق وخليه جسمك يجف شويا بس من المويا بس يكون رطب يعني وابدئي افركي بالليفه المغربيه الاصليه والله يا حتشوفي عجــــــــــــــــــــــــــــب وتقرفي من عمرك من الجلد الميت اللي حينزل
بعد كدا غسلي جسمك بالصابون او الرغوه اللي تحبي

كمان استخدم ملح الحليب الكل يعرفو اكيد يعني صراحه احسو لعب عيال بس يخلي جسمك ناعم يعني افركيه على جسمك وبعدين غسليه

كمان في وصفه قالت لي عليها وحده يمنيه انو ابشر 3 صابون غار مع كاسه موية ورد واخلطها سوى اضيفي موية الورد عليه شويا شويا لغاية ما يسير كثيف مو خفيف واحفظيه بالتلاجه وقت الاستحمام خرجي واستحمي بيه يخلي جسمك ناعم ويستفيد من مويا الورد لانو مومعقول حنكب موية ورد على جسمنا يعيني بالطريقه دي تستفيدي من موية الورد للجسم

طيب جينا للمهـــــــــــــــــــــــــــــم يابنات
المشكله اللي بنعاني منها وتطفشنا
المنطقه الحساسه كيف نتخلص من الشعر الزائد فيها وانا احب اقد شكرا خاااااصه لعواشه
اللي ادتنا طريقه نتخلص فيها من الم نزع الشعر وهيا عن طريق الرماد اللي نحطو على المنطقه ونبدء بشيل المنطقه الحساسه بحلاوه او بملقاط او اللي يريحيك لانو النتف غير مستحب اتياع لسنة المصطفى صلى الله عليه وسلم بس يعين الالم كانو وخز ابره او اقل
اتفضلو شوفو تفاصيل الطريقه اللي تحب على الرابط
[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]
وطبعا قبل لا تشيلي غسلي المنطقه كويس بالصابون وجففيها
وبعد ما تتخلصي من الشعر حطي عليها موية ورد مع نشا وخليها دقايق واغسليها
وتشوفي النعومه والله

خلاص طبعا الان انتي خرجتي من الحمام ولبستي البجامه ومنهكه ومنتي شايفه قدامك من التعب
حتترمي رميه عنيفه على السرير وهنا تجي خطوه مهمه
حيكون جنبك علبه تحطي فيها الخلطه دي((جليسرين سائل +جليسوليد كريم الاحمر+فازلين+شويةفكس+عصرة ليمون يعين نص ليمونه ممكن)) وقلبيها كويس وقبل ما تنامي تحطي منها على ركبك واكواعك واي منطقه مسمره في جسمك حتشوفي انها تفتح مع االايام بس استمرررررررررررررررري لانو بعد اسبوعين تظهر نتيجة وشي سهل يعين جنب سريرك
وكمان كدا على الماشي دخلي اصباعك ف الفازلين واعملي مسحه خفيفه على شفايفك ترطبيها ونامي

وتصبحي على خير وبالتوفيق



هدي هيا وصفات سهله وحلوه وكلها من تجربتي الخاصه ماحد قلي عليها ولا سمعت عنها كلو مجرررررررب من حضرة جنابي ههههههههه
يارب يستفيدو كل الكسلانات اللي زي من وصفاتي وبالتوفيق

واي استفسار تحت امرك ياجميل

a,t, ,wthj ukhdjd fktsd ,hsjtd], >>gg;s,ghj tr' gg;s,ghj fktsd a,t, ukhdjd tr' ,hsjtd], ,.thj

من جد انااااااااااا مرة كسلانة ومالي خلق على الخلطات يعني نفسي قصير على قول المصريين مرة وامرتين وبعدين اكسل بس ان شاء الله اجرب طريقتك مابقى على عرسي شي
بس ودي اسئلك عن مقادير اخرخلطة ماقلتي كم جلسرين والجلوسليد والفازلين

مشكووورة لاعدمناك

يسلمو
بس حبيت اسال اذا حطيت الرماد اشيل بحلاو وهو فيه ولا امسحه وبعدين ازيل ولا كيف

مشكوووووووووووووووره ياقلبووووووووو
والله يعطيك العافيه

مشكووره ياعسووله على خلطاتك الابتكاريه ^_^
والله احب اهتم ببشرتي بس كسووله نمبر ون ^_^
ان شاء الله اجرب خلطاتك
يعطيك العافيه ^_^
دمتي بصحه
تقبلي مروري المتواضع

اشكركم على مروركم الكريم
نورتوني حبيباتي

يعني شي يجيب الاحباط اربعين مشاهده و4 ردود يارب لك الحمد

بس وجودكم يكفيني

اشجان الف مبروك ياقمر وبالنسبه للمقادير
حطي ملعقتين شاي مليانه فازلين
وملعقتين زيها جليسوليد
وملعقه جليسرين سائل او استغني عنو اذا ما اتوفر عندك
ملعقه فكس
ونص ليمون

يعني ترى المقادير بتقديرك انتي تحبي تزيدي ليمون او تنقصي فكس
ما تفرق النتيجه وحده طالما انو الخلطات سوى



وبالنسبه لحبوبه
شوفي ياستي تحطي الرماد على المنطقه وفركيه شويه باصباعك الين تغطي المكان خليه شويا يعني نص دقيقه بعدين افضي الرماد الزائد بالنفخ او بيدك نفض خفيف مو تنزليه كلو وافردي الحلاوه فوقو وشوفي


تحياتي لكم

يسلمو يسلمو يسلمووووووووووو حبُــــي
جزاك الله خير ع الشكر اللي قدمتي لي
وسلمت اناملك ع الموضوع الرووووعه

يسلموو ياعسل

والف مبروك مقدما

والله يوفقك ويسعدك