نار الغيرة تحرق رجل واطيها

"مع خالد ! يعني شنو دقيتي عليه وقلتي له انج بالسعوديه ولا شنو ؟"
"ما قلت له, شافني بالعرس و..." وعاد السكوت ,بس تداركت نفسها وعلى طول قالت "عمر انا الحين اببيتهم وراح اظل فترة ,فيه جم شغله لازم انتفاهم عليها انا وخالد ,وحوسه ,المهم انا بعدين اكلمك ,انته ارتاح ,يلا تصبح على خير " وسكرت قبل ما تسمع الرد.
ما لاحظ انها تقريبا سكرته بويهه لأنه بدى يفكر بالمشكله اللي حطته فيها (اكيد خالد اللحين متنرفز مني, اوووووووووووه هذا اللي ناقصني ,كله منهم ,اهم يتهاوشون وانا ابتلش ,كان المفروض اني اوقف ضد هالزواج ,ماكان المفروض اني اخليهم يتزوجون عشان ما احط نفسي بهالمواقف)
ومرة ثانيه اضطر انه يمسح الرقم اللي اكتبه على الموبايل بنرفزة اكبر هالمرة ,وكتب رقم خالد ,اللي عطاه مشغول .
(وليـــــــــــــــــــــــــن هذا شكله امعصب)
رد يدق وخالد يعطيه مشغول .
احتار يرد يدق ولا ينطر لما يهدى ,وهو بهالحاله سمع صوت المسج ,اللي فتحه بسرعه ولقاه من خالد اللي كاتب له



احسابك معي بعدين
انا مشغول دحين , لا تستعجل على رزقك
بكرة نتفاهم , نلتقي قبل ما تروح للمزرعه




( فيها تفاهم السالفه لابالله رحنا وطي ,رزقي شكله بيكون كبير !!)
شغل سيارته وطلع من المواقف وفتح المسجل ,اللي غنى بصوت اصيل ابوبكر :




ايه احبك هذا حظي اللي انكتب ... ودربي اللي امشيه وادري به تعب
ايه احبك وانته في عيوني سهر ...وانته وسط القلب حرات القهر
بس احبك وهذا حظي اللي انكتب ودربي اللي امشيه وادري به تعب
اشوف الناس بعيوني ومن بدهم اشوفك غير
واحس مثلك في هالدنيا فدنيا ابد ما يصير
في عينك سحر ياخذني ويخليني معاك اسير
واحس عمري وقف عندك وايامي وراك تسير
ايه احبك هذا حظي اللي انكتب ودربي اللي امشي وادري بأتعب
يا دمعه عين في فرحي ويا دمعه عين فأحزاني
يا حب تالي العمر اهلا
نطرته سنين ليه جان...



اطلعت صورتها في خياله ما جنه ماشافها صار له 3سنين ,ما جنه ما شافها من تزوج
,ما جنه كرها وكره طاريها .
بدى يسمع دقات قلبه من قوتها ,الشوق لها بيذبحه
الحقيرة ,الحقيرة ,لا مو الشوق اللي ذابحه ,رغبته بالأنتقام اهي اللي بتذبحه ,ما كفاه اللي سواه فيها ,يبي يضرها اكثر,يبي يعذبها اكثر .
تمسكنت لما تمكنت.
طلع الشريط من المسجل بقسوة ,وحذفه وصفق بالدريشه الجانبيه وطاح على المقعد كره هالشريط اللي ذكره فيها ,كره الأغنيه.
وفكر بزوجته ,هي اللي تستاهل انه يفكر فيها مو ذيك ال....
الظاهر من رحلته باجر لمزرعتهم ,هذي الروحه قاعده تضغط على اعصابه المفروض ما يوافق , بس ما قدر يرد بوحمد , الشيخ الكبير خاصه انه هو اللي اتصل عليه وصمم على وجوده بعد ما درى انه بالسعوديه من عمه حمد .
انا الظاهر ينيت وقعدت ولا واحد صاحي يروح لمزرعه جد طليقته , اللي يضحك اكثر انه لازال بينه وبين ابوها حمد اتصال , وبينهم اعمال , على قولت ابوها الشغل شغل .
وصل للفندق وراح لغرفته ورمى حاله على السرير على امل انه ينام ,لكن النوم كان بعيد عنه بعيد كثير.



في القصر عند خالد



"يما كلميني ,ردي علي طلبتك " صار له نص ساعه تقريبا يحاول يقنع امه انها تكلمه وتفتح له الباب ,وكل محاولاته باءت بالفشل ,امه الشخص الوحيد اللي ما يقدر يكون قدامها رئيس مجلس ادراة "يمه لازم انتفاهم" كان حاط راسه على الباب اللي فجأة فتح وكاد انه يطيح ,وظهرت امه المعصبه عليه .
"ادخل "
دخل وهو يحس بالتعب والأنهاك وده له بس يحط راسه بحضن امه وينام بس الواضح انه امه ما تفكر نفس التفكير.
ظل واقف وامه جلست على فراشها "اشرح"
"وش تبيني اقول"
"خالد صارلك ساعه قدام داري ,تبغى تتفاهم ,والحين تبغاني اقولك وش تقول ؟!....,إذا ما عندك شي تقوله فأطلع بره"
"لا عندي ...انا اسف .."
"اســـــــــــــــــــــــــــــــف" امه صوتها علا بعدم تصديق "هذا اللي عندك ,انت اسف, هذا اللي تقدر عليه " ..........."اسمع يا خالد ,انا ام توها تدري انه ولدها متزوج ,من غير شورها ,من غير اي اعتبار لها...إلا ما قلت لي من متى انت متزوج بالضبط ؟ يا بكري "
هذا السؤال اللي كان خايف منه ,ما عنده جواب مناسب لهالسؤال , نزل راسه وظل ساكت
موضي اعرفت بهاللحظه انه الجواب ما راح يعجبها ردت قالت السؤال بصراخ "من متى؟"
"جــــــــــــــــاوب ....سنه ....سنتين...كم جاوب؟؟"
"يما ما في داعي تعرفين ,المسأله انه انا وهي راح ننفصل وخلاص "
"إلااااااااااا فيه داعي ,وألحين راح تقولي من متى ؟"
"7 سنين" موضي خذت نفس عميق وقالت " اطلع برة"
الكلمه و النفس العميق اللي خذته امه خلاه يقرب منها وينزل على ركبته قدامها بسرعه وهي جالسه على السرير وحط ايد على ركبتها و يتكلم وهو منزل راسه ما وده انه امه تقرى عيونه والرغبه اللي فيها وقال بصوت عميق "يما سمعي شرحي طلبتك قبل ما تطرديني ,سمعيني , يما ما ابغاك تعصبين علي "
"ما تبغاني اعصب عليك ايش ذي نكته ... تنكت انت , متزوج من غير علمي وما تبغاني اعصب , تكلم طفله انت, هااا , تكلم بزر قاعد " وصوتها مع كل كلمه يعلى " روح عن وجهي لأعصب اكثر , ماني طايقه اشوفك , اطلع...اطلع "
اول مرة يشوف امه بهالعصبيه
بدى يترجاها بصوت هامس "يما انا ما كنت راح اخليها تطير مني ,هي لي ,لي لحالي ,ما ابغى اي رجل يمتلكها ,هي لي من صغرها ..."
امه قاطعته, كان باين عليها الصدمه , صدمة سماعه يتكلم عن شي يبغاه هدت شي فيها ,هي اتعرف ولدها ,صوته وهو يقول انه يبغاها عور قلبها, ولدها هذا ما عمره قال انه يبغى شي , اول مرة يعترف, وصوته ...صوته كان فيه شي تحس كنه اول مرة تسمعه,غيرت نبرتها معاه وقالت له بصوت هادي بس باين فيه العصبيه "خالد تبغاها ,هي باين عليها انها بزر ,كم كان عمرها لما تزوحتها "
"كان عمرها 17 " شاف امه تعطيه نظرة انت من جدك متزوج بنت عمرها 17,قال بلهجه دفاعيه "هي اصغر دفعتها ,كانت مخلصه الثانويه ,كثير تقدموا لها مو بس انا "
" انا مالي دخل بالناس ,انا لي دخل بولدي , خالد كيف ...الفرق بينك وبينها 11 سنه !! كيف ابوها محمد وافق انك تتزوج بنته من دون ما تقول لأهلك ,لا يكون فلس وكان.. "
قاطع امه قبل ما تقول كلمتها "يما هو وافق لأنه واثق فيني ولا تخافين هو ما يحتاج لفلوسنا ,لا تنسين انه صديق ابوي الله يرحمهم جميع وانا قلت له اني راح اقولكم بأسرع وقت " سكت وقال بلهجه هاديه "اضطريت اني اخذ هالخطوة ,تزوجتها وكنت ابغى اقولكم " لما شاف عدم التصديق بنظرات امه "والله كنت بقولكم على طول , بس ما قدرت ,ابوي جته الجلطه بعد زواجي ,واضطريت اني ارد للسعوديه ,ما كنت اقدر اقولك <يما على فكره انا تزوجت> , بعد كذا زاد المرض على ابوي وتوفى ,واضطريت اني اجابل الحلال ,كلما مر الوقت كان يصعب علي اني اقول لكن قسم بالله كنت بقولك,لكن من سنه صار بيني وبينها خلاف وكنت بطلقها وقتها فقلت خلاص انا وهي انتهينا فما له داعي اضيق صدرك بالموضوع " ونزل راسه "لكن انشغلت وراحت عن بالي فكرة الطلاق" هو من سنه وهو متغير ,وهي ملاحظه هالشي ,ما صدقت كلمه من كلامه عن انشغاله اللي ماخلاه يطلقها ,هو ما طلقها لأنه ما يبغى يطلقها ,صوته وهو يقول انه يبغاها بين لها هالشي .
"انت متاكد انك تبغى اتطلقها ؟"
رفع راسه "ايــــــه متأكد"
"وش هو سر خلافك معاها ؟"
"مافي داعي تضيقين صدرك بالموضوع ,المهم اني بنفصل عنها بعد ما تولد "
"مو انت قلت انه خلافك معاها من سنه ,اجل كيف حملت ؟"
واضح على ويهه الصدمه ما توقع انه امه بتسأل هالسؤال "يمه ,وش ذا السؤال الغريب ؟ كيف احملت يعني "
"انت قلت .."
قاطع امه "انا رحت للكويت من ثلاثه اشهر تقريبا "
"وينها ما حملت طول السبع السنين ؟"
"يما هذا خارج الموضوع" وقام من مكانه لأنه اسألة امه بدأت تصير غريبه مرة "المهم ان حنا بنتطلق واني خاطب بنت عمي "
"وش راح تقول لسمر, وش راح تقول لعمك "
التقت عينه بعين امه "لا تفكرين بالموضوع ,انا راح اشوف حل للمسأله " وباس راس امه "المهم انتي راضيه عني ,الحيـن " وكان باين عليه القلق ,موضي قلبها ما كان يطاوعها انها اتنام وهو قلبه يحاتي ,لأنه تعرف هالولد بالذات ماراح ينام وهو يدري انها متضايقه ,بس ما رح اتعديها له بالساهل .
"خالد انته تدري انه لو ام غيري كان ما كلمتك مليون سنه اصلا ما كانت ناقشتك .."
"بس انتي يا امي ,انتي احن قلب بالدنيا " وضم امه ,بعدته عنها
"خلني كم يوم استوعب فيهم ,ما اقدر اقول شي الحين ,الموضوع مو سهل, خالد انا ماني قادرة اطالعك من دون ما اغتاض ,فاحسن انك تطلع الحين "
"يما .."
قاطعته امه "خالد اطلع "
كان عارف انه هذا افضل عرض راح يحصل عليه ,باس امه اللي كان وجهها صاد عنه واستأذن
الحمدلله انه ما ضغطت عليه عشان تعرف سبب خلافه مع مها ,والحمدلله انها ما لاحظت انه يخبي نص الحقيقه بالنسبه لسبب زواجه ,هو قال لها نص والنص الثاني بينه وبين مها .
بكرة لازم يشوف عمه وصل ولا لأ ,اللي يذكره انه عمه بيوصل من السفر بعد اسبوعين لكنه مو متأكد ,الله يعين.
عقله مو مستوعب للأن انه بيكون ابو "ابو" فيه واحد جاي بالطريق بيربطه بهالمرأة على طول ,طفل بيقول له "يبا" ,طفل بيعاني من اول ما يجي من انفصال امه وابوه .
راح حق جناحه وهو يدعي ربه انه هالأيام الجايه تعدي على خير .

البارت الثالث
***الجرح لا جا من اغراب عادي...بس الجرح موت الجرح لا جا من احباب***









عمر بعد ما يأس انه ينام قرر انه يقعد بالبالكونه ويشوف الشمس تنشر نورها وتقاوم الظلام, تمنى بهاللحظه انه النور يمتد لداخله ,يحس انه بظلام من اول ما راحت المرحومه , نورة , زوجته ,صار له سنه وثلاثه اشهر يصد اي محاولات من اهله ومن اصدقائه انه يتكلم ويفضض باللي بقلبه , سنه وهو كاتم بقلبه اللي شافه بأمريكا ,حتى انه مع مرور هالفتره ما بكى ,وده يبكي بس مو قادر ,حاس قلبه بداخله يتقطع ,يحاول ينسى الألم لفراقها وتأنيب الضمير وكره لنفسه .



من ثلاث سنين (الكويت):



"مها ,مها "
شاف مها طالعه من غرفه الأستقبال من البيت العود (بيت ابوه سعود) اللي قاعده فيها مع زوجها خالد اللي رد الكويت بعد غيبه اسبوع , اليوم يمعه الأسرة عند ابوه سعود , لكن بهالوقت الكل راح لبيته , واكيد ابوه سعود راح للمكتب يراجع بعض الأوراق للشغل .
"نعم عمر ,شفيك قاعد تصرخ !" وابتسمت بويهه "قبل لا تقول تعال سلم على صديقك "
دش عمر معاها بعد ما سلم على خالد لف على مها اللي اول ما انتهى السلام حطت راسها على صدر خالد وخالد قاعد يلعب بشعرها,هو ملاحظ شلون متعلقه بريلها (رجلها) , وشلون فراقه يأثر على نفسيتها ,لما يكون خالد موجود لازم تكون بمكان قريب منه وحوله ,هي تعشق خالد وهذا الشي واضح وضوح الشمس ,بس خالد ما يحب يبين مشاعره تجاه مها ,ما كان يبين حبه , بس فيه تصرفات معينه تبين انه مها شي مهم (بس يمكن هي شي مهم لأنها زوجته مو لشي ثاني ) قال لها "ابي اتزوج "
لو اهو كان بنفسيه غير ,جان كانت الصدمه اللي على وجوهم ضحكته ,بس اهو اتخذ هالقرار بعد تفكير طويل خلال سفرة النقاهه اللي خذاها عقب طلاقه , وعزم على قرار الزواج عقب ما صلى الأستخارة وارتاح والحين ما احد راح يثنيه عن قراره
,كان اول من تكلم خالد اللي قال "انت جاد بالمسأله ذي ,ترى المسأله مهي لعب " خالد اللي كان يعرفني عدل خاف اني قاعد اسوي هالحركه كردة فعل للطلاق ,يمكن اهو تحليله صح (ليش لأ) يمكن انا الفكرة يت براسي عشان ارد لها الجرح والخيانه اللي حسيت فيهم من اللي سوته و اللي قالته ,لكن ألحين انا مقتنع فيها زما راح اترجع عنها .
فحاولت اتجنب عيون خالد وقلت لمها
"ها اشقلتي بتخطبين لي ولا لأ"
قال خالد مرة ثانيه "عمر فكر بالمسأله عدل ,قبل ما تدخل فيها ,ما يصير تأذي بنت الناس معك بعد ما تكتشف انك تسرعت "
كنت ادري ان خالد وده يسحبني برة ويتكلم معاي بجديه ,من غير لا يحاسب على كلامه جدام مها ,من امساعه وهو قاعد ينقز على اني المفروض ما اتسرع
"خالد انا فكرت بالقرار ,وراح اتخذه ,ها اشقلتي يا مها ولا تبيني اطلب من فجر تدور لي "
طبعا مها تغير ويهها , لأن طليقتي المحترمه كانت صديقتها , صاروا رفيجات بسرعه من اول ما تزوجتها , صار بينهم صداقه قويه.
"اشدعوه جذي مستعيل ...انته توك مطلق ,فكر قبل ما تتخذ اي خطوة , استقر على الأقل"
"اوووووووه وبعدين يعني ,ما راح اتساعديني "
"لا تقول جذي انا الحين قاعده اساعدك " لفت على ريلها اللي باين عليه انه مو عاجبه الوضع , و ردت لفت علي وقالت "انزين شنو المواصفات اللي تبيها ؟"
"اللي ابيه انها تكون قريبه من عمري ,ابيها تكون 27 ,28 ملامحها غربيه ,المواصفات المعتادة انها تكون خوش ابنيه وطيبه وحبوبه وهالسوالف ,انطرج اخر الأسبوع ,بتقدم لأحد بمساعدتج ولا بدونها " السالفه ما كانت عاجبتها و ما كانت مرتاحه وهذا باين عليها ,وتعابير خالد المعصبه والمتنرفزه حسستها بعدم الراحه اكثر , قالت لي "عمر ما ابي ابلش بنت الناس معاك..., اخاف هذا رد فعل روح لفجر"
خالد ومها لاحظوا انه المواصفات اللي اختارها عمر كانت مناقضه لمواصفات طليقته بس ما علقوا على شي (مثلاا طليقته صغيرة واهو يبي كبيرة , ومها لاحظت انه يبي البنت ملامحها غربيه وطليقته ملامحها شرقيه بحته )
لما سمع عمر كلمتها قاطعها "ما راح تبلشين احد " طلع خالد صوت جنه مو مصدق كلام صديقه ,عطاه عمر نظرة وقام وهو قايم سمع مها تقول لخالد "خالد انا خايفه عليه "


(اه يا مها لو تدرين اني كنت خايف من اللي بجبل عليه بعد الفشل اللي صابني بتجربتي الأولى)
لحقني خالد عمر ونادى "عمر ,عمر "
"مو وقته يا خالد ,مو وقته "
"إلا وقته متى تبغى نتكلم عن هالشي بعد ما تتزوج وتتعذب وتعذب بنت الناس معاك "
لف عليه عمر وقاله "خالد انا ما اقدر على جذي ,خلاص ما اقدر ,افهمني ,لازم اتخذ هالخطوة عشان اثبت لحالي اني اقدر اعيش ,عشان اتأكد اني مارح افقد عقلي ,ان استمريت بالحاله راح اجن"
وركب عمر سيارته وراح



(ومن وقتها وانا حاط حاجز بيني وبين الكل ,حتى بيني وبين خالد اعز اصدقائي ,جني احاول اني امنع الناس من انها تجرحني مثل ما جرحتني اللي كنت اسميها حبيبتي.)


عدا اسبوع بالضبط صار مثل ما كان يبي بالضبط , تقدم للبنت اللي شافها ,نورة , اللي بعد ما شافها حس بالراحه ,حس بالراحه لأنه انها كانت غير ,كانت على الرغم من جمالها ورقتها , وعرف انه عرف يختار لأنه من الواضح انها طيبه وحنونه وناضجه وهذا اللي كان يبيه, وتمنى انها ما تشكل خطر عليه.


بعد ما قبلت فيه
فيه (قعد يتساءل ,اصلا الحين يتساءل ليش وافقت عليه ,كان حاس انه مكتوب على جبهته انسان فاشل بالزواج , مسلم قلبه لجهة لا تستحق )


المهم انها قبلت .
خالد سانده مثل ما يسوي دايم لكن عمر كان حاس انه مو راضي .
بعد ما قبلت فيه, تحدد الزواج عقب اسبوعين ,اهو اللي قرر وهم وافقوا ,وهذا الشي اللي ريحه اكثر و اكثر.
من بعد ما طلقها ما سمع منها شي , ما دقت عليه ولا شي , جنها ما اهتمت , ولا هو اتصل , لما قبل العرس بيومين وارسل لها




بعد بكرة زواجي
و ما اوصيج استانسي بحياتج مثل ما انا راح استانس



ما نطر ثانيه بعد ما ارسل هالرساله إلا جاه اتصال منها ,ما رد عليها ,مرة ثانيها مارد ,وبعد الثالثه ارسلت له رساله :


عمر رد


ردت اتصلت وما رد :


عمر ارجاك ,رد علي لازم انتفاهم


اتصلت ومارد :


عمر ما تقدر تسوي فيني كذا ,عمر ما ينمزح بذي الأشياء


كان يشوف المسجات (الرسايل) ويحس بقلبه يقسى ,ألحين لما درت انه ما راح يردها وانه تركها ,قررت انه تتوسل له, حس انه وده يشوف لي اي درجه بتوصل ,فلما اتصلت رد بس ما تكلم .
هي كنها ما توقعت انه يرد ,تكلمت بشك وبصوت مهزوز كنها ترجف " الوووو "
"عمر اه اه انته تمزح صح ؟ تبغى اتعلمني درس " لما ما اسمعت رد بدى يسمع شهقات " عمر هذي المزحه بايخه اه ترى ابد ما تضحك "
واشتغل البكي " عمر الله يخليك لأ ,لأ ,لا تتزوج ,الله يخليك ,ما أقدر اعيش كذا رح اموت ..."
"عمر رد علي قولي انك ما تتزوج ..."
"اوكي شرايك نتفق انا بسوي اي شي تبغاه ,اي شي , انته بس قول انك ما رح تتركني "
قال بس كلمه وحده "انتهينا "
بدت اتكلم بهستيريه وببكي "لأ ,لأ ما اسمح لك ,ما تقدر ,انا رح اموت بدونك ما تفهم ,انا احبك آآآآآآآآآآآآآآآآآآآآآآآ ما اقدر اعيش من دونك ما اقدرررررررررررر ما اقدر ما اقدر آآآآآآه "
وصوت البكي علا اكثر واكثر ,اهني هو بدى يعصب ,يعصب من جد .
بس تكلم ببساطه "الحين قررتي انج ما تقدرين تعيشين بدوني , تأخرتي وايد ,انا باجر زواجي ,وانا وانتي انتهينا ,تسمعين انتهينا ااا"
"بس انا احبك ,انته حبيبي , لا تذبحني عمر لا تذبحني ,لا تتزوجها ,انته ما تحبها صح ,ما تحبها ,انته تحبني انا ,تحبني ,ما راح تتركني ,خلاص قلت انا اسفه آآآآآآآآآآآ" والبكي زاد
ما يدري ليش طرى بباله بذيك الحزه هذاا البيت بالذات من قصيده حامد زيد :
دخليك وفر دموعك ترى هدر الدموع اذلال
"رد قول ان هذا درس وخلاص انت سامحتني "
رد ببساطه "بس انا قمت احبها هي " سمع شهقتها
حست انها بتجن هالكلمه ما قد قالها لها , وألحين بيقولها حق غيرها بتموت ,قالت بشراسه "اسكت يا كذاب اسكت انا اللي تحبها ,اناااا بروحي "
بنبرة استفزازيه قال "اشرايج ايـــبها لج بالسعوديه تشوفينها ,وتشوفين جمالها "
صرخت فيه بأعلى صوتها "والله ان جبتها للسعوديه راح اذبحها واذبحك ,يالحقير ,يا السافل , يا الخاين...."
"تأدبي بالكلام معاي ,هذي اخر مرة تكلميني جذي تسمعين ,اخر مرة "
وكمل "استأذن هي على الخط الثاني وما ابي انطرها على شي ما يسوى" طبعا كان يكذب ما كان فيه احد على الخط الثاني بس ما كان يقدر يمثل البرود لوقت اطول. ولما كان بيسكره سمعها تقول
"انا بعد بتزوج" هالكلمه اللي قالتها بسرعه جنها كانت تحاول توقفه من انه يسكر التليفون ,نجحت ,بأنها تثير نيران بقلبه ,وقال من بين ضروسه "شقلتي ؟!!"
"قلت انا راح اتزوج واحد احسن منك "
"تزوجي " وسكت وقال بصوت جنه واحد يهمس "عشان بليله زواجج ,هديتي لعريسج شرايط مرته وهي تقول لطليقها انا احبك وتتوسل له انه ما يتزوج ,انا بسكر الحين حبيبتي على الخط الثاني"
وسكره وحذف موبايله على الطوفه وكسره وتفتت الموبايل و تكسر ,كان وده لو هي اللي جدامه كان كسرها مثل هالموبايل ,تقول بتزوج تقول ,لو ظل اكثر يكلمها جان وضح غيرته اكثرواحساسه بالتملك تجاهها فاضطر يسكره قبل ما تحس اكثر انها مهمه عنده ,اصلا اهو ما يدري شلون قال لها هالكلام ,ما عنده تسجيل لها ولا شي ,بس قال اول شي خطر اباله عشان يمنعها من الزواج,واللي طلع معاه كان اسخف تهديد طلع معاه بحياته ,ذيك الليله ما قدر ينام الا لما تأكد انه ما احد متقدم لها .

البارت الرابع
*** هونتهـــــــا ولكنهـــــا عيت تهـــون ...لا قلت راح الهم الاقيه جـــــدام ***








وتزوج ومرت سنه الزواج وهو مرتاح مع نورة ,نوره كانت مثل النسمه الصافيه ,حس انه مرتاح ما يقدر يقول انه عشقها لكنها اكسبت تعاطفه واحتلت مكان من قلبه ,حاول يحسسها انه يحبها ,حاول ,ويتمنى انه قدر ينجح.
كان يحاول و زوجته ينجبون طفل , ماكان متحمس للفكره بعد تجربته الأولى بس كان وده يسوي اللي يرضيها عشان ما تحس انه فكره يسافر ملايين الأميال لشخص ثاني ,عشان يخفف من تأنيب الضمير اللي يغمر قلبه من ناحيتها ,إلا انه كل محاولاتهم افشلت فشل ذريع وبدى الخوف يتسلل لنورة .
اهو ما كان ناوي يروح للطبيب لأنه عارف انه عنده قدره على الأنجاب وما كان يبي نورة تعرف انه ما فيه شي عشان ما تحس بالنقص ان كان منها إلا انه بعد الحاح منها توجهوا للطبيب عشان تتأكد نورة انه ما فيهم شي , ظهرت تحاليل عمر قبل والحمدلله كان كل شي سليم ,لكن الغريب انه تحاليل نورة تاخرت ولما اظهرت طلب الطبيب من عمر الحضور شخصيا وبروحه ,الخوف تملك قلب نورة وبدت تحاتي ,لكن عمر حاول انه يطمنها مع انه هو كان يحتاج لأحد يطمنه, لكنهم ما توقعوا اللي صار.


يوم المقابله مع الطبيب قبل سنتين :

كان عمر ينطر بعياده الطبيب , الدكتور دخل عليه بوجه صارم وقلق , جلس الطبيب وقال بصوت قمة بالبرود "انا اسف اني اقولك ,انه عندي اخبار سيئه للغايه " قلب عمر بدى يدق بقوة " انته انسان مؤمن ,وتدري انه كل شي قضاء وقدر" عمر كره هالمقدمه ,كرها من قلب ,لأنه قلبه كان بيوقف شالمقدمه السخيفه ,ليش ما يدش بالموضوع فقال بسرعه "إذا المسأله انه احنا ما نقدر نيــــــــــــيب عيال ,فعادي "
الدكتور شاف عمر وقال "المسأله مو انكم ما تقدرون تيبيون عيال ,المسأله ليش المدام ما تقدر تيـــيب عيال "
ولما شاف انه عمر سكت قال "الموضوع صعب علي ,لكن انا مجبور اني اقوله ,وتذكر انه العلم الحديث تطور و..." قاطعه عمر وقاله "شرايك تدخل بالموضوع على طول"
"المدام فيها (لوكيميا), سرطان الدم ,والمشكله انه بمرحلة متطورة"
اكيد انه ما سمع عدل ,هذا اشقاعد يقول , نورة توها صغيرة "ما فهمت "
كان يبي الدكتور يغير كلامه ,كان يبي يكون بكابوس ,يبي نورة تقعده من النوم وتقوله عمر اسم الله عليك هذا كابوس
الدكتور كان مقدر ظرف عمر فقال "يا اخ عمر , لازم المدام تدخل المستشفى بسرعه ,والحكومه راح اتسفرها على احسابها ,انا راح اطلب تشكيل اللجنه بصورة مستعجله , وان شاء الله خير"
وشرح الدكتور كل شي ,لكن عمر وده يصرخ بالدكتور ,يطلب منه انه يسكت ,وده يقوله انه كذاب, وده و وده و وده ...بس ولا شي من اللي كان يتمناه صار
لما سلم عليه الدكتور ورافقه للباب ,بدت مرحله يديده من حياته.


مرحلة امريكا :

اتخذ عمر كافه الأجراءات وبصورة مستعجله , لما وصلوا لأمريكا جرى كل شي بسرعه , خذوا نورة لغرفه خاصه واجروا التحاليل من جده وجديد , كانت نورة قويه وانسانه مؤمنه ,كبرت بعينه ,لما قال لها الخبر سكتت ثم ابتسمت وضمته وقالت له راح نقدر انتغلب عليه مع بعض بإذن الله .
امها ما كانت تقدر اتسافر ,الناس كان يروحون ويجون لعندهم بأمريكا ,لكن اغلب الوقت يكون بروحه معاها , يدير باله عليها .
بعد التحاليل بلشوا الدكاترة بالكيماوي ,كانت حالتها تتطلب انه يبلشون بالكيماوي قبل عمليه النخاع, الكيماوي اللي اضافه للضرر الجسدي كان يسبب لها ضرر معنوي ونفسي ,صارت نفسيتها سيئه , ما كان يقدر يخليها ,ما يخليها إلا إذا راح للحمام او مقابله الطبيب ,كان دايم ينام عندها ,يشوف ويهها لما اتنام عشان يتأكد انها تتنفس ,ان تركها لحظه يحس بتأنيب الضمير, يحاول يتماسك لأنه نفسيته اهو بعد كانت مو زينه , كم مرة بعد الكورس اللي تاخذه تطرده من الغرفه وتنهار بكي ,واتحسس من كل كلمة يقولها ,غير الترجيع وسقوط الشعر , وانعدام الشهيه للأكل بس اهو يحاول يبتسم بويهها ويقرى عليها قرآن او يقص عليها قصص تضحك صارت معاه بطفولته أو يتكلم عن امه او اخته ,وهي كانت تسمع وان كانت نفسيتها زينه تبتسم او تضحك او تنام بنص السالفه , بعد يوم من الكيماوي او يومين تتعدل النفسيه شوي تسولف وتبتسم ترد تاخذ الكورس ويرد الوضع على قبل.
يذكر لما بدى تساقط شعرها يأثر على نفسيتها كيف سوى لها حفله عزم المرضى والممرضات والدكاترة بغرفتها و خلى نورة تقرع شعره, وكان يسمع تأوهات الممرضات ( شعره كان طويل شويه وكثيف وناعم) ,فقامت تضحك بفرح لما شافها جذي ارتاح وضحك معاها , لف عليها بعد ما خلصت والتقت عينها بعينه وقال لها "اشرايج نقرعج انتي بعد "
جنها تفاجأت من الفكرة ,لكن فجأة حست بروح المغامرة و ابتسمت له وقالت "يلاا "
وقرعها ,يشوف شعرها الحلو يطيح وبدى يقول نكت لها ويضحك عشان ما تحس بالألم ,وأهي كانت معاه على الخط ,لما خلص شاف ويهها ,كانت جميله ,جميله وايد ونقل لها على طول احساسه وقال لها بصدق منقطع النظير "انتي حلوة " وعطاها المنظرة
لما قال لها جذي ظنت انه يمزح وبغت تتطنز على شكلها بس لما شافت عينه عرفت انه صادق , دمعت عينها
وضمها لصدره وده لو يقدر يحميها ويخبيها داخله ويبعد عنها الألم .
وكان هذا من احلى ايام امريكا .
لكن بعد الحفله انتكست حالتها , بعد ما تحسست من الكيماوي الجديد اللي قدموه لها ,ودشت العنايه المركزه ,كان طول هالفترة عند راسها يقرى عليها ,بعد مرور شهرين بالعنايه ,الله ردها لهم وله هو بالذات .
لما طلعت من العنايه المركزة ,ظلت معاه كانت صحتها مو ذيك القوة لكن احسن , والطبيب قاله ان عمليه النخاع هذا وقتها.
كان اهو متحمس وهي بعد كانت متحمسه للعمليه ,من الحماس ما كانت تقدرتنام فظلوا يسولفون مع بعض طول الليل ,كانت تقوله الأماكن اللي تبي تزورها معاه بعد ما تتعافى ,كان يقولها عن الأماكن اللي هو زارها ,يوصفها لها وشنو اكثر شي عجبه , لكن بعدين التعب تغلب عليها وقدرت تنام ,وجلس يتأمل تعابير ويهها الحلو .
كان مرضها سبب في تقريبهم من بعض كان ندمان على اللحظات اللي اضطر انه يشتغل فيها او يبتعد عنها حتى لو بفكره ,وقرر انه بعد العمليه راح يغير وايد اشياء بحياته معاها .
وما حس بعمره لما غفى على سريرها ,لكنه قام على لمسات مثل رفرفات الفراشه على خده ,لما فتح عينه شافها قاعده تناظره وقالت الشي الوحيد اللي ما يقدر ينساه " احبك " ابتسم وغورقت عيونه ,ابتسمت له , قالت له " انته نعمه من رب العالمين , وجودك معاي كان نعمه"
"نورة شالكلام "
حطت ايدها على حلجه ما تبيه ينطق بشي , وقالت " ما تدري شنو راح يصير بالعمليه حبيبي " شافته بيقاطعها " لأ يا عمر لازم انتوقع الأحسن والأسوأ, لكن ابيك تدري انك كنت قوتي بوقت كنت فيه جد ضعيفه , ما احد كان راح يصبر علي طول هالفترة إلا انت ,مشكــــــــــــــــــــور عمر, حسيت اني محظوظه "
"لا تقولين هالحجي , انا مهما اسوي ما راح اقدر اوفيج حقج , نورة انتي اسعدتيني بلحظه كانت حياتي فيها ظلمه , عرفت من اللحظه الأولى اللي شفتج فيها اني عرفت اختار, تدرين انتي لما تقومين بالسلامه انا راح اغير كثير اشياء بحياتنا , نورة انا ..انا اسف على ...."
نزلت دمعه من عينه لأول مرة بحياته ,مسحتها بأصبعها وحضنت وجهه بأيدها الثنتين "لا تعتذر عن شي , حياتنا ما كانت راح تكون احلى من جذي , حسيت بحبك بكل لحظه من حياتي معاك "
وهذا اللي حسسه بتأنيب الضمير ,ابتسم , بهاللحظه دخلوا الممرضات ,فباسها وخذوها , مرت الثانيه جنها ساعه عليه ,كان يلاحظ انه الساعه ما تتحرك حتى انه شك انها تشتغل ,كان يحاول يشغل عمره ويرد يشوف الساعه يكتشف انها تحركت بس دقيقه , كان الأنتظار قاسي على قلبه ما عاد فيه , تمنى انه يطلع له الدكتور ,لكن لما طلع ندم انه تمنى هالأمنيه
نقل له خبر من اسوأ الأخبار بحياته , ما بكى وقتها وما بكى بعد هاللحظه ,اصلا ما يذكر شنو صار عليه بعد هالخبر ,كل ذكرياته بعد هاللحظه ضبابيه بس يذكر انه اتصل على الناس اللي المفروض يتصل عليهم وعمل الأجراءات اللازمه ,ردته للكويت و العزا وغيره ما يذكر منه شي ,كانت الأشياء تصير جدامه ويحس جنه بره الحدث قاعد يشوفه من مكان ثاني .
بعدين غرق روحه بالشغل ,صار شغله عماد حياته ,كل رحلات المتعلقه بالعمل في الوقت الحالي هو اللي يقوم فيها .
رجع للحاضر على صوت منبه الساعه ,الحين الساعه 6 لازم يتزهب قبل ما يجي خالد ويشخله على التأخير ,بروحه معصب عليه ,ماله خلق يزيد النار حطب .

البارت الخامس
***فينى الم ما مر فى قلب مطعــــــــون ...فينى حزن ما مر فى عيون ايتـــــــام***









صحت مبكر مثل عادتها دايم لما تكون بالمزرعه عند جدها ,الكل نايم من بنات عمها , اعيال عمها مو في , الحمدلله ما كان لها خلق دوشه العيال, راحت تسبحت ولبست بنطلون جينز وبدي ضيق وجاكيت , تدري جدها مثل ابوها ما يعارض على لبسها او يعلق عليه , نزلت وهي فرحانه تحب المزرعه كثير خاصه انها بتكون مع خيلها (الجوهرة) , شافت جدها يفطر وسرحان , فقالت له "صباح الخير جدو" وباست راسه , هو تنحنح وقال بصوته القوي " صباح النور" وكان شكله بيقول حاجه لكنه تراجع , فبادرته "كنت بتقول شي جدي "
"في ضيف بيجيني اليوم "
" حيا الله الضيف , تبغاني اوصي الخدم على حاجه "
تنهد وقال " لا انا قلت لهم " وسكت شوي ورد قال " سمعي يا بنتي , انا ما ابغاك تنصدمين لما تشوفين الضيف اللي جاي " والتقت عينه بعينها , ما تدري ليه بدى قلبها يخفق بقوة وقالت " ليه انصدم ؟ جدي, انا وش دخلني بالضيف !"
"الضيف هو عمر بن سعود ال....."
طاحت من يدها الملعقه اللي كانت ماسكتها بقوة على الصحن وطلعت صوت مزعج , لكنها تمالكت نفسها بسرعه ,وخذت الملعقه وبدت تاكل , ورفعت راسها لجدها وابتسمت " فاجأتني يا جدي ,عمر , عمر وش جابه لهنا "
جدها لما شاف الأبتسامه كنه ارتاح , وتناسى ردة فعلها الأوليه وقال " انا لما دريت انه بالسعوديه قررت اني اعزمه , انا عازمه من قبل ما أدري انكم جايني انتي وبنات عمك "
كل كلمة من جدها طعنه توجه لقلبها , جدها قرر يعزمه , جدها قرر انه يعزم عمر على المزرعه , جدها يحب عمر .
كنه مو كافي انها اكتشفت لما اشتغلت عند ابوها في الشركه انه ما قطع علاقته التجاريه معه , حتى يجي جدها ويقول انه عزمه .
ما حبت تسأل اي شي , ما حبت تعرف شي ,بس كانت تتمنى انه الصحن اللي قدامها يفضى من الأكل عشان تستأذن وتروح .
بعد ما خلصت من حشو الأكل بفمها , استأذنت من جدها , لما اظهرت من الغرفه وظنت انها ابتعدت عن مرمى نظر جدها بدت تجري
جرت
جرت بأقوى ما عندها تبغى توصل للأسطبل قبل ما تموت .
ما حست بأنظار الرجال الكبير اللي تلاحقها من الدريشه .
ركبت (الجوهرة) وجرت فيها , ما حست انها تبكي إلا لما حست بطعم مالح على شفايفها ,
سمعت صوت امها الجاي من نبع الذكريات العميق :
القطرة الأولى من النبع : طفله عمرها 6 سنين تسمع امها تكلم جارتها "عنود وش تبين بالبزران , انا عندي وحده وطايحه بكبدي, اتصدقين احس اني كرهت البزران, البنت لصقه فيني أعوذ بالله "
القطرة الثانيه : طفله بعمر 7 سنين بمجلس للحريم"الأطفال سنتين وبس خلاص تمليــــن منهم ,بعد السنتين يصير دمهم ثقيل "
القطرة الثالثه : طفله بعمر8 سنين تلعب حول امها بالبيت اللي نادر تتواجد فيه "ريم كفايه لا تلعبين حولي ,جد قلق "
القطرة الرابعه : طفله بعمر 10 سنين نادتها امها لغرفتها "ريم يا قلبي اياك تربطين نفسك بالعيال مع اي رجل , انا امي قالت لي انك تكسبين رجلك بالأطفال ,شوفي حالي لا كسبته ولا حاجه , الطفل بيقيدك ويربطك ويغثك "
القطرة الخامسه : طفله 10 سنين تسمع امها تتخانق مع ابوها " اسمع يا حمد بنتك ما ابغاها , خذها لك , انا بس الطلاق اللي يهمني"
القطرة السادسه : طفله 10 سنين واقفه عند الباب تشوف امها لأخر مرة "انا وابوكي رح ننفصل , انا ما استحمل اكون مع رجل ما اشوفه غير بالسنه مرة ,و ما ادري إذا كان ودي اشوف اي شخص يذكرني فيه او بحياتي معه"
اطلعت من نبعها الخاص بصرخه "خلص يمه خلص, حرااام عليكي خلااص " , نبعها كان ممتلي جروح من أمها , ممتلى قطرات ممزوجه بدم قلبها .
هالذكريات جت بس من طاري اسمه , تعقيداتها الطفوليه كانت السبب الغير مباشر لأنفصالها عنه , كانت السبب الغير مباشر بأتخاذها لقرارت خاطئه , الدموع بدت تنزل بكثافه , مافيه احد يقدر يتحملها إذا امها وابوها وزوجها ما تحملوها كيف الغير.
كرهت الضعف اللي تحسه كلما جابوا طاريه , تكره الدموع اللي تنزل من عينها لفرقاه .
ليه جدها وابوها ما يحطون لها اعتبار , ما يفكرون بمشاعرها , ما يحاولون يفهمونها .
حرام عليهم اللي يعملونه فيها , حــــــــــــــــــرام .
كيف يخلونها تواجه شخص ما يحبها ,ما يشتهي يشوفها وهي ميته عليه.
وصلت لمكانها المفضل بالمزرعه كلها , البحيرة الصناعيه , هناك نزلت من على ظهر (الجوهرة) وبدت تبكي قهرها و الذل اللي حست فيه لما قال لها جدها هالكلام .
الذل لأنه قلبها فرح من سمع طاريه وفز لما درى انه فيه احتمال انها تشوفه .
هي كانت تدري انه جدها وابوها يدرون انها السبب بالطلاق , انها الغلطانه , كانوا حاضرين المشهد اللي انهى زواجها , كانوا حاضرين لما قال لها الكلمه اللي انهت علاقته فيها.
من بعد ما عدت الأيام الأولى من الصدمه ,الطلاق صحاها من اللي اهيه فيه , وبين لها ان عندها مشاكل لازم اتعالجها , راحت لطبيبه نفسيه طلبت منها انها تساعدها , تساعدها بالتخلص من مشاكل طفولتها , من مشاكل مراهقتها الأولى قبل معرفتها بعمر , راحت للطبيبه عشام تبين لنفسها ولعمر انها خلاص بتتغير وانها بتكون احسن ,عشان تكسب ثقته مرة ثانيه ويردون لبعض .
لكن جتها مسج (الرساله منه) قبل انتهاء عدتها بأنه خلاص بيتزوج غيرها ,احلامها بأنه قاعد ينطرها وانه بيكون موجود تلاشت ,انتهت , كانت بتسويها له مفاجأة انها خلاص قررت تواجه الماضي وانها راحت لطبيبه نفسيه على الرغم من معارضه اهلها لذا الشي, ما صدقت الكلام اللي بالمسج مو معقول شخص كان معاها مدة تسع سنين بيتخلى عنها بهالسهوله , كانت متأكدة انه عقاب لها على اللي سوته واللي قالته ,كانت واثقه انه كلامه مو حقيقي , كان زوجها من كان عمرها 15 سنه , إلا انه ثقتها ما كانت بمحلها لأنه زواجه كان حقيقه مو خيال , المكالمه الأخيره انهتها .
ماله حق يرجع يدخل بحياتها كذا , ماله حق.



بيت المزرعه :



لما شافها تجري ,عورت قلبه , درى انه جرحها وتأكد من كذا لما شافها تنطلق بسرعه بخيلها "الجوهرة" , عادتها تبدي صباحها بهدوء مو زي كذا .
كان يتمنى انها وزوجها يرجعون لبعض , وإلى الأن يتمنى هالشي , لكن الحياة علمته صدق كلام الشاعر اللي قال
ما كل ما يتمناه المرء يدركه *** تجري الرياح بما لا تشتهي السفن
لكن لازم احد يحاول , وضع بنت ولده ما ينسكت عليه .
يشوفها تعاني و تظن انه ما احد يحس فيها , تظن انه ما احد قادر انه يشوف انها تكابر وانها تتألم بصمت .


القصر :

كان يناظر بالسقف من اول ما تمدد البارح بعد مواجهته مع امه , ما يدري هو نام ولا لأ ؟
يحس انه غفى ثم صحى ثم غفى ,وكذا لما صلاة الفجر , اللي بعدها ما قدر يحايل النوم .
كيف يقدر ينام وهو بهالمشاكل , وعلى راسه حمول لو انحطت على جبل كان هدته , اكيد هي نايمه ولا همها , وش ايهمها ؟ كانت تدري انها حامل وكانت جايه للسعوديه وهي تدري انه فيه احتمال انها تشوفه , حس انه تفكيره مو منطقي , اكيد هي خايفه بعد , بس ما حب يفكر من وجهة نظرها , ما يبغى انه غضبه يهدى من ناحيتها .
شاف الساعه للمرة المليون لما شاف انها صارت 6 تحرك للحمام وبعد ما لبس ,طلع من جناحه .
ما التفت ناحيه غرفتها ابد ماله نفس , حاقد عليها , ويحس ان ناظر جهة الغرفه بيدخل وبيسوي شي يندم عليه من الأعصاب .
نزل بسرعه للدور السفلي من البيت اللي كان هادي , الكل نايم , مين بيكون صاحي يوم العطله
مبكر , خاصه انه امس كان فيه حفله ,راح لغرفه الطعام لأنه امه دايم تصحى بكير مهما كان وقت نومتها بس استغرب انها مو موجوده .
راح للمطبخ على امل انها تكون هناك لكنه شاف الشغاله فقال لها
" ماري وين ماما ؟"
"ما كو هني بابا ,يقول ما يبي فطور"
"اهااا " اه يا امي ليه كذا , يعني وش فيها لو جيتي فطرتي معي .
"بابا انته يبي فطور "
"لاا ما يبي"
وطلع وهو مو طايق عمره .
وصل الفندق اللي فيه عمر بسرعه قياسيه , وصعد لعمر اللي كان معطي الأستقبال خبر , توه بيدق الباب تفاجأ انه الباب انفتح وعمر مستقبله بابتسامه شاقه الحلق , دخل بدون لا يرد الأبتسامه , ولف على صديقه اللي قال " شدعوه ماكو سلام ولا كلام " كان لما الحين مبتسم
"كيف تسمي حالك صديقي وانته ما قلت لي ؟"
" كاك دريت يا اخي , اشصار يعني ؟ "
بان على خالد التعصيب بزود .
" عمر لا تنرفزني , تستهبل حضرتك "
اهني عمر اهو اللي تنرفز , و رد مرة ثانيه احساس انه كان لازم يمنع هالزواج .

.

"خالد انا قايل لك و لها , اني ما راح اتدخل بشي بعلاقتكم , انته صديقي المفضل واهي بنت اختي المفضله , انا حذرتك وحذرتها "
كان بينفجر من عمر , هذا وش يقول , معقوله مسأله حملها ماخذها بالبساطه ذي " بس هذي مسأله حياة , اشفيك انت ما عندك احساس "
" اوف الحين السفرة حق السعوديه صارت مسأله حياة او موت , اشوف قلبنا فيلم هندي "
اهني عرف خالد انه هو وعمر يتكلمون بمسألتين مختلفتين .
من اول ما دخل خالد وهو رايح راد بالغرفه من الأعصاب اللي جاته , وهنا بس وقف وقال بنرفزة " اي سفرة اي بطيخ , السفرة بدون اذني ما تسوى بالنسبه للسالفه الثانيه "
علاا صوته وقال " ليه ما قلتي لي ....ليــــــــــــــــــه ؟"
"لا تتكلم معاي بالألغاز شأقــــــــــولك ؟!!!!!" وجه عمر كان مثال للحيرة " اي سالفه ؟"
قال من بين اسنانه " بنت اختك المحترمه حامل , هذا اللي كنت ابغاك تقوله لي , انها حامل ........انت كيف اتخليني اخر من يعلم ,كيف يا عمر , هذي المسأله مهي سهله , هذي حياة تفهم وش يعني حيـــــــــــــــــاة ,حياة ولدي"
عمر كان يناظره بأنصدام "مهــــــــــــــــا "
"انت تقصد انه مها حامل !!! "
"رد علي مها حامل ؟؟؟؟"
قال خالد بعصبيه " يعني تبي تقنعني انك ما تدري , انكم ما تدرون انها حامل بثلاث اشهر "
" خالد انته شتــــــــــــقول قسم بالله ما كنت ادري , والله العظيم ,بس اه شلون ....شلون "
"يعني انت ما عندك خبر ؟؟؟"
"لا والله , قسم بالله ما عندي , يعني تهقى لو دريت كنت خشيت عنك موضوع هالكبر؟؟"
تنهد خالد هنا من قلب "بنت اختك خلتني اشك بنفسي مو بس انت " يحس انه الحين ارتاح على الأقل شويه انه صديقه ما كان مخبي عنه شي بذي الأهميه ,هذا الشي خفف عنه بطريقه ماا " ايه حامل , تخيل , حامل , وانا اخر من يعلم .......... اخر من يعلم " و قعد يحس كنه ما عنده قوة وانها استنزفت منه بالكامل .
" لااااااااااا بهالحالة مو انت اخر من يعلم , انا اخر من يعلم , شلووووووووون ما قالت لنا, شلوووووووون ما قالت لي ؟؟" وصوته كل ما له ويعلى , "اصلا ليش خشت السالفه عنا , ليش خشتها عن ابوي سعود ....ابوي سعود يدري ولا شنو ؟؟"
" والله ما ادري , ما أدري عن شي "
" انته امس دريت ؟"
" ههه هذا اللي يضحك , تخيل دريت امس بالليل " وسكت بغيض "ولااا بالصدفه بعد , يعني الحلوة ما كانت ناويه تعلمني ... تدري ايش قالت لي !!"
ما كان ينطر رد من عمر , قال "تقول ست الحسن والجمال انه هالببيبي لها لوحدها وانه مالي دخل فيه .....تخيل ابوه ومالي دخل فيه "
شتقصد مها من هالكلام ,هذي الظاهر مو صاحيه , ولا فيه احد عاقل يقول جذي , ما عرف شيقول , اهو و وده يذبح مها انها ما قالت له وهو خالها , فما بالك خالد اللي هو ابو الطفل اكيد وده يقطعها تقطيع , شلون مها تسوي جذي فيهم كلهم , شلون تخش موضوع بهالأهميه , معقوله كانت تبي اتطيح الياهل , ما كان حاب ينرفز خالد اكثر مما كان متنرفز فمسك اعصابه وخش ظنونه , كان يدري انه علاقه خالد بمها فجأة توترت ومها قررت فجأة انها تبي الطلاق ومو راضين يتكلمون عن سبب خلافهم وهذا خلى اللي حولهم يتوترون ومو عارفين يصلحون بينهم , ولما ألحين هو ما يدري من المسكين خالد ولا مها .
لكن بالوقت الحالي يدري انه مها غلطانه وانه إذا تكلم الحين بيسب مها على اللي مسويته.
" تصدق كلما اتذكر كيف كنت قريب اني اصفقها كف من اول ما عرفت , استغرب كيف مسكت اعصابي " خالد كان وده يفضض.
بس سكت
ما قدر , وكتم الكلام بصدره مثل ما يكتم هالأشياء دوووم.
عمر كان يشوف صاحبه وعوره قلبه عليه , هالغبيه مهااااااااا , لازم يكلمها بأقرب وقت ممكن هالزفته , هذا الشي ما ينسكت عنه .
" خلني اطلب لك ريوق و قهوة واطلب لي , احس راسي صدع من المفاجأة "
" انا وش أقول , ما قدرت انام امس يا اخي من التفكير "
"يا معود شوف الجانب الإيجابي من السالفه , الحمدلله انك دريت الحين , وانك بتكون بحياة ولدك من البدايه" قال هالكلام وهو رايح يتصل عشان يطلب.
ابتسم خالد ,هذا من احلى الأشياء بعمر ,إذا قلت له سالفه تطلع الواحد من طوره يلقى لك الشي الإيجابي على طووووووول .
"ايه وانت الصادق , الحمدلله "
فجأة طرى على عمر شغله نساها مع المفاجأة " وخالتي درت " وعرف الإجابه من نظرات خالد "شصار ؟ "
" زعلانه علي " وبضكحه ساخره قال " تخيل درت عن ابنها انه متزوج ولاااااا مو بس كذا وحرمته حامل , الله يعين بس"
وسكتوا كل واحد فيهم غارق بأفكاره لما دق الباب الروم سيرفيز .
وهم يشربون القهوة بدون كلام ,قال عمر فجأة " انا رايح لمزرعه بوحمد "
خالد نزل القهوة من يده , وقعد يشوف عمر كنه ينطر انه يقوله انه يمزح او انها نكته سخيفه او اي شي بهالمعنى.
خالد كان يدري انه عمر بيروح مزرعه بس مزرعه من ما يدري و ألحين درى !
قال له عمر بصوت هامس "ما ادري اشلون صار هالشي ,لا تسأل" بعد ما التقت عينهم
رجع خالد يشرب قهوته وقال " ما راح اسأل"
وهم يشربون القهوة قال عمر فجأة "اسأل "
ظل خالد ساكت وقال بهدوء وصوت عميق "شلون قررت انك تروح ؟"
" والله ما ادري , هو كان يدق علي من انفصلت عن ..." غص بالأسم وقال " عنها ,المهم , هو دايم يعزمني على المزرعه وانا اتعذر بشغلي , لما دق علي اخر مرة وهزئني" وبدى يضحك بسخريه من نفسه " هههههه وقالي إذا ما جيت ما راح تعرفني ولا اعرفك "
بدى يشوف ويه خالد ينطر تعليق وماكان فيه شي قال " ما ادري ليش وافقت بس كسر خاطري ما حبيت ارده , انا من كنت مع.... معاها وكانت له معزة خاصه هالريال ,يذكرني بيدي , نفس طريقته واسلوبه .."
قاطعه خالد " انت متأكد انه عشان ذا السبب ولا في سبب ثاني ؟"
عمر فهم عليه على طول بس قال " اشتقصد ؟؟ "
" يعني انت مو فاهم "
"لا , لا تخاف , هي ما لها علاقه بقراري اني اروح المزرعه "
" متأكد ؟"
"ايـــه متأكد , هي صفحه وانطوت بحياتي "
"على العموم إذا كنت مقتنع بقرارك ,فهذا هو المهم "
كل واحد فيهم يفكر بالخبر الجديد اللي جابه له الطرف الثاني ,قام خالد بعد ما شرب قهوته وقال " يالله انا مضطر اروح البيت الحين , بس ابغى قبل ما اروح , اخذ اغراض بنت اختك "
عبس عمر وقال " اهي مطوله عندك , انا برد الكويت عقب باجر , ما في داعي تاخذ جنطتها "
قست نظرات خالد لدرجه مو طبيعه " بنت اختك بتظل قدام عيني , طول فترة حملها , وراح نتفاهم على كل حاجه بعد الولادة "
" لهدرجه مو مشتهي تقول اسمها , مو ملاحظ انك من اول ما دخلت ما قلته !"
" ما احب اقول اسمها بهاللحظه مثل ما انت تكره انك تقول اسم ذيك "
انتفض عمر مثل الملدوغ " خالد إذا المسأله وصلت ليه هالدرجه خلها تييي معاي الكويت , لا تخلي الوضع صعب عليك وعليها , و لا تنسى انك متكلم على بنت عمك "
" لا تتدخل بيني وبين حرمتي ....اظن انه هذا السبب اللي منعك انك تقولي انها بالسعوديه "
"لا والله عرفت اتسكتني , بس تأكد يا خالد اني ما ارح اسكت ان انضرت بأي شكل من الأشكال "
ما رد خالد على هالكلام وقال " وين شنطتها"
"قول وين جناطها مو جنطتها !"
راح عمر بدون كلام للغرفه الثانيه , والحمدلله انه ما كان مضطر انه يدخل اشياء كثير ,سكر الجناط وعطاها صديقه
خالد جلس يناظر الشنط وهو مو مصدق عينه "ثلاث ! جايبه معاها ثلاثه "
"هههه الله يهداك خالد يعني ما تعرف مرتك"
"هه بس يا عمر ما توصل لثلاثه شنط لثلاثه ايام "
شاف عمر الجناط وقال "لا عادي انا متعود عليها "
"وانا الغبي ظنيت اني قدرت اوقف هالشي !!"
"هههههههه لا يمكن كانت تجاملك ,لأنك زوجها "
عطاه خالد نظره " لا يا شيخ !!" وكمل بعد ما شاف الشنط كلهم " اتصل على الأستقبال يجيبون لنا عامل يحملهم , يا اخي ما اقدر انا لحالي "
عقب ما جى العامل قال له عمر قبل ما يروح " دير بالك عليها يا خالد"
تنهد خالد وقال " مع السلامه "

القصر :

ساره من صحت من النوم وهي مهي متأكد ان كان اللي صار امس حلم ولا علم , البنت الحلوة بالعرس , اتصال اخوها , اكتشاف انه اخوها متزوج , وانه مرته حامل , انه جابها معاهم للبيت و انها نايمه بالغرفه اللي جنب جناحه .
كل ذي الأشياء مو منطقيه او بالأصح كنها مو حقيقيه , ما قط تخيلت انه خالد يسوي هالشي .
طلعت من غرفتها بعد ما البست وتعدلت وراحت للغرفه اللي قاعده فيها الغريبه اللي اسمها على حسب الحلم مها .
كانت بتفتح الباب بس ترددت بأخر لحظه , إذا كان اللي صار البارح حقيقه مو حلم , راح تزعج الحرمة .
لأ انزل تحت اتفطر قبل ما اتهور وادخل وافزعها .
لانها استوعبت ان اللي صار امس مو معقوله انه يكون حلم .
نزلت لطاوله الفطور ولأول مره بحياتها ما تشوف امها وخالد جالسين يفطرون مع بعض , كانت امها جالسه وباين عليها السرحان وعدم التركيز وكان بدر جالس يفطر وشكله حاس بالجو المتوتر اللي حوله .
قالت سارة بصوت عالي " صباخ الخير "
بدر شافها كنها حبل النجاة , رد عليها " صباح النور يا هلا والله "
رفعت حاجبها " وش هالترحيب الحار اليوم , عسى ما شر استاذ بدر "
باست راس امها اللي باين عليها انها توها انتبهت لها وجلست تفطر , خمس دقايق ودخل خالد
بكل هيبته ,وقال " السلام عليكم " وعينه كانت على امه اللي ردت السلام بغير نفس.
راح وباس راسها لكن امه صدت عنه , قامت كنها مو طايقه عمرها , بدر شاف انصراف امه وهو متفاجأ ولف على سارة اللي عيونها كانت على امها ومليانه قلق والتفتت على خالد اللي باين انه متضايق و تعبان .
لف خالد على بدر و قال " كيفك يا بدر ؟"
بدر وهو لما الحين متوتر ومتفاجأ " الحمدلله بخير " وسكت ورجع ناظر سارة اللي كانت ساكته من اول ما ردت السلام .
هز خالد راسه بحركه زين وقال " الحمدلله , انا ما سألتك امس متى امتحاناتك النهائيه لذا الفصل ؟"
"بعد اسبوعين ان شاء الله"
"إذا تبغى اي شي يا بدر انا موجود , وانت تدري بهالشي "
" ادري الله يخليك لنا"
لف خالد على سارة وقال لها "سارة ,تدرين إذا صحت ولا لأ؟"
عرفت عن من يتكلم لأنه امهم كانت جدامها وما عندهم مؤنث ممكن يهتم فيها خالد إلا مها
اشارت له بدون ما تتكلم انه (ما أدري )
" زين , يلا انا استأذن "
اول ما طلع خالد رد بدر ناظر في سارة وقال لها
"ايش فيها امي على خالد اليوم , اول مرة اشوفها زعلانه عليه ؟"
" فيهم اللي فيهم يا بدر ."
"ايش فيهم اللي فيهم , انا ابغى اعرف , ماني بزر ,انا واحد منكم وفيكم ؟!"
سكتت سارة محتارة تقوله ولا لأ , وقررت تقول لأنه مصيره بيعرف خاصه انه مها موجوده معاهم بالبيت مو معقول راح يكون الموضوع سر .
" وش اقولك يا اخوي , امس صار الغير متوقع "
" وش صار ؟"
"امس ما لاحظت انه خالد بعد ما زف المعرس اختفى "
قال بعد تفكير " ايه الكل لاحظ بس هو دق على عمي بو عبدالله واعتذر منه بشي متعلق بشغل , والله ماأدري, بس اعتقد بشي زي كذا , ليه تسألين "
"امس خالد كان معانا يودينا للبيت وكان معانا بنت "
" بنت وش بنته؟" و غمز بعينه " حلوة ؟"
صرخت فيه سارة وقالت "اسكت لا يذبحك خالد"
عرف من اسلوبها انه خالد له علاقه فيها " فيه علاقه بين البنت وخالد ,لا يكون تقصدين بالبنت سمر "
تنهدت وفقالت " لأ مهي سمر ,خالد طلع متزوج "
حس انه عينه بتطلع من الصدمه " ايـــــــــــــــــــــــِش , خالد متزوج , كيف ومتى وشلون "
" ايه طلع متزوج كويتيه بنت عمي محمد صديق ابوي , احنا ما ندري شالسالفه بالضبط , وطلعت حامل , المهم انهم كانوا بيتطلقون لكن صار الحمل وفركش الطلاق على الأقل بالوقت الحالي ,وهي بتعيش معانا , إلى ان تولد , اما بالنسبه لأسلئتك كيف ومتى وشلون , فما اعرف اجابتها "
طبعا بدر كان جد منصدم , هالشي مو متوقع خاصه من شخص مثل خالد ,بس بنفس الوقت حس بالفرح , هو بيصيرعم .
"يعني انا بصير عم ؟؟؟"
"وهذا اللي هامك انك تصير عم اقولك خالد متزوج بدون علم امي , وبدون لا ندري احنا وانت تقول بتصير عم , ما فكرت وش بيصير حق سمر بنت عمي لما تدري , يالله بعض المرات احس انك بزر "
وقامت تاكل بشهيه اقل بعد ما أثر فيها الكلام اللي قالته لبدر , فعلا خافت وش بيصير إذا درت سمر , معقوله العلاقات العائليه بتأثر , من الواضح انه علاقه امي وخالد متوترة بالوقت الحالي , ان شاء الله ما يتأثر شي ثاني .
بالنسبه لبدر فكلامها ما أثر فيه ابد وما ازال من الفرح ولا شعرة , انه يصير عم هذا الأهم اما بالنسبه للباجي فما يهمه

البارت السادس
*** يفز له قلبي كما فزة الطير ... والرجل كن اللي تحتها غدرها ***






الكويت :

بأحد اهم الشركات بالكويت , بعد ما خلص الأجتماع , ناظر الساعه واستغرب انه دلوعته ما اتصلت عليه , دايما بهالوقت تتصل عليه بس عشان تصبح عليه , وتقوله عن خططهها ليومها .
اتصل على خطها اللي فاتحته حق زيارتها للسعوديه ونطر ولكن ما في رد ,معقوله نايمه ليلحين و اتصل على ولده عمر اللي رد عليه بعد رنتين بس .
عمر استغرب اتصال ابوه مو عوايده يدق عليه إلا عشان الشغل حاول يراجع ذاكرته عن مواعيد الإجتماعات او غيره من الأشياء المتعلقه بشغلهم ما لقى شي بهالأهميه
"صبحك الله بالخير يبا "
" هلاا صبحك الله بالنور" وقعد يسمع صوت الشارع والسيارة فقال حق ولده " انته وينك الحين"
ابوه ما يسأل عن هالسوالف ,غريبه
"والله يا طويل العمر انا بالطريج حق مزرعه واحد من الربع , امر ؟"
" انت كيف تروح حق مزرعه واحد من ربعك وتخلي مها بروحها , ما تخاف على بنت اختك , انت شنو ما عندك احساس , انا الغلطان اللي سمحت لها تروح معاك ؟"
بغى يضحك اشلون نسى مها , المها اهي الشخص الوحيد اللي ابوه يبين اهتمامه لها , اما هم عياله فتربيتهم على حسب تفكير ابوه تحتاج لحزم . "يبا الله يهداك هد اعصابك , مها الله يسلمك بالحفظ والصون " وسب مها بداخله لأنها من الواضح ما قالت حق ابوه عن شوفتها لريلها , والحين صارت مسؤوليته اهو انه ينقل الخبر حق ابوه .
"كيف بالحفظ والصون وانت مخليها ورايح ؟؟ هاا ما تقول "
" يبا المرأة مع ريلها .."
قاطعه سعود وقاله " كيف تسمح لريلها ياخذها , انت ما تدري انه بينهم خلافات , مو انه صديقك , ترمي بنت اختك عليه "
" يبا يعني تظن اني برمي بنت اختي على صديقي , شالكلام طال عمرك , اهي اللي راحت معاه , اتصلت علي امس وقالت لي , واهو اليوم زارني وخذا جناطها "
ما حب يقول حق ابوه انه مها طلعت حامل وانها خشت هالموضوع على الكل , ما حب يزيد السالفه عل ابوه ,وخاصه انه ما يدري إذا ابوه يدري ولا لأ.
سكت ابوه لفترة طويله
"يبا هذا احسن لها , انت شايف شلون كان وضعها بالسنه اللي طافت حالتها ما كانت تسر لا عدو ولاصديق , خلها تحل مشاكلها معاه بطريقتها "
"تبي تعلمني انت , انا اعرف شنو احسن لبنتي وشنو مو احسن لها , يلاا السلام"
" مع السلامه طال عمرك"
بالنسبه لسعود المها غير, حفيدته الغاليه , بنت بنته الوحيده , واللي كان خايف منه صار , كان خايف انها تترك الكويت وتروح السعوديه , تروح عنه , كان يحب يشوفها ويسمعها , عشان جذي كان معارض زواجها من خالد و وقف ضد هذا الزواج مع انه خالد من الرياييل اللي ينشد الظهر فيهم ,لكن ابوها كان مصمم على انه يتمم هالزواج والبنت كانت راضيه وتبي الريال
قام من كرسيه وراح يشوف البحر من مكتبه , الله يوفقها مع زوجها ,عمر صاج حالها ماكان يسر لا عدو ولا صديق .
خاصه بالثلاث الأشهر اللي طافت .


في القصر (السعوديه) :

جبدها تقلب مو زينه من اول ما احملت وهي تكره قومت الصبح من جبدها اللي تلوع , صايره ما تستحمل شي , من اول ما قامت ما حبت تتحرك وحطت ايدها على بطنها .
وقعدت تكلمه " شفت اشلون جبدي تلوع , حبيبي ابليز مو اليوم مالي خلق "
وبدت تضحك " ههههه انا احبك بس مو لدرجه انك تقلب جبدي "
وهي قاعده تسولف لبيبيها مثل العادة , تبطل الباب بقوة فزعها , وخلاهها تفز من فراشها بحركه مفاجأة خلت جبدها تقلب بطريقه مو طبيعيه , خذت نفس عميق تخفف من اللوعه اللي جتها وصارت تقريبا احسن.
شافت خالد عند الباب ,عدلت جلستها على الفراش وغطت صدرها باللحاف, انا شسويت الحين عشان يكون معصب لهدرجه , مو من حقه يعصب انا اللي لي حق اني اعصب من دخلته علي بهالطريقه
بس ما تكلمت (خافت تتكلم تطلع اللي في جبدها وهو شكله يخوف ) التقت عينها بعينه .
خالد كان متنرفز توه راح لأمه يبغى يكلمها , ما اسمحت له يدخل وهذا الشي ضايقه لأنه امه عنده بالدنيا , وطلع حرته بالباب , ولاحظ انه افزع مها .
لما شافها كيف تناظره بفزع ,وشاف عينها الحلوة ,عينها الزرقااااا ,هذا اللي ناقصه ,عينها الزرقاء تناظره كنه تناظر كائن حي غريب.
وشاف عينها كيف انزلت للي بيده ,وكيف خذت نفس عميق وردت ناظرت بوجه .
ابتسم بسخريه لما عيونهم التقت مرة ثانيه وهذا خلاها تصد عنه , كنها مو متحمله تشوفه
كنه وجهه يقرفها .
تكلم عشان يقطع على نفسه سلسله التفكير قبل ما تشب النار اللي داخله اكثر وتحرقه وتحرقها .
"جبت لك الشنط "
ما اقدرت تلف عليه وتشوف نظره السخريه والأحتقار اللي تواجهها وقالت من غير نفس " اوكي خلهم بأي مكان."
" لا ارجوك قولي المكان اللي تبغينه , وين تبغين اشيلهم فوق راسي يا سمو الأميرة ولا تبغيني احطهم لك بالكبت , لااااا اخاف تبغيني اشيلهم لك بالحمام , انتي بس تامرين يا اميرتنا "
ما تصدق شلون قاعد يتطنز عليها ,شلون قاعد يهزئها , حراااام عليه .
وهم عاندت نفسها وما لفت عليه ما ارح ترضيه بأنه يشوف دموعها مرة ثانيه , اهي ما تعودت احد يكلمها بهالطريقه و ما تعودت هالأسلوب يتوجه لها منه اهو بالذات , كانت تسمعه يكلم غيرها إذا عصب بهالطريقه ولكن اهي لأ.
"لا تتكلم معاي بهالطريقه لو سمحت " ولعنت نفسها مليون مرة على صوتها اللي يرجف .
رد عليها بكل براءه " وليه وش فيها طريقتي بالكلام !....مهي عاجبتك ....يمكن تبغين توجهيني عشان اعرف اتكلم مرة ثانيه ! "
مسكت الغطا " اللحاف" بقوة بدون ما تحس وما ردت .
لما شاف ردة فعلها الغير كلاميه ,تكلم ببراءه ساخرة "يالله انا معصبك لهالدرجه لااا ما اصدق هذا انا احاول ادللك واقولك تامرين ويا سمو الأميرة , اجل لو انا مكلمك بالأسلوب اللي كلمتيني فيه , يعني كلمتك كنك تشتغلين عندي , وش كانت ردت الفعل بتكون هاا يا سمو الأميرة " ما لفت عليه وهذا الشي نرفزه كان يبغى يشوف عيونها وراح لها لما صار مقابلها حط يده على حنكها ولف وجهها له والتقت عيونها الزرقاء الحلوة بعيونه السوداء .
الدموع اللي تارسه عينها خلته يتركها بس مو قبل ما يقول لها
"هالمرة سكت عن اسلوبك الحلو لكن وربي يا مها ما رح اسكت المرة الجايه " وترك شنطتين وطلع , اول ما طلع ما اهتمت تسكر الباب.
راحت جري للحمام جلست على الأرضيه الباردة وبدت تستفرغ اللي بكبدها ودموعها على خدها .
اكتشفت انه مع كل اللي سواه فيها مازالت تحبه وتموت فيه , اكتشفت بهاليومين اللي شافته فيهم انها كانت تخدع نفسها لما كانت بالكويت وتقول انها ما تحبه وانها تبي الطلاق , اكتشفت انه تصرفاته تأثر فيها عشان جذي الغيرة بتحرقها من خطيبته , وانها تبي تعيش معاه العمر كله ,اه يا ليتها ما يت للسعوديه , يا ليتها ما شافته , يا ليتها ما اكتشفت انها تعشقه مع كل اللي سواه فيها .
لما نزل يحمل الشنطه الثالثه , وصل لغرفتها ودخل الغرفه بهدوء وحط الشنطه ,ما شافها بالغرفه ,ما اهتم , ماله خلق مشاكل معاها , صاير كلما شافها تزيد المشاكل وتبادل الكلمات , جا بيطلع , سمع صوت الأستفراغ والأنين اللي طالع من الحمام المفتوح .
راح للحمام وشافها جالسه على الأرض تستفرغ ,اختبص ,ما عرف وش يسوي ,قرب منها على طول وحط يده على راسها يمسكه لها و اول ما حط يده على راسها حس فيها تحاول تقاوم يده فقال لها بنبرة أمرة "اهدي "
ما قدرت تقاومه اكثر لأنه رجعت تستفرغ , حست بجسمها تعبان وراخي عقب ما خلصت اللوعه والأستفراغ ورمت راسها بدون ما تحس على صدره اللي كان وراها وقالت له " ابعد عني "
"لازم نروح للطبيب" هو قال هالكلام وهو لسه ماسكها
لما حست بصوته قريب من اذنها استوعبت انها متكيه عليه ,بعدت عنه وحطت ايدها على راسها المعرق "لا ما في داعي كل شي طبيعي " وبعدت شعرها عن عينها " لو سمحت خلني ابروحي "
"كيف طبيعي وانتي كنتي تستفرغين ,قومي يلاا.. خلصي" جا بيوقف ويوقفها معه ,لكن هي بعدت يدها عنه

"والله طبيعي ..كلمت الطبيبه بالكويت وتقول طبيعي ..كل مرأة ...اممم ..حا...حامل احتمال يصير فيها جذي ...حتى اسأل امك "......."ألحين اتركني بتعدل واطلع" وهي منحرجه ما تبي تشوفه عقب ما اكتشفت انها ما وقفت عن حبه , تكره تحس انه هو ما اعتنى فيها لأنه يحبها , ولكن لأنه واجب عليه انه يسوي جذي .
" انا راح استنى عند الحمام إذا تبغين اي شي ناديني "
فجاة لفت عليه (عقب ما كانت صاده عنه طول الوقت ) وحطت حرتها فيه " خالد لا تبين جنك مهتم , انا وانت نعرف انك ما تهتم فيني ..... يا كره التمثيل " وردت صدت عنه .
قاطعهاااا وهو يشوفها من فوق لأنه واقف وهي لساتها قاعده " لا انا من ناحيه مهتم فأنا مهتم" لما سمعت كلمته حست بالأمل ,لكنها ما لفت عليه , وكمل " لا تنسين اللي في بطنك ولدي , وصحتك من صحته ,بنتظرك بسرعه خلصي"
اما اهي حست كنه سجاجيــــــــــــن بصدرها , بغت ترد تبكي إلا انها امنعت نفسها.
يعني انا مو مهمه , هذا اللي كنت اعرفه من كنت في الكويت , شنو فرق الحين لما سمعته يقولها بصراحه, ليش حسيت جني بموت ليش ؟.
هو طلع يستناها بره الحمام ,يبغى يتأكد انها بخير ,عقب اللي شافه خاف انه يرجع لها الأستفراغ


المزرعه :

عمر وصل للمزرعه ,دخل من البوابه الكبيرة , وشاف البيت اللي قدامه والساحه الوسيعه ,بدى يتردد هل القرار اللي اتخذه صحيح ولا لأ
هل كان المفروض يتعذر .
جلس بالسيارة يشوف المزرعه , ما تغيرت من شافها اخر مرة .
نزل من السيارة لما شاف بوحمد يطلع له من الخيمه الكبيرة الموجوده بالساحه , الظاهر انه سمع صوت السيارة .
"يا الله حيااا , نورت المزرعه يا بوسعود"
"هلا والله ,الله يحيك يا عمي ,منورة بوجودك " وسلم على الرجال الكبير اللي يحسه مثل جده الله يرحمه .
دخل معاه للخيمه وما جلس إلا لما شاف عمه يجلس
"جيب القهوة يا ولد"
ولف على عمر "اخيرا جيت !! يعني كنت تنطر اهددك يالله تجي "
والله هالشايب يدخل القلب "ههههههه اللي يهداك يا عمي تدري انه ابوي يعتمد علي بالشغل ما اقدر اخليه "
" ايــــــــــــــــه وانت الصادق إلا وش اخبار ابوك ؟"
"الحمد لله بخير , علومه تسرك "
وصرخ بوحمد فجأة " يا صبي القهوه" وعلى طول نزل عمر راسه قبل لا يشوف بوحمد ابتسامته , واثنينهم اسمعوا الصبي يقول "حاضر يا عمي جايتك القهوة جايتك "
"والله هل صبيان صايرين ابد .....ايـه على ايام قبل " ولف على عمر "إلا قلي اخبارك ؟"
لما سمع النبرة اللي نطق فيها السؤال تغيرت نفسيته,كان يعرف هالنبرة زين ,من اول ما توفت نورة وهو يسمعها, رفع راسه وقال "بخير عساك بخير"
"لا تكذب "
اهني رفع عمر حواجبه بأستغراب وما قط احد قال انه يكذب لما يقولهم انه بخير ,يمكن اهم حاسين انه مو بخير بس ما احد تجرأ انه يواجهه , وخالد كان يسأله بس إذا قاله انه بخير يعطيه نظرة (انا مو مصدقك) و ما يعلق , وهذا الشي مريحه .
"لا ترفع لي حواجبك , انا سامع انك ما انت بخير"
قال بقوة وبلهجه الواثق "مو كل شي تسمعه تصدقه , بس من باب الفضول من اللي وصل لك هالكلام ؟" وتسائل ان كان هالكلام وصلها بعد .
بوحمد " المهم انك بخير , مو المهم اللي نقل الخبر "
القهوه خلته يسكت وقرر انه ما يطول الموضوع
" تدري ليه انا عازمك اليوم على المزرعه ؟"
"ليش فيه سبب غير انك تبي تشوفني ؟" قال هالكلام وهو مبتسم وجا الصبي يعرض عليه القهوة إلا انه اشرله انه ما يبي زود .
" ايــــــــــــــه قوم معي يا بوسعود؟ "
قاموا مع بعض وكان واضح على العم بوحمد " فهد" انه متحمس لشي راحوا مع بعضهم لخلف بيت المزرعه مكان الأسطبلات والحظيرة , وكلما قربوا كان العم فهد يمشي اسرع من الحماس ,لما قربوا من الحظيرة ,إلي من شاف عمر الموجود فيها غيب عن الدنيا وبدى يقرب اكثر واكثر ,كان فيها خيل من احلى الخيول اللي شافهم بحياته , جميل جمال مو طبيعي , اسود سواد الليل وشعره طويل ,يركض ما يبي يتقيد , كان باين انه عمال المزرعه مو عارفين يمسكونه ويهدونه , لأنه الخيل كان جامح مو راضي بالقيد.
اه ياهو اشتاق للخيل من سنه وشي ما قعد مع خيوله القعده اللي ترضيه , اصلا هذي اول طلعه له برة الشغل من زمان , قرب للحظيرة وعينه مهي راضيه تخلي الخيل .
وسمع صوت العم فهد من وراه يقول " كنت ادري انه بيعجبك ,وانه ما احد راح يقدره غيرك"
قال عمر من غير لا يوخر عينه عن الخيل " لا احسنت الأختيار يا عم فهد , وين لقيته هذا "
كان يدري انه عمر الوحيد اللي راح يحس بنفس مشاعره تجاه هالخيل واللي كان يغيض بو حمد انه ولا واحد من اعياله او احفاده مرتبط بالخيل مثل ما اهو مرتبط فيه , وارتبط بعمر عشان حبه للخيول ,اللي يحس يذكره بنفسه لما كان شاب
"المهم اني لقيته , تقدر تروضه لي ,الصبيان اللي عندي احسهم ما يعرفون يقدرون قيمته , وراح يكونون قاسين عليه ,خاصه انهم جدد ,ها وش قلت "
" لويت ذراعي يا عم ,لويت ذراعي "
"هههههههه ,ها وش قلت "
اهني لف عمر عليه وقال " المشكله انك تعرف الرد ,هذي المشكله " ورجع شاف الخيل " احتاج حق يومين ,خلني اخذه معاي للكويت وارده لك احسن ما يكون "
" لا إذا بتروض هالخيل بتروضه هنا ,بالمزرعه ذي , ها وش قلت ؟"
" صعبه "
" لا مهي صعبه , نام عندي هنا "
"هههه اشوف فكرت بكل شي "
" تنام ببيت الضيافه ها وش قلت ؟"
سكت عمر فترة بعدين قال "شسمه الخيل؟"
ابتسم فهد لأنه عرف انه كسبه خلاص وقال "اسمه قايد الريم "
هذا الأسم خلى عمر يلف على بوحمد بسرعه ولف عليه بوحمد بنفس الوقت
"اعجبك الأسم ؟"
قال عمر بسخريه "كثير !"
ورجع يشوف الخيل , هالخيل جد يسحر , شوفته لقايد الريم رجع حبه للخيل بصورة رهيبه , وحس انه انشغاله خلاه يهمل خيوله ,القعده مع الخيول كانت تعطيه احساس ثاني وغير عن احساسه بأي شي ,وقرر انه اول ما يرجع للكويت يعوض خيوله عن الأهمال


عند البحيرة :

صحت من سرحانها ,و شافت تليفونها ,عندها 4 مس كول "مكالمات لم يرد عليها " ,معقوله كيف ما سمعت تليفونها ,وتذكرت انها كانت حاطته على الصامت ,خذت تليفونها وناظرت الساعه وفزت بسرعه من مكانها , معقوله الساعه 11 مو معقول , توها تنتبه انه الشمس تغير مكانها يالله كيف الوقت مر بسرعه , غسلت وجهها من ماي البحيرة , اتصلت على جوري بنت عمها اللي متصله عليها .
بنت عمها اللي اول ما شالته قالت "يا حمارة وينك انتي ؟؟؟, صار لنا سنه نحاول نتصل فيك "
"سوري ادري والله ادري بس انا بالبحيرة و بدون لا أدري سرحت "
" رحـــــــــــــــــــــــــــــــــــــتي البحيرة , انتي ما تدرين انه جدي مانعنا منها ؟؟ , كيف اتروحين "
انا غبيه اكيد غبيه ,كيف اقولها انا وين ؟؟ كيف ؟؟
حاولت تصرف " المهم انا كاني جايه ,اوصل الجوهرة للعم حسن واجيكم "
سمعت صوتها تقول "بس .."
ما كان لها خلق تسمع كلام جوري عن زيارتها للبحيرة الممنوعه !
فقاطعتها " لا بس ولا شي انا احس بالجوع , قولي لسانديا تسوي لي سلطه ما تفطرت عدل اليوم "
وسكرت التليفون وراحت (للجوهرة) وحطت يدها عليها ووضمتها بحيث راسها صار على رقبه الخيل .
وقالت لها بهمس " شكرا لوجودك معي بوقت ضيقي "
ركبت الخيل وركضت فيه للحظيرة بأسرع وقت ممكن وهي تدعي ربها انه محد يلاحظ انها كانت تبكي قبل


بالقصر :

بعد ما طلع من حمامها ,اتصل على اخته فاطمه
بعد السلام حس بأسلوبها الجاف معاه وهو بصراحه ما يقدر يلوم احد بس جد كان تعبان.
"فاطمه ابغى اسألك عن الحمل " وسكت ما يدري كيف يكمل "المرأه الحامل كيف تكون بالصباح؟"
سكوت على الطرف الثاني وبعدين سمع اخته وعرف انها مبتسمه من نبرة صوتها ولعن نفسه انه ما عرف يصيغ سؤاله " كيف تكون يعني بالصباح و ما فهمت السؤال ؟"
تغير نبرة صوتها من سؤاله احرجه
" اقصد يعني يجيها غثيان وكذا ولا إذا صار هالشي لازم اوديها للمستشفى ؟"
هنا سمع ضحك بصوت عالي و هذا للي ناقصه سخريه اخته عليه " الحمدلله اني فرحتك اخت فاطمه و الحين ممكن تجاوبين على سؤالي"
اخته الظاهر حست انها مصختها فجاوبت وهي تحاول تكتم الضحكه " وحرمتك اش قالت لك ؟"
" هي قالت انه ما عليها باس و لكن انا حبيت اتأكد "
"لا تطمن هي بخير وهذا الشي طبيعي , وعشان ترتاح خلها تاكل قبل ما تقوم من فراشها بسكوت جاف او توست , يمكن هذا يهدي كبدها شوي "
" اممم وش الأشياء الثانيه اللي لازم تسويها الحامل ؟"
" ما أدري .....احسن انك تاخذ لها موعد مع دكتورة وتخليها تراجع كل شهر وكذا , احسن لك ولها , وكمان عشان الدكتورة تعرف حالتها واي شي يصير من مضاعفات او خطورة ممكن تتعرض لها "
شافها تطلع من الحمام فقال لأخته "شكرا ما قصرتي ,اتصل فيك بعدين "
"لحظه يا خالد لازم انتكلم .. "
"صدقيني بعدين ,انا بعد ودي اتكلم معك , يلا مع السلامه"
لما طلعت من الحمام , اللي ما كانت ناويه تفارقه , عورها قلبها لما شافته قاعد ينطرها واول ما شافها فز و جنه ما صدق على الله طلعت ويبي يروح يفتك منها .
"رح اخذ لك موعد مع دكتورة اتابع حمالك "
سكتت لأنها عارفه انه اللي في باله راح يسويه وكلامها ما راح يزيده إلا عناد .
" الفطور إلى الأن تحت ,إذا تبغين شي نزلي , سارة موجوده وبتساعدك "
" لأ ابي اكل بالغرفه" شافت ويهه وقالت بسرعه "احس اني تعبانه بعد ...بعد اللي صار..يعني اللوعه وكذا" تدري انها ما تقدر تظل محبوسه بغرفتها طول قعدتها بالسعوديه (اللي تتمنى انها قصيرة) جنها طفله معاقبه , إلا انها ألحين مو قادرة تواجه احد , منحرجه وايد من اللي صار امس وتحس انه ما احد يبي يشوفها خاصه امه .
اقتنع بكلامها فقال " على راحتك , راح اقول للخدم يحضرون الفطور ويجيبونه لك , انا الحين بروح عندي شغل اقضيه , إذا تبغين اي شي اتصلي علي تعرفين رقمي صح ؟"
هزت براسها إن (ايــــــــــه)
" تمام "
توه بيطلع شاف شنطها ورد لف عليها " ثلاث شنط كبار لسفرة لمده ثلاث ايام مو خاشه مخي ,وش كنتي ناويه عليه ؟"
إحمر ويهها بطريقة (كاد المريب ان يقول خذوني) ردت فعلها خلته يرفع حاجب ويعدل وقفته " قولي وعليك الأمان "
عظت برطمها " راح تعصب "
"لا ما راح اعصب , غردي "
"شفت انته من ألحين معصب "
" قلت لك ماني معصب و لا تخليني اعصب جد "
قالت كل شي بسرعه " عمر كان ناوي يروح حق مصر وانا كنت ابي اقنعه انه ياخذني معاه ..وبس"
شافت ويهه فقالت " انته قلت انك ما راح تعصب "
تنهد يفرغ الشعله اللي بداخله "ما عصبت"
مشى للباب وتوه بيطلع سمعها تقول له " خالد " لازم يمنعها انها تقول اسمه ,وقف ايده على مسكت الباب بدون ما يلف عليها و لما شافته وقف قالت "لازم نتكلم"
"عن "
"عن قعدتي بالسعوديه , انته اكيـــــــــــد مو جاد بكلمتك صح؟ انته بس تبي تخوفني لأني خشيت عليك اني حامل صح"
"لأ غلط " ولف عليها "بتقعدين بالسعوديه على اتفاقنا وما راح انتناقش بالموضوع مرة ثانيه"
" اتفاقنـــــــــــــا احنا ما اتفقنا انته قررت"
" والله سميه اللي تسمينه ما يهمني , المهم انك راح تبقين "
"بس هذي دكتاتوريه , مو من حقك تقرر شي متعلق بحياتي بهالطريقه "
"مثل ما انتي قررتي انك تخشين علي سالفه الحمل صح"
اهني ما قدرت ترد بولااا كلمه واهو طلع من غرفتها , دايما بكل خلافاتهم لازم اهو اللي ينتصر إلا خلاف واحد ما تحب تتذكره كانت مستعده بذاك الخلاف بالذات انها تخسر, لما تذكرت سبب الخلاف قست قلبها عليه .
لازم ما يعرف بأحساسي تجاهه .

بمكان ثاني بالقصر (موضي):

كانت قاعده بالصاله الرئيسيه بعد ما عرفت انه خالد طلع من البيت , صحيح انها اشتاقت لولدها وهي توها بدت تعاقبه على تصرفه بس لازم تتخذ هالتصرف , ولا الكل بيعتبرها الطوفه الهبيطه بالبيت و مالها راي ولا لها شور.
انها تخلي خالد يستنى على الباب او انها تصد عنه صعب عليها و لأنها اعتمدت عليه كثير بعد وفاة ابوه , واعتبرته شريكها بالمسؤوليه اكثر من اعتبارها له انه ولدها اللي فقد ابوه .
جت لها الشغاله "ماما تليفون"
"منو يا ماري ؟"
"انتي بنتي فاتيما"
"جيبي تليفون "
جابت الشغاله التليفون وراحت لشغلها
"الو "
" السلام عليكم ,صبحك الله بالخير يمه, اخبارك يا الغاليه ؟"
"تدرين بأخباري يا فاطمه "
" يما هو ما كلمك امس"
"إلا كلمني "
"اجل وش مضيق صدرك" فاطمه كانت تحاول تلين صدر امها على اخوها , اخوها اللي ما قصر تجاههم من قبل وبعد وفاة ابوهم , هو كان ولا زال الصخرة اللي يتمكسون فيها متى ما خافوا الغرق, حاولت تهون السالفه على امها وتلين قلبها على خالد علها ترد جزء من جمايله عليهم , نبرة صوته والكدر اللي مغلف صوته عورت قلبها وخلاها تتراجع عن سياستها انها تكلمه بحفاف.
"يعني انتي منتي شايفه انه الموضوع يكدر الخاطر ويضيق الصدر"
" إلا , بس ما نقدر انغير شي بالزعل , وبعدين هذا خالد يا يما "
" هذا اللي ماني قادرة استحمله انه خالد , لو من غيره كان عادي لكن منه اهو بالذااات...آآه " وسكتت
فاطمه قررت انها ما تضغط على امها بهالموضوع و استسلمت لفضولها الأنثوي
"يما وش بيصير على حرمته ؟"
" والله على حسب كلامه انهم بيتطلقون لما تولد , ما أدري عنهم " ورجعت بفكرها لأمس كيف قال لها بصوته انه يبغاها
استغربت فاطمه من طريقه امها كنها مو واثقه بخالد " يما انتي منتي واثقه بكلمته ؟"
"فاطمه تتكلمين كنك ما شفتيها , ما شاء الله كنها قمر اربع تعش , زين و حلاة ودلع , بالعرس الكل منهبل عليها , وخالد رجال ,خوفك يضعف قدامها , خاصه بعد ما صار يربطه معاها اكثر من عقد الزواج مو بس كذا ابوها كان صديق جاسم الله يرحمه وانا خايفه هالشي يأثر عليه, يعني يحسسه بالمسؤوليه "
"ايه يمه شفتها ,.... بس ادامه قال انه بينفصل عنها فهذا يعني انه الخلافات بينهم ما لها حل , ما قالك امس وشهو سر الخلاف او كيف تزوجها ؟"
"ما قال إلا اللي يبغى يقوله ,امس بعد ما طلع عني اكتشفت اني ما طلعت منه لا بحق ولا باطل ,ما احسه قال لي الحقيقه كامله , احس كنه في اشياء مخبيها عني ... والله انا خايفه على سمر انها ما تتقبل الموضوع بكبره انك توافقين على رجل ما عنده حرمه ولا عنده ولد غير عن رجال مطلق وعنده بزر يربيه "
" لا سمر ما عليها زود جمال واخلاق وطيبه ,ان شاء الله بتملك قلب خالد و ما تخلي فيه شي لحرمته الأوليه "
والله يا خوفي إنا نظلم بنت الناس ويكون قلب ولدي بيد بنت محمد .
من الضيقه اللي كاتمه على صدرها مثل الجبل لما تفكر بالموضوع ,قررت انها تغيره فقالت "الله يعين يا فاطمه , المهم ايش اخبارعيالك ريهام وسالم ؟"
بتنهيده قالت فاطمه "اليوم الخميس ,اكيد مبسوطين "


المزرعه :

اخيرا وصلت للأسطبلات , المشكله ما شافت احد من الساسه فبدت تنادي " عم حسن "
لما ما جا احد , حاولت مرة ثانيه " يا عم حسن " وتمنت ما يطلع لها السايس الجديد (ما ترتاح له ابد .)
ما لاحظت العين اللي كانت تشوفها من الكرسي المحطوط جدام الحظيرة .
ردت تنادي بس بعصبيه "يااا عم حسن"
وفجأة شافت بطرف عينها شخص يوقف من مكانه , وفز قلبها , لفت على الشخص , و فوران المشاعر اللي جاها خلاها تحس باللوعه , الشوق والحب و الذنب والجرح , إلا انه الأحساس الأقوى كان الغيرة , احساسها انه كان لوحده غيرها وانه بعد ما تركها لقى له حرمة ثانيه وتزوجها مجننها , بس ثلاث سنوات وشهرين وثلاث اسابيع ويوم من دون شوفته قدرت خلالها انها تتحكم بمشاعرها وتخليها بالجزء البعيد من مخها لكن مواجهته وجه لوجه كانت لها تأثير على تحكمها فطلعت المشاعر المدفونه .
بالنسبه للطرف الثاني فكانت مشاعره غير , تأثير جمالها عليه نرفزه, جمالها اللي نضج صارت قمه بالأنوثه ,معقوله 3 سنوات تسوي جذي بالمرأة , حمد ربه انه انتبه لها مبجر وقدر يتعافى من صدمه شوفتها اهني بالمزرعه وقريبه منه , تفاجأ من هالمواجهه الغير المتوقعه , حس ابراكين تتفجر داخله و براكين مو قادر يطفيها , ما يبي يحلل شنو هالمشاعر اللي ثارت بداخله وهذا خلاه يحتقر نفسه لأنه مجرد شوفتها سوت فيه جذي ,المفروض ما ينسى شنو سوت فيه ,يكره كل شي تثيره داخله , وما قدر يمنع نفسه من ملاحظه ملابسها اللي عسرته بشكل ما كان متصوره , قام من مكانه عشان يتخلص من وجودها قريب منه بأسرع وقت , ولأنه مو ضامن شنو راح تكون رده فعله ان شاف واحد من الساسه قريب منها ويشوفها واهي بهالملابس .
لاحظ انها انتبهت له (اخيرا)
قرب منها ومسك اللجام وقال كلمه وحده بس "نزلي" قدرته على المحافظه على اعصابه وعلى بروده دايما تسعفه بهالمواقف .
اللي يشوفه ,راح يشوف شخص مو متأثر ولا مهتم .
لما شافها نزلت , ترك اللجام وضرب الخيل ضربه خفيفه خلته يروح تلقائيا للأسطبل , ورد لمكانه لأنه ان شافها اكثر بيذبحها على هدومها , بس ما يبي يبين اهتمامه , وقعد وهي لما الحين واقفه بمكانها ما تحركت .
شاف السايس يطلع من الأسطبل واهي لما الحين مكانها تشوفه ,فقال بسخريه " طول عمري كنت ادري انج تشوفيني حلو بس مو لدرجه تسمرين بويهي لهالدرجه "
شهقت من وقاحته وراحت بخطوات سريعه لبيت المزرعه لكن مو قبل لا تقول بصوت واطي لما قربت من كرسيه "تحلم انك تعجبني " سخريته سوت الشي اللي كان متوقعه ويبيه بانها تدش داخل قبل ما ينتبه لها السايس , على الأقل خبرة تسع سنين زواج منها ما راحت بلاش مثل ما كان متصور.
ومتأكد ان سخريتها منه سوت الشي اللي اهي كانت تبيه بالضبط انه يعصب.

تسلمين ملووكه ع البارتات >> مااعرف وش جمعها


متااااااااااااااااابعه